கற்கை நன்றே

பூர்வ ஜென்ம வாசனை பீடிக்குமா ?

2011-12-17T22:10:00.000-08:00

நம் அன்றாட வாழ்க்கையில் சில வேண்டாத விஷயங்களை விட்டு ஒதுக்குவோம் என்றாலும் நம் சந்தர்பங்கள் அதை விட்டு வெளியேற முடியாத வகையில் பெரும்பாலும் நம்மைப் பிணைத்து வைக்கிறது. புகைப் பிடிக்கும் பழக்கம் உடைய ஒருவர் “ஏதோ வெளயாட்டா ஆரம்பிச்சேன். கொஞ்சம் கொஞ்சமா ஒரு நாளக்கு மூணு பாக்கெட் வரைக்கும் போயிடுச்சு. இப்போ கண்ட்ரோல் பண்ணலாம்னு நெனச்சு சும்மா இருந்தாலும் எதிரிலே இருக்கிறவன் தனக்கு ஒண்ணை வாயில் வைத்துக் கொண்டு பெட்டியை நீட்டறான். அவனுக்கு கம்பெனி கொடுக்கலாம்-னு நானும் ஒண்ணை பத்த வைக்கிறேன். எப்படி விடறது ?” என்று தம் இயலாமையை சொல்லிக் கொள்வார்.

எந்த ஒரு நிகழ்ச்சிக்குப் பின்னும் ஒரு காரணம் இருந்திருக்க வேண்டும் என்பது வினை விதி. இது மிகவும் குழப்பமானதும் தீர்க்க முடியாததுமாகத் தோன்றுகிறது. ஆங்கிலத்தில் chicken and egg syndrome என்று சொல்லப்படும் முட்டை முதலா கோழி முதலா என்ற கேள்வி போன்றது இது.

இதைப் பற்றிய DVG யின் சிந்தனையை அவரது மக்குத்திம்மன் பாடல் வழியாகக் காண்போம்.

வீசாமல், சாம்பல் மூடிய பொறி எரியுமா?
கைகள் சேராமல் கைத்தட்டல் ஆகிடுமா ?
(பூர்வ) வாசனைகள் தாயாம் ஆசைக்கு, தந்தை சந்தர்ப்பமாம்
குற்றம் உள்ளேயோ வெளியேயோ- மன்குதிம்மா

புகைபிடிக்கும் அன்பர் இதில்குற்றத்தை வெளி சந்தர்ப்பத்திற்கு காரணமாக்குகிறார். அடிப்படையில் தமக்கு உள்ள பலவீனத்தை ஏற்றுக் கொள்ள மறுக்கிறார். ஆனால் இரண்டிலும் சரிபாதி உண்மையுள்ளது. எனவேதான் தாய்-தந்தை மற்றும் இரண்டு கைகள் போன்ற உதாரணங்களுடன் DVG இதை அழகாக விளக்கியுள்ளார்.

என் சிறிய அறிவுக்கு எட்டியதில் நாம் செய்ய வேண்டியது என்னவென்றால், வெளியிலிருந்து சந்தர்ப்பம் ஒரு குறிப்பிட்ட ஆசையைக் குறித்து வரும் போது அதன் நல்லது கெட்டதை உள்ளிருந்து யோசித்து விவேகத்துடன் செயல்பட்டால் அல்லாதனவற்றை விலக்கலாம்.

இதற்கு நல்ல உதாரணம் மணிமேகலை. உதயகுமாரனிடத்து தனக்கு எழுந்த விருப்பை ஒதுக்கி தள்ள முடிவு செய்கிறாள்.

புதுவோன் பின்றைப் போனது என் நெஞ்சம்
இதுவோ அன்னாய் காமத்து இயற்கை
இதுவே ஆயின் கெடுகதன் திறம்...
(மணிமேகலா தெய்வம் தோன்றிய காதை 89-91)

பிந்தைய பிறவியில் இராகுவன் என்ற பெயரில் தன் கணவனாக இருந்தவனே இப்பிறவியில் உதயகுமாரனாக பிறந்துள்ளான் என்பததையும் அதனால் தன் மனம் தடுமாறுவதையும் மணிமேகலா தெய்வத்தின் மூலம் அறிந்து கொள்கிறாள்.

மணிமேகலையின் பூர்வ சென்ம வாசனையும் அடுத்த சென்ம சந்தர்ப்பமும் எப்படி இணைந்து வலை விரித்தன என்பது DVG -ன் வரிகளுக்கு நல்ல உதாரணம். சத்கருமங்களுக்கான சந்தர்பங்களானால் நெருப்பை ஊதி பெரிதாக்க வேண்டும். அல்லாது போனால் சந்தர்ப்பத்தை ஒதுக்கி தள்ளி மணிமேகலை போல் விவேகமாக செயல்பட வேண்டும்.

கவிதை வடிவில் மொழியாக்க முயற்சி
நீறான் கவிந்த பொறியும் வீசாமலே எரியுமோ
சேராமலே கைகளும் ஒலிதனை எழுப்புமோ
வாசனைகளே தாயாம் சந்தர்ப்பமே பிதாவாம்
தோசம் உள்ளோ வெளியோ- மக்குத் திம்மா

(நீறு =சாம்பல் ; வாசனை = பூர்வ ஜென்ம தொடர்ச்சி ; தோசம் =குற்றம்)

மக்குத்திம்மன் கவிதைகள் # 291

அவதாரத்தை அழைத்த அரவிந்தர்

2011-11-22T17:22:00.000-08:00

1926 ஆம் வருட ஆரம்பத்திலிருந்தே ஸ்ரீ அன்னையின் ஆசிரம பொறுப்புகள் கூட ஆரம்பித்தன. பக்தர்களின் ஆன்மீக வழிகாட்டுதலும் ஆசிரம நிர்வாகத்தைப் பார்த்துக்கொள்வதையும் அவரே ஏற்றுக் கொண்டார். அரவிந்தர் சிறிது சிறிதாக விலகிக் கொள்ள ஆரம்பித்தார்.
ஸ்ரீ அரவிந்தரின் தியான நேரங்கள் மேலும் மேலும் கூடிக் கொண்டே போனது. வழக்கமான மாலை நான்கு மணிக்கு பக்தர்களுடனான அரைமணி நேர உரையாடல் நேரம், நேரம் கடந்து துவங்க ஆரம்பித்தது. அது மணி ஆறு, ஏழு பின்னர் எட்டு என்று தள்ளிக் கொண்டே போக ஆரம்பித்தது. ஒரு நாள் அவர் தியானத்திலிருந்து வெளிவந்த நேரம் அதிகாலை இரண்டு மணி.

அரவிந்தரின் இந்த தீவிர தியானம் பேராத்மாவை பூமிக்கு கொண்டு வருவதற்கானது என்று பக்தர்களுடன் உரையாடும் போது அடிக்கடி குறிப்பிடுவது உண்டு. தன்னை அந்த பேராத்மாவோடு இணைத்துக் கொள்ளும் முயற்சியில் ஈடுபட்டுள்ளதாய் அவரது பிறந்த தினமான ஆகஸ்ட் 15 க்கு முன்னும் பின்னுமான நாட்களில் அவர் சொல்லியிருக்கிறார்.

பலருக்கும் அவருடைய பெருமுயற்சி பற்றிய நம்பிக்கை வேடிக்கையாய் இருந்தது. சமுதாயத்திற்கு வழிகாட்டாமால் ஏன் இப்படி வழி தவறிப் போகிறார் என்றும் நினைத்தனர். ஆனால் அவருடைய பக்தர்களுக்கு அந்த பேரான்மாவுடன் அவருக்கு இருந்த தொடர்பு பலவாறு புரியத் தொடங்கியது. அவர்கள் அருகில் இருப்பினும் தொலைவில் இருப்பினும் அவர்களுடைய சங்கடங்கள் அரவிந்தரை நினைத்த மாத்திரத்திலேயே தீர்ந்து போயின. மனித சமுதாயத்தின் மேல் அரவிந்தருக்கிருந்த அளவு கடந்த அன்பை அவர்கள் அறிந்தனர். அவருடைய சாவித்திரி யில் எழுதியுள்ள ஒரு வரிக்கு அவருடைய வாழ்க்கையே உதாரணமாயிற்று
“ His Spirit's stillness helped the toiling world "

அப்பேற்பட்ட மகான் பேரான்மாவை பூமிக்கு அழைப்பதற்கான முயற்சியில் தான் ஈடுபட்டுள்ளேன் என்னும் போது அவருடைய பக்தர்கள் அனைவரும் அதை உறுதியாக நம்பினர். விரைவிலேயே பரமபுருஷன் பூமிக்கு இறங்கி வருவதற்கான சாத்தியக்கூறுகள் பற்றி பேசிக் கொள்ள ஆரம்பித்தனர். நாட்கள் உருண்டு கொண்டிருந்தன. நவம்பர் மாதத் தொடக்கத்திலிருந்து ஏனோ அரவிந்தரிடமிருந்து அவருடைய முயற்சியின் வெற்றியை அறிய எதிர்பார்ப்பு அதிகமாயிற்று. இறுதியாக அந்த நாளும் வந்தது. நவம்பர் 24 ஆம் தேதி மாலை ஸ்ரீ அன்னை யாவருக்கும் அழைப்பு அனுப்பினார்.

வழக்கமாக தியானம் புரியும் வராந்தாவில் இருபத்து நான்கு பக்தர்கள் குழுமினர். அரவிந்தர் அமரும் நாற்காலிக்கு பின்புறம் சீனத்துப் பட்டுத் திரைச்சீலை அவரது அறைக்கதவை மூடியிருந்தது. அதில் மூன்று டிராகன்கள் ஒன்றின் வாலை மற்றொன்று கவ்வியிருப்பது போல் ‘லேஸ்’ வேலை செய்யப்பட்டிருந்தது. பூமி, மனவெளி மற்றும் ஆகாயம் ஆகிய டிராகன்கள் ஒன்று கூடும் போது சத்தியம் நிலைக்கும் என்று சீனாவில் நம்பப்படுவதை குறிப்பதாம். அங்கே பேரமைதி நிலவியது. ஒரு ஒளிவெள்ளம் ஆட்கொள்வதை பலர் உணர்ந்தனர். பெரும் எதிர்பார்ப்புடன் யாவரும் காத்திருந்தனர்.

கதவு திறக்கப்படுவது டிக் என்ற ஒலியின் மூலம் புரிந்து ஆவல் பன்மடங்கு பெருகியது. ஸ்ரீ அன்னை தம் கண்களாலே அரவிந்தரை முன் செல்லுமாறு வேண்டினார். அரவிந்தரோ அவரைப் போலவே அன்னையே முன் செல்ல வேண்டும் என்று குறிப்பால் உணர்த்தினார். அவருக்கே உரிய அடக்கத்துடன் வெளி வந்தார் ஸ்ரீ அன்னை. அவர் பின்னால் கம்பீரத்துடன் வெளிவந்த அரவிந்தர் போடப்பட்டிருந்த நாற்கலியில் அமர்ந்து கொண்டார். சற்று தள்ளி ஒரு முக்காலியில் அன்னை அமர்ந்தார்.

அடுத்த நாற்பத்தைந்து நிமிடங்களுக்கு தியானம் நடந்தது. அதன் பின்னர் ஒவ்வொருவராக வணங்கி அன்னையின் ஆசியைப் பெற்றனர். அரவிந்தரும் அன்னையும் ஆசி வழங்கும் போது அரவிந்தரின் வலது கரம் அன்னையின் கரங்களுக்குக்கு பின்னால் இருந்தது. அது அன்னையின் மூலமாக அருள் தருகிறேன் என்று குறிப்பதாக பலர் கருதினர். அதைத் தொடர்ந்து மீண்டும் சில நிமிடங்களுக்கு தியானம் நடந்தது. அது அற்புத ஆழ்நிலை அனுபவம். தெய்வீகம் சூழ்ந்த அந்த நிலைமை ஒரு பெரும் ஆலமரத்திற்கான உயிர்துடிப்பு சிறு விதையிலிருந்து வெளிப்படும் போன்ற கணங்கள் அவை.

அரவிந்தரும் அன்னையும் எழுந்து உள்ளே சென்றனர். தத்தா என்றழைக்கப்பட்ட Miss Dorothy Hodgson யாவரும் கேட்கும்படியாக
“The Lord has descended in to the physical today" என்று அறிவித்தார்.

Shri A B Purani , a diciple of Shri Aurobindo writes the imporatnace of the Day as follows.

"That 24 November should be given an importance equal to that of the birthdays of Sri Aurobindo and the Mother is quite proper because on that day the descent of the Higher Power symbolic of the victory of their mission took place. The Delight consciousness in the Overmind which Sri Krishna incarnated - as Avatar - descended on this day into the physical rendering possible the descent of the Supermind in Matter "

அன்றைய தினத்திற்கு பிறகு அரவிந்தர் தரிசனம் பக்தர்களுக்கும் அரியதாய் விட்டது. வருடத்தில் மூன்று தினங்கள் மட்டுமே சில மணித்துளிகளே அவர் தரிசனம் கொடுத்தார். அவரது பிறந்த தினமான ஆகஸ்ட் 15, அன்னையின் பிறந்த தினமான பிப்ரவரி 21, சித்தி தினம் எனப்பட்ட நவம்பர் 24 இவை மூன்றும் ஆசிரமத்தின் முக்கிய தினங்களாகப் போற்றப்பட்டன.
-----------------

அரவிந்தரின் மறைவுக்குப் பிறகு வாழ்க்கையில் ஒரு வெறுமையை உணரலானார் Dr. V.K.Gokak எனப்படும் வினாயக் கிருஷ்ண கோகக். அவர் மகான் அரவிந்தரைப் போற்றி வழிபட்டவர்.
அவர் ஆக்ஸ்ஃபோர்ட் சர்வகலாசாலையில் முனைவர் பட்டம் பெற்றவர். ஆங்கில இலக்கியத்தில் அற்புதமான தேர்ச்சி பெற்றவர். மிக இளவயதியிலேயே பல இந்திய கல்வி நிலையங்களில் முதல்வர் அல்லது இயக்குனராகப் பணியாற்றி பின்னர் பல சர்வகலாசாலைகளின் துணைவேந்தர் பதவி வகித்தவர். கல்வித்துறையில் மிகவும் போற்றப்பட்ட கல்வியாளர். அரவிந்தரின் 'சாவித்தி'ரியை மிகவும் நுண்ணறிவோடு விளக்கியவர். ஞான பீட விருது பெற்ற சாகித்திய கர்த்தா

ஒரு முறை ஆந்திர கவர்னரின் அழைப்பை ஏற்று தலைமை உரையாற்ற ஹைதிராபாத்தில் ஒரு விழாவிற்கு சென்றார். அதன் முக்கிய விருந்தினரான சத்திய சாயி பாபாவை அதற்கு முன் அவர் சந்தித்ததில்லை. அவரைப் பற்றி எதுவும் அறிந்திருக்கவும் இல்லை.

அவர் தமது உரையைத் துவங்கி சிறிது நேரத்திலேயே இனம் புரியாத ஒரு சக்தி தம்மை ஆட்கொள்வதை உணர்ந்தார். அவரைப் பிடித்திருந்த அந்த வெறுமை உணர்வு அன்றோடு விட்டு விலகியது. பிற்காலத்தில் சத்திய சாயி பல்கலை கழகத்தின் முதல் துணைவேந்தராகவும் சிறப்பாகப் பணியாற்றினார்.
அவருடைய 'தர்ஷன் என்ற கவிதையிலிருந்து ஒரு பகுதி.

Have you seen Baba
Who sets cities aflame with longing
And drenches them with the delight of existence ?
You have missed the very meaning of your life
If you have not seen him and been spoken to by him
..............
He is the healer of a world in pain
The blue throated god
That drinks the poison of its suffering
To make it happy and whole

மகான்களைப் புரிவது கொள்ளவும் ஒரு தகுதி வேண்டும். நமக்கு அது இல்லாதபோது அவர்கள் அருகிலிருந்து பணியாற்றிய கோகாக் போன்றவர்களின் வார்த்தைகளை தான் நாம் நம்ப வேண்டும்.

இன்று பகவான் சத்திய சாயியின் ஜன்மதினம்(23-11-1926). அடுத்ததினம் அரவிந்தர் அறிவித்த அவதாரம் இவரே என்று பெரும்பான்மையான சாயி பக்தர்கள் நம்புகின்றனர். அவர்களில் நானும் ஒருவன்.

வலி தந்த கவிதை

2011-09-15T23:59:00.000-07:00

காலையிலிருந்து ஒரு வலி. வாழ்க்கையில் நமக்குள்ள வலிகளை நினைத்து மன வலி. எத்தனைப் பிறவிகளை இப்படியே கழிக்கப் போகிறோம் என்ற தவிப்பு. அலுவலகம் போகும் வழியில் இரயிலில் பலர் ஜெபம் செய்து கொண்டு வருவதைக் கண்கூடாகக் கண்டும் அதில் மனம் ஈடுபாடு கொள்ளாமல் திரிகின்றதே என்னும் ஏக்கம். எப்படியானால் என்ன பிறர்க்கு நம்மால் துன்பம் ஏற்படாத வகையில் பிறவி அமைந்தால் அதுவே பெரும் பேறாகும் என்கிற எண்ணம் தோன்றி சற்று ஆறுதலைத் தந்தது. அதைத் தொடர்ந்து சில வரிகள் மனதில் எழுந்ததை அலுவலகம் சேர்ந்த உடனே ஒரு தாளில் எழுதி வைத்தேன்.

வலியிலா பிரசவம் தாய்க்கு
வலியிலா வளர்ப்பு தாதைக்கு
வலியிலா வார்த்தைகள் பிறர்க்கு
வலிமிகும் ஆர்வமுன் தாளுக்கு
…………………
…………………………………….
போன்றவற்றை 'நீ கொடுத்தால் பிறவிகளைப் பற்றி நான் ஏன் கவலைப்பட வேண்டும்' என்று முடிக்கத் தோன்றியது.

வலிவலம் என்ற ஊரிலிருந்து சில மாணவர்கள் திருத்துறைப்பூண்டி பள்ளியில் உடன் படித்த நினைவு வந்தது. உடனே கூகிளார் துணைக் கொண்டு தேடியதில் அத்தலத்தைப் பற்றிய களஞ்சியமே கிடைத்தது . ஆஹா! அப்பர் சம்பந்தர் சுந்தரர் மூவரும் பதிகம் பாடியத் தலம் என்பதை அறிந்து அவனிடத்தே என் முறையீட்டை வைக்கலாம் என்று பாடலை எனக்குத் தெரிந்த வகையில் நிறைவு செய்தேன்.

இறைவன்: மனத்துணை நாதன். இறைவி : அங்கையற்கண்ணி

(மேலுள்ள இணைப்பைச் சுட்டி shaivam.org-ல் மேலும் அறிக)

வலியிலா பிரசவம் தாய்க்கு
வலியிலா வளர்ப்பு தாதைக்கு
வலியிலா வார்த்தைகள் பிறர்க்கு
வலிதரா சுற்றம் எனக்கு
வலிமிகும் ஆர்வமுன் தாளுக்கு
வலியிலா மரணம் என் அந்திக்கு
வலிந்து அருளாய் பெருமானே
கலிதனில் பிறவி அனந்தம்
வரினும் கலங்குவெனோ
வலிவலம் மனத்துணை நாதனே !

என்னைப் பிரசவிக்கையில் தாய்க்கு வலிதராமலும், வளர்க்கையில் தந்தைக்கு கஷ்டங்கள் கொடுக்காதவனாகவும் பிறரோடு உரையாடும் போது அவர்கள் மனம் புண்படும்படியாக பேசாதவனாகவும், உன் இணையடியில் மிகுந்த ஆர்வம் உடையவனாகவும், என் மனைவி மக்கள் சுற்றத்தால் எனக்கு மனத்துன்பம் இல்லாமலும்,மரணிக்கும் தருவாயில் நோய் நொடிகளால் வருந்தாதவனாகவும் அருள் செய்வதானால் எத்தனை பிறவி நீ கொடுத்தாலும் நான் கலங்க மாட்டேன் - வலிவலம் என்ற ஊரில் குடியிருக்கும் மனத்துணை நாதரே

மன வலி தந்த கவிதையை நிறைவு செய்ய மனத்துணை நாதன் துணை வந்ததே அவனருள்.

தென்னாட்டுடைய சிவனே போற்றி

மும்பையில் பெருமழை

2011-08-29T06:32:00.000-07:00

இரண்டு நாட்களாக இருண்டு கிடக்கும் வானம், விட்டு விட்டு பெய்து கொண்டிருக்கும் மழை, நீரை வடிய விடாமல் பொங்கி நிற்கும் கடல் (அமாவாசை) என மும்பை நகர் மக்களை அல்லலுக்கு உள்ளாக்கியிருக்கிறது.

மக்கள் மட்டுமல்ல பிற உயிர்களுக்கும் அப்படியே என்பதை கீழே உள்ள படமே சொல்லும்.

(படத்தை சொடுக்கி பெரியதாக்கிப் பார்க்கலாம்)

இன்று அலுவலகம் செல்ல இயலவில்லை. நாளைக்கு எப்படியோ தெரியாது.

பிழைப்பு, வாடகை வண்டி !

2011-08-21T01:23:00.000-07:00

மும்பை நகருக்கு வந்து நான்கு மாதங்கள் ஆகிவிட்டது. இன்னமும் கம்பெனியில் பல முடிவுகள் எடுக்கப்படாமலே காலம் போய்க்கொண்டிருக்கிறது. பெங்களூர் மைசூர் என்று ஓடிக் கொண்டிருந்த வாழ்க்கை வண்டி இப்போது இங்கே கொண்டு வந்து சேர்த்திருக்கிறது. இதுவும் எவ்வளவு நாளோ !

இந்நிலையில் என் நினைவுக்கு வருவது “நம் கையில் எதுவும் இல்லை” என்பதை சுட்டிக்காட்டும் D V குண்டப்பா அவர்களின் மக்குத் திம்மன் பாடல் ஒன்று. கர்நாடக மக்களிடையே மிகப் பிரபலமான பாடல் இது “பதுகு ஜட்கா பண்டி”. இதே பெயரில் ஒரு திரைப்படமும் வந்தது என்று நினைக்கிறேன்.

சேணம் பூட்டிய குதிரைக்கு எப்படி சுதந்திரம் இல்லையோ அப்படி நாமும் இவ்வுலகில் சிக்கிக் கொண்டுள்ளோம்.

இதை ஓட்டுபவன் விதி. அவன் தான் எசமானன்.
அந்த விதி என்கிற எசமானன் ஓட்டுகின்ற இடத்திற்கு ஓடுவது ஒன்றே நம்மால் முடிவது. நம்மை அப்படி ஓடச் செய்வது நம்முடைய பூர்வ கர்ம வினை என்னும் பயணிகள். அதன்படி சில சமயங்களில் சுப வாழ்க்கையும் சில சமயங்களில் அசுப சந்தர்பங்களையும் சந்திக்க வேண்டியிருக்கிறது. குதிரைக்கு அடி பிறழ்ந்தால் கீழே விழ நேரிடும். நிலத்தின் மேல் ஓடுவதால் அந்த நிலமே அதைத் தாங்கும்.

[ குதிரைக்கு தான் போகின்ற இடத்தைப் பற்றிய கவலை இல்லை. அதை நிச்சயிக்கும் அதிகாரமும் இல்லை. அப்படி, நம்முடைய செயல்கள் யாவும் இறைவனைச் சார்ந்தது என்ற மனப்பான்மையுடன் செய்தால் பெரும் துன்பம் வந்தாலும் அவன் அருள் துணை நிற்கும் என்பது இந்த பாடலுக்கு சொல்லப்படும் பொருள்]

இதன் நேரடி மொழி பெயர்ப்பு முதலில்:

வாழ்க்கை வாடகை வண்டி, விதியதன் எசமானன்
குதிரைநீ, அனுப்பி வைப்பான் பயணியரை அவன்
மணவீடோ மசானமோ ஓடென்ற இடத்திற்(கு) ஓடு
அடி சறுக்கின் தாங்க நிலமுண்டு -மக்குத் திம்மா

பதுகு என்கிற கன்னடச் சொல் வாழ்க்கையை நடத்துகின்ற முயற்சியைக் குறிப்பதாகும். பிழைப்பு என்று கொள்ளலாம். முன்பெல்லாம் வாடகைக் குதிரை வண்டி சொந்தகாரர்களே ஓட்டிகளாகவும் இருந்தனர். மேலும் ஓட்டுபவன்தான் குதிரையின் போக்கை நிர்ணயிப்பவன். அதையொட்டி ஓட்டி என்ற சொல் பொருத்தமாக இருக்கும் என்று தோன்றியது. அந்த மாற்றங்களுடன் சில சிறு மாறுதல்களுடன் என் இரண்டாம் முயற்சியும் கீழே.

இரண்டாம் முயற்சி:
பிழைப்பு வாடகை வண்டி, விதியதன் ஓட்டி
இழுக்கும் குதிரை நீ, பயணியர் அவன் இச்சைப்படி
இழுத்த இழுப்புக்கு ஓடு, மணவீடோ மயானமோ
வழுக்கி விழுந்தால், தாங்க நிலமுண்டு - மக்குத் திம்மா

பாதாளம் போகும் சூதாடி மாந்தர்

2011-03-31T07:05:00.000-07:00

சமீபத்தில் பட்டுக்கோட்டை கலியாணசுந்தரம் அவர்களுடைய ஒரு பாடலை படிக்க நேர்ந்தது. சூதாடிகள் படும் துன்பம் பற்றியது. அதைக் கண்டதும் சினா சோனா வின் ஒரு கார்ட்டூன் நினைவுக்கு வந்தது.

”துண்டக் காணோம் துணியக் காணோம் என்று ஓடினான்” என வேடிக்கையாகக் குறிப்பிடுவது போல இருக்கும் உடமையெல்லாம் சூதாட்டத்தில் இழந்து ஓட்டைப் பீப்பாயை அரைக்கு அசைத்து போகும் சினா-சோனா ஏறக்குறைய பாண்டவர்களின் கதியை அடைந்து விட்டான்.

எல்லோரையும் எல்லாக் காலத்திலேயும் வெற்றி பெற முடியாது என்பதை உணர்த்தும் நல்ல கருத்து உள்ள நகைச் சித்திரம் இது.

சூதாடி மாந்தர்களின் சுக வாழ்வும் ஒரு நாளில்
பாதாளம் போகுமெனல் பாரறிந்த உண்மையன்றோ

சொல்ல முடியா துன்பக்கதை சூதாடி மனிதரின் சோகக்கதை
நல்ல மனிதரும் வஞ்சகராகை கள்ள வேலைகள் செய்த கதை
சிலர் கொள்ளை லாபத்தில் கொண்ட மோகத்தால்
உள்ளதும் இழந்து உருக்குலைந்த கதை

அந்த நாளிலே பஞ்ச பாண்டவர் அரசு உரிமை இழந்ததும்
அழகு பாஞ்சாலி அம்மையாருடன் அனைவரும் காட்டில் அலைந்ததும்
அன்பு மேலிடும் நளன் தமயந்தி அல்லல் சுமந்து வருந்தியதும்
அரிய காதலை பிரிய நேர்ந்ததும் ஆதாரம் இழந்ததும் சூதாட்டத்தாலே

( படம் : உலகம் சிரிக்கிறது 1959)

தமிழ்மணம் வலைப்பூ ராங்கிங்

2011-03-12T23:40:00.000-08:00

தமிழ்மணம் வலைப்பூ ராங்கிங் பட்டியலை சிலர் தத்தம் வலைப்பக்கங்களில் பிரதர்சனப்படுத்தியதைக் கண்டு என்னுடைய வலைப்பூக்களின் நிலைமையை என்னவென்று தெரிந்து கொள்ளலாமே என்று உரலை(URL) இடித்தேன் :)

பொதுவாக நான் வலைப்பக்கத்தின் வார்ப்புருவிலிருந்து ’பிங்’ செய்துவிடுவதாலும் நான் படிக்க வேண்டிய வலைப்பூக்களை ரீடரில் படித்துவிடுவதாலும் தமிழ்மணம் முகப்பிற்கு போய்வர அவசியம் ஏற்படுவதில்லை.இதனால் பல புது வலைப்பூக்களையும் எழுத்தாளர்களையும் அறியாமல் போய்விடுவது வருத்தத்திற்குரிய ஒரு உண்மைதான் :(

என் வலைப்பக்கங்களில் அதிக போக்குவரத்தும் பின்னூட்டங்களும் உள்ளது கபீரின் கனிமொழிகள் என்றுதான் நினைத்திருந்தேன். அதற்கு அடுத்துதான் இந்த வலைப்பூவும் (கற்கை நன்றே),சித்திரமும் கைப்பழக்கமும் என்ற வலைப்பூவூம்.
அப்படித்தான் statcounter-உம் சொல்கிறது. இவையிரண்டில் பல சமயங்களில் பின்னூட்டங்களே இருப்பது இல்லை என்பது தான் உண்மை.

ஆனால் தமிழ்மணம் ராங்கிங் அதை தலைகீழாக்கி விட்டது

மேலும் மாதம் இரண்டு இடுகைகள் என்பதாக கபீர் வலைப்பூவிலும் மற்ற இரண்டு வலைப்பூக்களில் ஒவ்வொன்றாகவும் தான் இட்டு வருகிறேன். இது மிகவும் குறைவு என்ற காரணத்தால் ராங்கிங் கீழே இருப்பதில் ஆச்சரியம் இல்லை. எனக்கு அதில் ஏமாற்றமோ குறையோ இல்லை. என்றாலும் குறைவான பின்னூட்டங்களும், பின்னூட்டங்களே திரட்டப்படாத இந்த வலைப்பூ எப்படி கபீரின் வலைப்பூவை விட நல்ல ராங்கிங் பெற்றுள்ளன என்பது ஆச்சரியமாயிருக்கிறது.

தமிழ்மணத்தின் கணக்குப்படி இன்றைய நிலவரப்படி:

கபீரின் கனிமொழிகள் -1801 : கற்கை நன்றே 1202 : சித்திரமும் கைப்பழக்கம் 1309

மூன்று நாட்களுக்கு முன்பு - 1737, 1209, 1313

எழுத்து அல்லது கருத்து தரத்தின் அடிப்படையில் ராங்கிங் செய்வது மிகவும் கடினமான விஷயம் என்பது புரிந்து கொள்ளக் கூடியதே.

ராங்கிங் பற்றி தமிழ்மணம் சொல்வது :
தமிழ் வலைப்பதிவுகளின் தர வரிசை (Traffic Rank) கடந்த மூன்று மாதங்களில் ஒவ்வொரு பதிவும் பெறும் பார்வைகளை (ஹிட்ஸ்) முதன்மையாகக் கொண்டு வெளியிடப்படுகிறது. மறுமொழிகள், வாசகர் பரிந்துரை வாக்குகள் போன்றவையும் ஒரு காரணியாக இருக்கும்

என் வலைப்பூக்களில் வாசகர் பரிந்துரையும் பெரும்பாலும் பூஜ்யமே. அப்படி இருக்கும் போது வெறும் போக்குவரத்து கணக்கினாலே செய்யப்படும் ராங்கிங்-கில் ஏனிந்த முரண்பாடு?

தமிழ்மணத்திலிருந்து வந்து போகும் வாசகர் எண்ணிக்கை கபீரின் கனிமொழிகள் சரியாக இணைக்கப்படவில்லையா அல்லது மறுமொழி திரட்டப்படுவதில் கோளாறா?

ஏதோ என் புத்திக்கு இது எட்டவில்லை, சொன்னேன். எப்படியோ வண்டி ஓடிக்கொண்டிருந்தால் சரி. முன்னாலே போவதால் ஆதாயமும் இல்லை, பின்னாலே இருப்பதால் நஷ்டமும் இல்லை. :))))

பொறுத்தால் புல்லும் பாலாகும்

2011-02-25T18:19:00.001-08:00

பொறுமைக்கு பூமியை உதாரணமாகச் சொல்லக் கேட்டிருக்கிறோம். மனிதர்கள் அதை பல விதமான வழிகளில் தவறாகப் பயன்படுத்தினாலும் அவள் தவறாது அவர்களையும் பிற ஜீவராசிகளையும் தொடர்ந்து சீராட்டி வருகிறாள்.

Adopt the pace of nature: her secret is patience. - Ralph Waldo Emerson (1803-1882)

DV குண்டப்பா வேறொரு வகையில் அவளுடைய பெருங்குணத்தை சுட்டிக்காட்டி அவளைப் போல் துன்பங்களைத் தாங்கச் சொல்கிறார்.

பூமி தனக்குள் உலகையே அழித்து விடக்கூடிய உஷ்ணத்தை அடக்கிக் கொண்டு மேலே உயிர்களுக்கு துன்பம் விளைவிக்காமல் குளிர்ச்சியாய் இருப்பது போல், அடக்க முடியா கோபம் நம்முள் -பலரது கீழ்மையைக் கண்டு -பொங்கும் போதும் அதை தாங்கிக் கொள்ள வேண்டியதாகிறது. நியாயமான கோபமே ஆனாலும் எல்லா சந்தர்பங்களிலும் அதை வெளிப்படுத்த முடியாது, கூடாது. வெளிப்படுத்தினால் நன்மை உண்டாகாமல் போகலாம்.

எப்படி எல்லா வியாதிகளுக்கும் மருந்து கண்டுபிடிக்கப் படவில்லையோ அது போல மனிதர்களின் எல்லையில்லா கீழ்மைக்கும் பரிகாரம் கிடையாது. அவர்கள் நம் மேலதிகாரியாய் இருக்கலாம், சம்பளம் தரும் முதலாளியாகலாம் அல்லது தெருவில் திரியும் போக்கிரியாக இருக்கலாம். விவேகமுள்ளவர்கள் பல சமயங்களில் அவர்களை பொறுத்துக் கொள்வதே யாவருக்கும் நன்மைதரும் என்ற கருத்தில் அமைதி காப்பர்.

எனது மொழியாக்க முயற்சி:

பிணிகளுக்கு எல்லாம் மருந்து கண்டவர் ஏது?
மனிதர்தம் கீழ்மைக்கு எல்லாம் தீர்வும் ஏது?
தண்மையுடன் பற்கடித்து பொறு, அவ்வப்போது;
தணியா வெம்மை அடக்கிய பூமிபோல- மக்குத் திம்மா

Patience serves as a protection against wrongs as clothes do against cold. For if you put on more clothes as the cold increases, it will have no power to hurt you. So in like manner you must grow in patience when you meet with great wrongs, and they will then be powerless to vex your mind.
- Leonardo da Vinci, painter, engineer, musician, and scientist (1452-1519)

பொறுத்திருந்தால் புல்லும் பாலாகும் - சரண்சிங்

----------------------

புத்தாண்டு வாழ்த்து

2010-12-29T08:28:00.000-08:00

இடுகம்பாளையம் ஆஞ்சநேயர் கோவில் சுவரில் காணப்பட்ட “வாழ்க்கைக் கணக்கே” புது வருட வாழ்த்தாக வாசக அன்பர்களுக்கு சமர்ப்பிக்கிறேன். யாவருக்கும் மகிழ்ச்சி தரும் வருடமாக 2011 இருக்கட்டும் என்று பிரார்த்திக்கிறேன்

(படத்தை சுட்டினால் பெரியதாக தெரியும் )

அன்புடன்

கபீரன்பன்

ஆப்பிரிக்க ஆக்கிரமணம்

2010-10-12T17:18:00.000-07:00

[picture courtesy en-wikipedia ]

பெங்களூரில் இப்போது எங்கு பார்த்தாலும் இந்த ஆரஞ்சு வர்ணப்பூக்கள் இறைந்து கிடக்கின்றது. சாலை ஓரங்களில் நிழலுக்காகவும் அழகுக்காகவும் நடப்பட்ட இம்மரங்கள் துப்புறவுத் தொழிலாளர்களுக்கும் பல இல்லத்தரசிகளுக்கும் பெரும் தலைவேதனை.

வருடத்திற்கு இருமுறை பூக்கும், ஜனவரி -மார்ச்; செப்டம்பர்- நவம்பெர். இம்மரத்தின் பூக்கள் அளவில் செம்பருத்திப்பூ போல பெரிதாக இருக்கும்.

மரம் முப்பது அடிக்கும் மேல் உயரம் எட்டுவதால் பல வீட்டு மாடிகளிலும் இதன் பூக்கள் கொட்டிக்கிடக்கும். அதை கவனிக்காமல் விட்டால் மழைநீர் குழாய்களை அடைத்துக் கொண்டு மாடியில் நீர் தேங்க ஆரம்பித்துவிடும். இதனால் சுவரில் நீர் கசிந்து உட்சுவர்களில் ஈரம் படர ஆரம்பிக்கும்.

சரி வாசனையாவது உண்டா என்றால் அதுவும் இல்லை. பூஜைக்கும் பயன்படுவதில்லை. இது என்ன மரம் என்ற தேடலில் ஈடுபட்ட போது கிடைத்த சில தகவல்கள்.

இதன் பெயர் ஆப்பிரிக்கன் டூலிப் (African tulip ; spathodea campanulata). கன்னடத்தில் இதை "நீர்காயி மர" என்றும் சொல்வார்கள். மொட்டுகளுக்குள் நீர் நிரம்பி அதை அழுத்தினால் பீச்சியடிக்கும் குணம் உடையதால் அந்த பெயர். தமிழில் பட்டாடி (patadi) என்பதாகக் கண்டேன்

மரத்தின் விதைகள் அளவில் மிகச் சிறியன. ஒரு கிலோ விதையில் 129000 லிருந்து 300000 விதைகள் வரை இருக்கக்கூடுமாம். காற்றின் மூலம் விதைகள் எளிதாக பரவி விடும். இதில் உள்ள தேனை தேன் சிட்டு, எறும்புகள், தேனீக்கள் தேடி வருமாம். இதன் மகரந்தத்தில் உள்ள நச்சுத்தன்மையால் சில பூச்சிகள் மடிந்து போகுமாம்.

ஆப்பிரிக்காவில் இதன் விதைகளை உணவாகப் பயன் படுத்துகின்றனராம். அதேசமயம் அதில் உள்ள ஒரு நச்சுத்தன்மையை வெந்நீரில் கொதிக்க வைத்துப் பிரித்து மிருகங்களை வேட்டையாட அம்பின் நுனியில் காயவைத்து பயன்படுத்துவது உண்டு.

ஆப்பிரிக்க பழங்குடியினர் இதை மருந்தாகவும் பயன்படுத்துகின்றனராம். காய்ச்சல், நீரிழிவு நோய்களுக்கு மரத்தின் பட்டையை கொதிக்க வைத்து பயன்படுத்தலாம். தற்போது இதன் இலைகளிலிருந்தும் பூக்களிலிருந்தும் பிரிக்கப்படும் சில மூலக்கூறுகளுக்கு சரும வியாதிகளையும் புண்களையும் ஆற்றும் சக்தி உண்டு என்று கண்டறிந்துள்ளனர். ஆரம்ப நிலை மலேரியாவைத் தடுக்க மரப்பட்டையின் கஷாயம் வெகுவாக உதவுகிறது சமீபத்திய விஞ்ஞான சோதனைகள் தெரிவிக்கின்றன.

இந்த மரம் மிகவும் எளிதாக முறிந்து விழக்கூடியது. அதிகக் காற்றால் முறிந்து விழும் இதன் கிளைகள் பெங்களூர் வாகன நெரிசலில் நொந்து கிடக்கும் மக்களை மேலும் நோகச் செய்கிறது. அது அடுப்பெரிக்கக் கூட பயன் படுவதில்லை. எளிதில் தீப்பிடிக்காது.

ஆப்பிரிக்கன் டுலிப் என்ற இந்த மரத்தைக் கண்டு பல நாடுகள் மிகவும் பயப்படுகின்றன. வேகமாக பரவக்கூடிய தன்மையால் பிற மர வளங்களை அழித்து விடும் அபாயம் உண்டு என்று ஆஸ்திரேலியா, ஃபிஜி, ஹவாய், பிரேஜில் போன்ற நாடுகளில் இதன் பரவலைத் தடுக்க முன்னேற்பாடுகள் செய்து வருகின்றனர்.

நம்மவர்கள் என்ன செய்யப் போகிறார்கள்?. அதன் பயன்களை எண்ணிப்பார்த்து முறையாக பயன்படுத்திக் கொள்ள திட்டங்கள் வகுப்பார்களா அல்லது பிற மரங்களை அழிக்கும் வரை வேடிக்கைப் பார்ப்பார்களா ?

பழைய வேர் புதுத் தளிர்

2010-09-30T02:19:00.000-07:00

நூறு வருடங்களுக்கு மேலான சர்வகலாசாலைக்கு புதுப்புது மாணவர்கள் வந்து கொண்டே இருக்கிறார்கள். அதனுடைய நூறு வருட பாரம்பரியத்தில் அனைவருக்கும் பெருமிதம். பழம் பெரும் நிறுவனம் ஒன்றில் வேலைக்கு சேரும் பொழுது புது தொழிலாளிக்கு ஒரு கூடுதல் பொறுப்பு. அதன் பெருமைக்கு களங்கம் வராதவாறு பணியாற்ற வேண்டும்.

[படம் நன்றி : இண்டியா பிக்ஸ் டாட் காம் ]

வெள்ளி விழா, பவழ விழா எல்லாம் கொண்டாடுவதும் இதை நினைவூட்டத்தானே. நமக்கென்று ஒரு வேர் இருக்கிறது. அது கலாசாரத்தின் ஆழத்திலிருந்து மனிதர்களை நல்வழிப் படுத்திக் கொண்டே இருக்கிறது.

ஏதோ ஒரு காரணத்தினால் இலைகளை பூஞ்சான் நோய் தாக்கினாலும் பெரிய மரம் அவற்றை உதிர்த்து விட்டு மீண்டும் புதிதாக தளிர் விடத் தொடங்குகிறது. அப்படி உயிர்த்து வரும் புது நம்பிக்கை ’மரத்தின் ஆழமான வேர்களால் அல்லவோ’ என்று DVG இந்த இடுகையின் பாடலில் விளக்குகிறார்.

புதுத்தளிரும் பழவேரும் மரத்திற் கழகு
புதுயுக்தி பழந்தத்துவம் வாழ்நெறிக் கழகு
புதுஞானம் மெய்ஞானம் இணைதலு மழகு
இதுமேன்மை மனிதருக்கே- மக்குத் திம்மா

(பழவேர் = பழமையான வேர்)

மனித குலத்துக்கு புதுப்புது விஞ்ஞானக் கண்டுபிடிப்புகளும் அவசியம். அவை புதுத் தளிர் போல. சூரிய ஒளியிலிருந்து இலைகள் எப்படி ஒளிசக்தியை மரத்திற்கான ஊட்டச் சத்தாக மாற்றுகின்றனவோ அப்படி புது யுக்திகள் நம் வாழ்க்கையை உயிர்ப்புடனும் துடிப்புடனும் இயங்கச் செய்கின்றன. ஆனால் அதற்கு அந்த சக்தியை வழங்குவது மரத்தின் ஆழமான வேர்கள் என்பதையும் மறக்கலாகாது. ஆன்மீகத்தின் மூலம் கண்டறியப்பட்ட அற நெறி வாழ்க்கையையும் கை விட்டு விடலாகாது. எப்போதும் பழமையுடன் புதுமை கலந்து இயங்குவதே மனிதகுலத்துக்கு மேன்மை தரும் என்று குறிப்பிட்டுச் சொல்கிறார் DVG.

கீழே உள்ள பழைய மரத்தில் ஒரு சிற்பி பல்விதமான பறவைகள், மிருகங்கள், ஊர்வன செதுக்கி இருக்கி இருக்கிறான். உங்களால் எவ்வளவு கண்டு பிடிக்க முடியும் என்று முயற்சி செய்யுங்கள். பழமையில் புதுமை !!

இது தெற்கு ஆப்பிரிக்காவில் இருக்கும் பழைய மரம். பெரிய படத்தைக் காண இங்கே சுட்டவும்.

தமிழ் வளர்க்கத் தோள் ( வலைப்பூ) கொடுங்கள்

2010-08-26T02:26:00.000-07:00

தமிழ் கருவூலம் என்கிற தலைப்பில் எளிய அரிய கருத்துகளை வாசகர்களுக்கு விட்ஜெட் மூலமாக படிக்கச் செய்யும் விட்ஜெட் பொறிகளைத் தயாரிக்கும் முயற்சியை சிறிது காலமாக செய்து வருகிறேன்.

இது அப்படியொன்றும் பிரம்மவித்தையல்ல. :) கொஞ்சம் நேரம் ஒதுக்க வேண்டும் அவ்வளவுதான்.

முதுமொழி காஞ்சி, உலகநீதி, பராபரக்கண்ணி இப்போது தயார்.

(மேலுள்ள இணைப்பைச் சுட்டினால் முழு விவரங்களும் அறியலாம்)

கடந்த ஒரு வருட காலமாக பரிசோதித்து இணைப்பில் அவ்வப்போது வந்த பல குறைகளை களைந்து வெளியிடுகிறேன்.

மேலும் சிலவற்றை செய்யும் முன் விவரம் அறிந்த வாசகர்களின் கருத்தை அறிந்து சீர்படுத்த விழைகிறேன். இந்த விட்ஜெட்களை தங்கள் igoogle பக்கத்திலோ அல்லது வலைப்பூக்களிலோ பொருத்தி வாசகர்களுக்கு பயன்படுமாறு செய்யலாம்.

[படத்தை சுட்டி பெரிதாக்கி பார்க்கலாம்]

நம் வலைப்பூவின் அமைப்புக்கு ஏற்ப உயர அகலங்களை மாற்றிக் கொள்ள கூகிள் வகை செய்கிறது. அதற்கான விவரங்களும் மேலே கொடுக்கப்பட்ட இணைப்பில் உள்ளது.

ஸ்ரீ ரமணரின் உபதேச சாரத்தையும் தமிழ் பொருளுடன் தருவதற்கும் முயற்சி செய்திருக்கிறேன். [ http://tinyurl.com/ramanawidget ]. இது தினம் ஒரு கருத்தாக முப்பது பாடல்களையும் முப்பது நாட்களில் படிக்க வகை செய்கிறது. மனப்பாடம் செய்ய விரும்புவர்களுக்கு igoogle-ல் பொருத்திக் கொள்வது பயனளிக்கும்.

தட்டச்சுப் பிழை, பொருட்பிழை போன்ற தவறுகளை சுட்டிக்காட்டினால் திருத்திக் கொள்ள உதவியாக இருக்கும். அப்படியே விட்ஜெட்டை பொருத்தியபின் அதை பின்னூட்டத்திலோ தனிமடலிலோ தெரிவித்தால் மகிழ்வேன்.

கறையான் புற்றில் பாம்பு

2010-07-29T17:20:00.000-07:00

(Thanks :photo courtesy :http://www.johnbutlerart.com)

மக்குத்திம்மன் கவிதைகள் # 302

இயற்கையின் விந்தைகளை எழுதித் தீராது.

கறையான்கள் கட்டும் புற்றுகள் பெரும் மழையிலும் காற்றிலும் எப்படிக் கரையாமல் உறுதியாக நிற்கின்றன ? அவைகளின் உமிழ்நீரில் வரும் அந்த பசைக்கு மண்ணை உறுதியாக பிணைக்கும் சக்திதான் என்ன !! அடிப்பக்கம் பெரிதாகவும் மேலே செல்லச் செல்ல குறுகியும், எத்தனை வருடங்கள் ஆயின்ம் நிலைபெயராத வகையில் அமைக்கும் கட்டிட வல்லமையை எப்படிப் பெற்றன? மனிதர்களை வெட்கப்படச் செய்யும் இணைந்து தொழிலாற்றும் ஒற்றுமையை எப்படிக் கற்றுக்கொண்டன ? கேள்விகள் நீண்டு கொண்டே போகின்றன.

அதே படைப்பில் காக்கையின் கூட்டில் முட்டையிடும் குயிலையும், கறையான் கட்டிய புற்றில் பாம்புகள் குடி போவதையும் காண்கிறோம். ஒரு சில ஜீவன்களுக்கு கொடுக்கப்பட்டத் திறமை ஏன் எல்லா ஜீவன்களுக்கும் ஒரே அளவில் கொடுக்கப்படவில்லை?

இப்படி ஏகப்பட்ட கேள்விகளுக்கு விடைகிடைக்காது. அப்படியே மனிதர்களிடையே உள்ள வேறுபாடுகளுக்கும் யாரும் விடைகாண முடியாது என்பதை மக்கு திம்மனின் இந்த பாடலில் காணலாம்.

சிறுசிறுத் துகளாய் கறையான் மண்சுமக்கும்
பெரு முனைப்புடனே அவைதம் புற்றமைக்கும்
கருநாக மொன்று அதிலே குடியேறும் -உழைப்போர்
பெருவாரி கதையிதுவே -மக்குத் திம்மா

இந்த பாடலின் உட்கருத்தாக DVG என்ன சொல்ல விழைகிறார் என்ற கேள்வி எழலாம். எனக்கு புரிந்த வகையில் சொல்வதனால்

‘உன் கடமை ஆற்றிக்கொண்டு இரு; பலன்களை கணக்குப் பார்க்காதே. ஏதோ ஒரு பெரிய காரணத்தால் நமக்கு விளங்காத வகையில் தெய்வம் தன் விருப்பத்தை நடத்திக் கொண்டு செல்கிறது. அப்படிப்பட்ட முரண்பாடுகள் கறையான் - பாம்பு போன்று இயற்கையிலும் உண்டு. எனவே ஒருவர் தன் உழைப்புக்கேற்ற பலன் கிடைக்கவில்லை என்றோ அடுத்தவன் தன் உழைப்பைத் திருடிவிட்டான் என்றோ புலம்பிக் கொண்டிருப்பதில் பயனில்லை என்ற உண்மை புரிந்தால் மகிழ்ச்சியை இழக்காமல் இருக்கலாம்”

என்பதே ஆகும்.

மொழியாக்க முயற்சி 2

துகள்துகளாய் கறையான் எறும்புகள் மண்ணைச் சுமக்கும்
பகலிரவாய் பூசி உழைத்துத் தம்கூடு சமைக்கும்
புகுமொரு விடசர்ப்பம் தன் புற்றாய் அதைக் கொள்ளும்
வெகுமனிதர் உழைப்பின் கதையிது -மக்குத் திம்மா

மக்குத்திம்மன் கவிதைகள் (2)

2010-06-27T19:42:00.000-07:00

1920-ல் ஆசியாவிலேயே மிகப்பெரிய அணை எனக் கருதப்பட்ட கிருஷ்ணராஜ சாகர் அணை மைசூர் அருகே கட்டப்பட்டு வந்தது. அதன் தலைமை பொறிஞர் சர்.M.விஸ்வேசுவரய்யா ஊரூராக பயணம் செய்து சர்வே செய்ய வேண்டியிருந்தது. உணவகங்கள் இல்லாத அக்காலத்தில் சிறிய ஊர் ஒன்றில் அன்பர் ஒருவரின் வீட்டில் மதிய உணவு ஏற்பாடு ஆகியிருந்தது. மலர்ந்த முகத்துடன் சர் MV சாப்பிட்டு முடித்தார். அவருக்குப் பின் சாப்பிட்டவர்களுக்கு உணவில் உப்பின் அளவு அதிகமாகி விட்டிருந்தது தெரிந்தது. சமைத்தவர் மறந்து இருமுறை அள்ளிப் போட்டாரோ என்னமோ !

பின்னால் சர் MV யிடம் ’சாப்பிடும் போது ஏன் இதைச் சொல்லவே இல்லை’ என்று வினவியதும் ” ஒவ்வொரு நாள் ஒவ்வொரு மாதிரி இருக்கும், நமக்கு உணவின் ருசியா முக்கியம் “ என்று பதிலளித்தாராம்.

அவருக்கு இருந்த கடமை உணர்வு இன்றும் கர்நாடகமெங்கும் போற்றப்படுகிறது. அவருடைய நண்பர் ஒரு மாலையில் அவரை சந்தித்து உரையாட சென்ற போது அலுவல் கோப்புகளை பார்த்துக் கொண்டிருந்தார். அவரை அமரச் சொல்லி விட்டு மேலும் சிறிது நேரம் கோப்புகளில் கவனமாய் இருந்தார். வேலை முடிந்ததும் கோப்புகளை ஒரு ஓரமாக அடுக்கி, எரிந்து கொண்டிருந்த மெழுகுவர்த்தியை அணைத்து வேறொரு மெழுகுவர்த்தியைப் பற்ற வைத்து நண்பருடன் அளவளாவத் துவங்கினார்.

நண்பருக்கோ ஆச்சரியம். ’அதே மெழுகுவர்த்தி இருந்திருக்கலாமே’ என்று கேட்டார். “ அது அலுவல் காரியங்களுக்காக வாங்கப்பட்டிருப்பது. இப்போது எரிவது என் தனிப்பட்ட காரியங்களுக்காக நான் வாங்கி வைத்திருப்பது “ என்று விளக்கினாராம்.

பாரதத்தின் முதல் பாரத ரத்னா விருது வழங்கப்பட்டது விஸ்வேசுவரய்யாவுக்கு 1955-ல்

D.V.குண்டப்பா அவர்கள் சிறிது காலம் சர் எம்.விஸ்வேசுவரய்யாவுக்கு உதவியாளராக இருந்திருக்கிறார். அதன் தாக்கமோ என்னவோ மக்குத் திம்மனாகிய தனக்கு சொல்லிக் கொள்வது போல் அவர் சொல்லும் புத்திமதியை கேளுங்கள்.

சிரத்தையுடன் கருமம் செய்திடு, சிறிதெனாமல் |
பிரசாதமாய், கிடைத்ததை புசித்திடு முணகாமல்||
மறவாமல் மறைபொருளை, சுமந்திடு இகபாரம்|
புறப்படு கூப்பிட்டதும், அழாமலே -மக்குத்திம்மா||

(மறைபொருள் = வாழ்க்கையின் உட்பொருள், முக்திக்கான தேடல்)

மக்கு திம்மன் கவிதைகள்

2010-05-30T06:59:00.000-07:00

தேவனஹள்ளி வெங்கடரமணய்யா குண்டப்பா-வை தெரிந்திருக்க வேண்டிய அவசியம் உங்களுக்கு இருந்திருக்காது. அவரையே D.V. குண்டப்பா என்ற பெயரில் சிலர்- குறிப்பாக கர்நாடகவாசிகள் -கேட்டிருக்கக்கூடும். அவரை DVG என்று சுருக்கமாகவும் குறிப்பிடுவர் (1889-1975).

பத்தாவது வகுப்பிற்குப் பின், வறுமை காரணமாக அவருக்கு படிப்பைத் தொடரமுடியவில்லை. உலகமே பள்ளிக் கூடமாயிற்று குண்டப்பாவிற்கு. சுயமுயற்சியில் கன்னடம் ஆங்கிலம் மற்றும் வடமொழி கற்று அவைகளில் மிக உயர்வான தேர்ச்சி அடைந்திருந்தார். அவருக்கு பத்திரிக்கைத் துறைப் பிடித்திருந்தது. ஒரு வருட காலம் ஒரு கன்னட பத்திரிக்கையில் வேலை செய்த பின்னர் தானே Karnataka என்னும் பெயரில் ஆங்கிலப் பத்திரிக்கை நடத்தினார். அது அவரது நேர்மைக்கும் நடுநிலைமைக்கும் பெயர் வாங்கித்தந்தது. அவர் கர்நாடக பத்திரிக்கையாளர் சங்கத்தில் 1928 -ல் ஆற்றிய உரை இன்றும் இளம் பத்திரிக்கையாளர்களுக்கும் எழுத்தாளர்களுக்கும் மிகவும் பொருந்தும் என்று சொல்லப்படுகிறது.

அவர் எழுதிய கோபாலகிருஷ்ண கோகலேயின் வாழ்க்கை வரலாறு மற்றும் திவான் ரங்காசார்லுவின் வரலாறு தகவல்களைத் திரட்டுவதில் அவருக்கு இருந்த முனைப்புக்கும், எழுத்தாற்றலுக்கும் எடுத்துக்காட்டு என்பர். (திவான் ரங்காசார்லு மைசூர் சமஸ்தானத்தை ஒரு முற்போக்கு சமஸ்தானமாக மாற்றிய பெருமை உடையவர். டிவிஜி பிறப்பதற்கு நான்கு வருடம் முன்பே அவர் இயற்கையெய்தினார்).

இதைத் தவிர ஓமர் கயாம்-ன் கவிதைகளையும் ஷேக்ஸ்பியரின் மேக்பெத்தையும் கன்னட மொழிக்கு மொழி பெயர்த்திருக்கிறார். அவர் அறுபத்து ஐந்து புத்தகங்கள் எழுதியுள்ளார். அவரது ஸ்ரீமத் பகவத்கீதா தாத்பர்யம் என்னும் விளக்க நூல் 1976 ல் சாகித்ய அகடெமி விருது பெற்றது

இன்று கன்னட சாகித்ய உலகம் அவரை நினைவு கூர்வது அவரது மகத்தான 'மன்கு திம்மன கக்கா'(Mankuthimmana Kagga) எனப்படும் தத்துவக் களஞ்சியத்திற்காகத்தான். எளிய சந்தத்தில் சாமானியனுக்கும் புரியும் வகையில் வாழ்க்கையின் மேடு பள்ளங்களை சமபாவனையில் எதிர் கொள்ள அவர் எழுதியிருக்கும் இந்த செய்யுள்கள் கன்னட பகவத்கீதை என்று போற்றப் படுகிறது. 935 பாடல்கள் கொண்டது. 1943-ல் இதன் முதற்பதிப்பு வெளிவந்தது. இதுவரை பதினான்கு பதிப்புகள் வெளியாகியுள்ளன.

(photo courtesy : www.sssglobal.org)

Foggy fool's farrago என்றுதான் தன் மக்கு திம்மனை (கன்னடத்தில் மன்கு என்றால் மக்கு,மந்தபுத்தி என்று பொருள்) குண்டப்பா வருணிக்கிறார். திம்மா என்பது திம்மப்பா அல்லது திம்மையா என்ற கற்பனை நாயகனை சுருக்கி அழைக்கும் பெயர்.

அவருடைய மக்கு திம்மனுக்கு ஞானபீட விருது கிடைக்காதப் பொழுது பலரும் கர்நாடகத்தில் பெரிய ஏமாற்றத்திற்குள்ளாகி விருதைத் தீர்மானிக்கும் குழு அங்கத்தினர்களை குறை கூற முற்பட்டனர். அப்போது அவர் நண்பர் ஒருவருக்கு எழுதிய கடிதம் அவர் மனதில் எவ்வளவு உயர்ந்தவர் என்பதை உணர்த்திற்று. பன்மொழி இலக்கியங்களை ஒரே தராசில் அளவிட முடியாது என்பதையும் விருதுகள்தாம் எழுத்தாளனின் படைப்பு ஏற்றுக் கொள்ளப்பட்டதற்கு அடையாளம் என்று நினைப்பது தவறாகும் என்பதையும் சுட்டிக்காட்டினார். எழுத்தாளனின் படைப்பின் சிறப்பை நிர்ணயிப்பது காலம் ஒன்றே என்பதால் மக்கு திம்மன், காலம் நிர்ணயித்தபடி மக்கள் மனதில் வாழட்டும் என்று கூறினாராம்.

இன்று ஆன்மீகத் துறையிலும் இலக்கியத்துறையிலும் அவருடைய மக்கு திம்மன் ஆராய்ச்சிக்கான பொருளாகி விட்டான். R.K. லக்ஷ்மண் அவர்களுடைய "காமன் மேன்", கார்ட்டூன் உலகில் எப்படிப் பிரசித்தமோ அப்படி கர்நாடகத்தில் கன்னடம் படித்த யாவருக்கும் மன்கு திம்மன் பிரசித்தம்.

மக்கு திம்மனை மேற்கோள் காட்டாத ஆன்மீக உரையாளர்களே இன்று இருக்கமுடியாது. "baaLu jatka bandi" (பிழைப்பு ஜட்கா வண்டி) என்கிற பாடல் மிகவும் புகழ் பெற்றது. சின்மையா மிஷனை சேர்ந்த சுவாமி பிரம்மானந்தாவின் "மக்கு திம்மன்" பற்றிய விளக்கவுரைகள் குறுந்தகடுகளாக வெளிவந்துள்ளன. டாக்டர் ஆர். கணேஷ் என்ற பிரபல ஆன்மீக விரிவுரையாளரும் திம்மனைப் பற்றிய குறுந்தகடுகள் வெளியிட்டுள்ளார்.

தனக்கென்று செல்வம் ஈட்டுவதில் குண்டப்பாவிற்கு ஆர்வம் இருக்கவில்லை. கர்நாடக அரசு அவருக்கு அளிக்க முன்வந்த ஓய்வு ஊதியத்தை அவர் மறுத்து விட்டார். இலக்கிய சேவைக்காக அவருக்கு 1970ல் அளிக்கப்பட்ட ஒரு லட்ச ரூபாய் பணமுடிப்பை அவர் சமூகப் பணிக்கென கொடுத்து விட்டார்.

பெங்களூர் பசவன்குடியில் கோகலே இன்ஸ்டிட்யூட் (Gokhale Institute of Public Affairs) என்பது திரு டிவிஜி அவர்களால் துவக்கப்பட்டு இன்று மிகப்பெரும் இலக்கிய சேவையிலும் சமூக சேவையிலும் ஈடுபட்டுள்ளது. 1974 இந்திய அரசாங்கம் அவருக்கு பத்மபூஷண் விருது அளித்து கௌரவித்தது.

மக்குதிம்மன் பாடல்களின் சில மாதிரி :

சரியாகவில்லை அது, சரியில்லை இதுவென்று
பஞ்சணையில் முள் பரப்ப வேண்டாம்.
நிறைவாகும் ஒன்று, குறையாகும் இன்னொன்று
வாழ்க்கையில் என்றும் முரண் உண்டு -மக்குதிம்மா

அன்னப் பசியினும் சொன்னப்பசி தீவிரம்
சொன்னப் பசியினும் ஆண்பெண் உறவாம்
மன்னு புகழாசை யாவினும் தீவிரம்
தின்னு மவர் நெஞ்சம் -மக்குதிம்மா
(சொன்னம்=சொர்ணம், பொருளாசை)

வானி லுண்டோ பறவைக்கு வரைபடம்
மீனுக் குண்டோ நீந்திட வரையறை
ஏனோ வொன்று தள்ளுது ஒன்றிழுக்குது
நீனொரு காற்றிலாடும் பட்டம்- மக்குதிம்மா

நாளுக்கு நாள் கணத்திற்கு கணமாய்
நாளைய கவலை விட்டு வாழ்ந்திடு
விவரங்கள் தொகுப்பவன் வேறொருவன்
கழித்திடு உன் பிறவிதனை - மக்கு திம்மா

[கொசுறு: DVG பெங்களூரில் எங்களது பாட்டானாரின் வீட்டு பின் தெருவில் குடியிருந்தார் என்பதும் எங்களது பாட்டனாருக்கு நல்ல நண்பர் என்றும் அவ்வப்போது அவரது கையெழுத்துப் பிரதிகளை எனது பாட்டனார் சரி பார்த்துக் கொடுத்திருக்கிறார் என்பதை என் தந்தை வழியாக சமீபத்தில் அறிந்த போது பெருமையாக இருக்கிறது.]

பசவனகுடி, ப்யூகல் ராக் பூங்காவில் டிவிஜிக்கு வைக்கப்பட்டிருக்கும் சிலை. அவர் வாழ்ந்த காலத்தில் அவர் மாலை வேளைகளில் நண்பர்களோடு உரையாட மிகவும் விரும்பிய இடம் என்பதால் அதே இடத்தில் அவருக்கு சிலை வைக்கப்பட்டிருக்கிறது.

கரி வாங்கலியோ.....கரி

2010-05-03T17:54:00.000-07:00

பங்குச் சந்தை போல் உருவாகி வரும் கரி-மாற்று (Carbon exchange) வியாபாரத்தைப் பற்றிய சிறு அறிமுகம்.

கார்பன் டிரேடிங் என்பது சமீபகாலமாக புழக்கத்தில் இருக்கும் ஒரு சொல். நான் இதை கரி வியாபாரம் என்று சுருக்கமாக தமிழ்படுத்திக் கொள்கிறேன். வேண்டுமானால் சர்வதேச கரி-மாற்று வாணிகம் என்றும் வைத்துக் கொள்ளலாம் :))

கூடிவரும் புவி வெப்பம், கடல் மட்ட உயர்வு, உருகும் பனிப்பாறைகள், காற்றில் கரியமலவாயு அதிகரிப்பு, க்யோடோ தீர்மானங்கள் இத்யாதி போன்றவைகளுக்கும் இந்த கரி வியாபாரத்திற்கும் பெரிய தொடர்பு உண்டு.

க்யோட்டோ பற்றிய விவாதங்கள் செய்திகளாக வந்தபோது மனதின் மூலையில் ஏதோ ஒரு கூத்து நடந்து கொண்டிருக்கிறது என்ற எண்ணம் தோன்றிக் கொண்டிருந்தது. ஆனால் முழு உண்மையை புரிந்து கொள்ளாமல் எதைப் பற்றியும் விமர்சிக்கக் கூடாது என்ற எண்ணத்தால் வாளாவிருந்தாயிற்று.

சமீபத்தில் இவைகளைப் பற்றி வேறு ஒரு காரணத்திற்காக சற்று ஆழ்ந்து படிக்க நேர்ந்தது. அதன் விளைவே இந்த கட்டுரை. கட்டுரையின் முடிவில் ஏற்கனவே பாரபட்சமான கருத்துக் கொண்டிருந்ததால்தான் இப்படி முடித்திருக்கிறீர்கள் நீங்கள் குற்றம் சாட்டினால் அதையும் ஏற்றுக் கொள்கிறேன்.

முதற்படியாக மேற்கத்திய நாடுகள்- குறிப்பாக அமெரிக்கா மற்றும் ஐரோப்பிய நாடுகள்- விஞ்ஞானிகள் மற்றும் சுற்றுச் சூழல் ஆர்வலர்களின் கூக்குரலுக்கு செவிசாய்த்து இந்த கரியமலவாயு அதிகரிப்பு கவலை தரக்கூடிய விஷயம் என்பதை ஏற்றுக் கொண்டு இதற்கு பரிகாரம் காண வேண்டும் என்பதையும் ஒப்புக் கொண்டுள்ளன.

ஒரு அமெரிக்கப் பிரஜை ஆண்டொன்றுக்கு 24 டன் கரியமலவாயு உற்பத்திக்கு காரணமாகிறான். அதுவே ஒரு சீனன் 4 டன் உற்பத்திக்கும் இந்தியன் 2 டன் உற்பத்திக்கும் காரணமாகிறான். உலக அளவில் நபருக்கு 6.2 டன் அளவை மிஞ்சாத வரைக்கும் சரியே என்ற கருத்து நிலவுகிறது.

இதன் மூலம் அமெரிக்கா இந்த சுற்றுசூழல் மாசுபாட்டுக்கு முக்கிய பொறுப்பு ஏற்க வேண்டியதாயிற்று.

இவ்வகை அளவீட்டை கார்பன் ஃபுட் பிரிண்ட் (Carbon foot print) என்கின்றனர். தமிழில் கரிமல-அடியொற்று அல்லது எளிமையாக ”கரியொற்று” என்று சொல்லலாம்.

புதுப்பிக்க இயலாத கச்சா எண்ணெய் மற்றும் நிலக்கரியை அதிகமான அளவில் பயன்படுத்தி வருவதால் இது அதிகமாகிவிட்டது. பல லட்சக்கணக்கான ஆண்டுகளில் பூமிக்கு அடியில் சேமிக்கப்பட்ட சூரிய சக்தி திடீரென்று நூறு வருடங்களுக்கு உள்ளாக எரிக்கப்பட்டு வெளிப்படும் போது காற்றில் கரிமல வாயுவின் அளவு கூடுகிறது.

பெரியவர்களெல்லாம் ஒரு வழியாக கூடி 1990 நிலவரப்படி வெளியிட்ட கரிமல அளவை வரும் ஐந்து ஆண்டுகளில் (2008-2012) 5.2 % குறைக்க வேண்டும் என்று தீர்மானித்தனர். ரஷ்யாவிற்கு குறைக்க வேண்டிய அவசியம் இல்லை. ஆஸ்திரேலியா 8% அதிகம் எரித்துக் கொள்ளலாம் ! ஏனெனில் இந்த நாடுகளில் கரியமல வெளிப்பாடு நபர் ஒருவருக்கு 6.2 டன் அளவை விட மிகக் குறைவாகவே இருக்கிறது.

விவரமாகச் சொன்னால் 2010 ற்கு எதிர்பார்க்கப்பட்ட அளவை வைத்துப் பார்த்தால் இது 29% குறைவாக வேண்டும். அதாவது ஆண்டொன்றுக்கு அமெரிக்கா 7%, ஐரோப்பிய நாடுகள் 8%, ஜப்பான் 6% என்ற அளவில் வருடா வருடம் குறைத்துக் கொண்டே போக வேண்டும்.

இதை ஒவ்வொரு நாட்டிலும் பெரும் நிறுவனங்கள் முதல் தனி பிரஜை வரை பொறுப்பெடுத்து செயலாற்ற வேண்டும்.

உதாரணமாக ஒருவர் வாரத்தில் சுமார் 100 கிமீ வீட்டிலிருந்து அலுவலகம் செல்ல தன் காரை பயன்படுத்தினால் அவரால் 1114 கிலோ கரிமம் ஒரு வருடத்தில் கூடுகிறது. அதுவே அவர் மோட்டார் சைக்கிள் மூலம் போனால் 364 கிலோவும் நகரப் பேருந்தில் சென்றால் 135 கிலோவும் கூடுவதற்கு காரணமாகிறார். நாளொன்றுக்கு 5 மணிநேரம் தொலைக்காட்சி பெட்டி வேலை செய்தால் வருடத்திற்கு 394 கிலோ அளவு கரிமலவாயு வெளியாகிறது.

இவற்றைக் கருத்தில் கொண்டு குடிமக்கள் தேவையற்ற எரிபொருள் செலவை குறைக்க முன்வந்தால் கரியொற்று அளவைக் குறைக்க முடியும்.

அதற்கான விழிப்புணர்வு உண்டாக்குவது அரசுகளின் கடமை. ஆனால் இது அவ்வளவு சுலபமானதா?

பணத்தை செலவழித்தே பழக்கப்பட்ட ஒருவனுக்கு செலவழிக்க கூடாது என்றால் எப்படி முடியாதோ இதுவும் அது போலத்தான்.

சரி, குறைக்க முடியாமல் போனால் என்ன தண்டனை?

கவலை வேண்டாம். குறைவாக பயன்படுத்துபவனிடம் பேசி ’என் கணக்கை அவனுடன் அட்ஜெஸ்ட் செய்து கொள்கிறேன்’ என்று சொல்லிக் கொள்ளலாம். இதற்காக ஏற்பட்டிருக்கும் அமைப்புதான் கரியமில-மாற்று அல்லது கரி-வணிகம். இன்றைய வணிக அளவு சுமார் 28000 கோடி ரூபாய்கள் என்று மதிப்பிடப்படுகிறது.

உதாரணமாக ஒரு தொழில் நிறுவனம் குறிப்பிட்ட அளவு கரியமிலவாயு வெளியேற்றத்தைக் குறைக்க முடியவில்லை என்று வைத்துக் கொள்வோம். இதற்கு ஈடு செய்வது எப்படி? காடு வளர்ப்பு திட்டம், மாசற்ற எரி சக்திகள் போன்ற திட்டங்களுக்கு நிதி உதவி செய்தல் மூலம் கரியமிலக் கணக்கை சரிகட்ட முடியும்.

சூரிய சக்தியில் இயங்கும் நூறு லிட்டர் சுடுநீர் வழங்கி வருடத்திற்கு 1.5 டன் கரியமில வாயு வெளியேற்றத்தைத் தடுக்கிறது.

அப்படி -வேறொருவன் நிறுவி-மிச்சப்பட்டக் கணக்கைக் காட்டி தமது அதிக பயன்பாட்டை சரிகட்டிக் கொள்வதே கரி வணிகத்தின் அடிப்படை. இதை Carbon Credit அல்லது CER (certified emission reduction ) என்பர். இதை அளவு கோலாகப் பயன்படுத்தி கரி-மாற்று வணிகம் நடைபெறும்.

இதில் முக்கிய அம்சம் என்னவென்றால் இந்த திட்டங்கள் ஒவ்வொன்றும் க்யோட்டோ முறைப்படி சர்வதேச அங்கீகாரம் பெற்றிருக்க வேண்டும். அதில் இடம் பெற ஏகப்பட்ட கட்டுபாடுகள், கண்காணிப்பு முறைகள், கரியமில வாயு வெளியேற்றத் தவிர்ப்பை உறுதி செய்யும் முறைகள் என பலப்பல கட்டங்களைத் தாண்ட வேண்டும்.

சொல்ல வேண்டுமா? உடனே உலகெங்கும் பெரிய நிறுவனங்களுக்கு ஆலோசனை வழங்க நிபுணர்கள் என்ற பெயரில் தரகர்கள் தயாராகி விட்டார்கள். எல்லா நாடுகளிலும் ஏஜெண்டுகளை நியமித்து பார்ட்டிகளை பிடிக்கும் முயற்சி நடந்து வருகிறது. இன்றைய நிலவரப்படி ஒரு டன் கரியமில வாயுவை சமன் செய்ய 13.88 அமெரிக்க டாலர் ( 17.5% VAT உட்பட) கட்டினால் போதும்.

ஒரு நிறுவனம் 1400 டன் கரியமல வாயு வெளியேற்றத்தை குறைக்க வேண்டிய நிர்பந்தத்தில் இருந்தால் அது செய்ய வேண்டியதெல்லாம் க்யோட்டோ அமைப்பின்படி ஒப்புதல் பெற்றிருக்கும் ஒரு திட்டத்திற்கு நிதி அளித்து அதில் தவிர்க்கப்பட்டதாகச் சொல்லப்படும் கரிமல வெளியேற்றத்தை தனது கணக்கில் காட்டினால் போதும். நிறுவனம் தொடர்ந்து தன் போக்கில் செயல்படலாம்.

இதில் ஒரு நல்ல விஷயம். இருபத்தைந்து சதவிகிதம் மட்டுமே வளரும் நாடுகளில் முதலீடு செய்யவோ சமன் செய்யவோ முடியும். மீதி 75%ஐ உள் நாட்டிலேயே குறைத்துக் காட்ட வேண்டும்.

இதனால் உலகெங்கும் காளான் போல சுற்றுச் சூழல் நிறுவனங்களும் தன்னார்வத் தொண்டு நிறுவனங்களும் போட்டி போட்டுக் கொண்டு மாசற்ற எரிசக்தி, மரம் வளர்ப்பு, எரிசக்தி சேமிப்பு என்ற வகையில் புது புது திட்டங்கள் தீட்டி அங்கீகாரத்திற்காக அனுப்பிய வண்ணம் உள்ளன.

டிமாண்ட்- சப்ளை போல, திட்டங்கள் அதிகம் இருந்தால் ஒரு டன்னுக்கான கரி-மாற்று விலை குறைவாக இருக்கும். திட்டங்கள் குறைவாக இருப்பின் டன்னுக்கான விலை அதிகமாகி விடும். இதையும் பங்கு சந்தை போல ஒரு சில குறிப்பிட்ட நாடுகள் அல்லது அங்கத்தினர்கள் பண பலத்தினால் தங்கள் நோக்கம் போல திசை திருப்ப முடியும்.

பொதுவாக டிசம்பர் மாதத்தில் விலைக் கூடுமென்றும் தமது CER ஐ விற்க நினைப்பவர்கள் காத்திருந்து விற்கலாம் என்றும் நிபுணர்கள் சொல்கிறார்கள். இந்த வருடக் கணக்கை -விற்கப்படாமல் இருக்கும் CER களை அடுத்த வருடத்தில் விற்க முடியுமா என்பது தெரியவில்லை.

இதில் தில்லுமுல்லுகள் நடக்க அதிக வாய்ப்புண்டு. எத்தனை திட்டங்கள் வெறும் காகிதத்தில் இருக்கப் போகின்றனவோ! அங்கங்கே இத்திட்டங்களுக்காக ஒதுக்கப்படும் நிதி மாயமாய் போய்விடும் சாத்தியக்கூறுகளும், வரிக்கணக்கை ஏய்ப்பதற்கான வாய்ப்புகளும் பெருகியுள்ளது.

கோடிகள் கை மாறுவதற்கு புது புது உக்திகள் தோன்றியுள்ளன. வல்லரசு நாடுகள் புத்தி ஜீவிகளின் வாயை அடக்க ஒரு புது வித கண் துடைப்பு நாடகத்தை ஆரம்பித்திருக்கிறார்கள். இன்னும் பத்து வருடங்கள் கழித்து இவையெதுவும் பலனளிக்க வில்லை என்று சொன்னால் ஆச்சரியப்படத் தேவையில்லை.

There is always another side for the coin. இப்படியாவது சில நல்ல திட்டங்கள் வரட்டுமே ! சொல்லிக் கொள்வதில் முப்பது நாற்பது சதம் உண்மையானலும் நல்லதே தானே செய்யும். ஏன் எல்லோரையும் ஏமாற்றுக் காரர்கள் என சந்தேகப் பட வேண்டும்.

எப்படியோ மக்கள் மனதில் விழிப்புணர்வு வந்தால் சரிதான் !

Write-Protect virus in pen drive

2010-04-30T18:14:00.000-07:00

சமீபத்தில் என்னுடைய pen drive ஐ ஒரு பொறியியல் கல்லூரி வளாகத்தில் பயன்படுத்திக் கொண்டிருக்கும் போது திடீரென்று ரைட்-ப்ரொடெக்ட் ஆகி விட்டது. அதன் காரணம் யாருக்கும் புரியவில்லை.

பெரும்பாலோர் இதை வைரஸ் என்று கூறினர். அதன் பின் பல நாட்கள் பல மென் பொருள் நிபுணர்களிடம் காட்டி பலவாறான வைரஸ் மென்பொருட்கள் மூலம் சிகிச்சைகள் மேற்கொள்ளப்பட்டன. புரியாத கோளாறாகவே இருந்தது.

சில வலைக் குழுமங்கள் இந்தப் பிரச்சனைக்கு பல்வேறு வழிகள் சொல்லியிருந்தன. ஒரு சில, புதிய மென்பொருளை நிறுவி பின்னர் வைரஸை ஒழிக்க வழி சொல்லின. பல புரியவில்லை, சில வேலை செய்யவில்லை. சரி format செய்து விடுவோம் என்றால் 'you don't have right to format' என்று திரும்பத் திரும்ப பூச்சாண்டிக் காட்டியது.

அப்போது ஒரு அன்பர் இதை லினக்ஸ்-ல் திறந்து பார்த்து format செய்து விடலாம் என்றார். நம்பிக்கைத் துளிர்த்தது. லினக்ஸ் பாஷை விண்டோஸ் வைரஸ்க்கு தெரியாதாமே! ஃபோல்டரை திறக்க முடிந்தது பார்க்க முடிந்தது. ஆனா formatting ?

அதிலேயும் மண். என்னங்க பாஷை வேறெ ஆயிட்டா வியாதி போயிடுமா ன்னு ஒருத்தர் கிண்டலும் பண்ணினார்.

சரி போச்சா 4 GB pen drive அப்படீன்னு வெறுத்து கிடந்த நேரத்துல ஒரு நாள் திடீரென்று சகோதரன் ’இந்தா format பண்ணியாச்சு’ ன்னு தூக்கி முன்னாடி போட்டான்.

பெங்களுர் டவுன் ஹால் அருகில் ஆந்திரா பாங் மாடியில் ஏதோ ஒரு நிறுவனம் இதை இலவச சேவையாக செய்வதாகச் சொன்னான். மனிதர்களின் வியாதிகளுக்கு இலவச வைத்தியம் பார்ப்பவரை தெய்வமென்போம். இவர்களையும் அந்த லிஸ்டில் சேர்க்க வேண்டியது தான் என எண்ணிக் கொண்டேன்.

பின்னர் ஒரு நாள் அதனுடைய job card ஐக் காண நேர்ந்தது. கேள்விப்பட்ட பெயராக இருக்கிறதே என்று பார்த்தால் Accel Frontline என்கிற பெரிய நிறுவனம் என்று புரிந்தது.

பெங்களூர் அன்பர்கள் தொடர்பு கொள்ள தொலைபேசி 41231496. அவர்கள் Transcend தயாரிப்புகளுக்கு இந்த சேவை தருவதாக சொல்லக் கேள்வி.

எல்லா தயாரிப்புகளுக்கும் பொருந்தக் கூடிய கை வைத்தியம் இருந்தா யாராவது சொல்லுங்க. புண்ணியமா போவும் ! ஏனென்றால் இந்த வியாதி திரும்பத் திரும்ப வரக்கூடியது.

தெய்வமா உங்களை வாசகர்கள் கும்பிடுவார்கள்.

நல்லாப் பாடுறே ! கொஞ்சம் உச்சரிப்பு....

2010-02-28T00:24:00.000-08:00

வண்ண மயமான விளக்குகள் ஒளியூட்டிய மேடையிலே உயிரைக் கொடுத்து “உயிரே உயிரே” என்று அந்த சிறுமி பாடி கொண்டிருக்கிறாள். பல லட்சம் ரூபாய் பெறுமான பரிசு என்றால் சும்மாவா!

“கேக்க சகிக்கில. சேனலை மாத்து” அப்படின்னு தம்பி. அவனுக்கு ஜேக்கி-சான் படம் பார்க்கணும்

ரிமோட்டை கையில பிடித்துக் கொண்டிருக்கும் அக்காவோ “போடா ஒனக்கு பாட்டு வராது, புரியாது....”

ஆமாமா, நீ மட்டும் பெரிசா பாடிக் கிளிச்சியாம். அந்த பாட்டு டீச்சர், ’சுருதியே சேரல உங்கப் பொண்ணுக்கு’அப்படீன்னு அம்மாகிட்ட மூஞ்சில் அடிச்ச மாதிரி சொல்லி அனுப்பிச்சாங்களே. எங்களுக்குத் தெரியாத உங்க பாட்டு லட்சணம்..

இது ஓயாத சண்டை. சண்டை நடுவில பாட்டை விட்டாச்சு, ஜட்ஜஸ் ரவுண்ட் வந்தாச்சு.

ஜட்ஜ் கள் அந்த சிறுமியை பார்த்து, ஒப்புக்காக

”நல்லா பாடினே, கொஞ்சம் மாடுலேஷன்ல கவனம் வேண்டும்”

”உன் காஸ்ட்யூம் சூபர், யூ ஹேவ் வொண்டர்புல் ப்ரஸன்ஸ். கொஞ்சம்..கொஞ்சம் உச்சரிப்பை சரியா பார்த்துகணும். வல்லினம் மெல்லினம் எல்லாம் தெளிவா இருக்கணும்.”

இத்யாதி இத்யாதி..

”தேங்க்யூ மேடம்.... ஓகே ஸர்... என்று சொல்லிக் கொண்டு வந்த டென்ஷன் சிறுமிக்கு தான் தேர்ந்தெடுக்கப் படவில்லை என்றதுமே அழுகை பொத்துக் கொண்டு வந்தது. அவளை விட அவள் தாயாருக்கு கோபம் அதிகமாயிற்று. அங்கேயே விவாதம் சூடு பரக்க ஆரம்பித்தது. சஸ்பென்ஸை தொடர்வதற்காக சேனல் தயாரிப்பாளர் பிரேக் கொடுத்தாரோ நாம பிழச்சோமோ :)))

இந்த மாதிரி நேரத்துலதான் நினைவுக்கு வருவார் சினா-சோனா.

IT IS DIFFICULT TO
ESTEEM A MAN
AS HIGHLY AS
HE WOULD
WISH

யாவருமே அவரவர் நினைப்பில் பெரிய ஆர்டிஸ்ட்தான், படிப்பாளிதான். ஆனால் பிறர் அதை அவ்வளவு சுலபமாக ஏற்றுக் கொண்டு விடுகிறார்களா என்ன ?

அதற்கான தகுதி, உழைப்பு, பொறுமை இவற்றை வளர்த்துக் கொள்ளாமல் அங்கீகாரத்திற்காக அவசரப்படும் போது பிறருடைய நகைப்பு ஆளாகி விடுகிறார்கள்.

இதைதான் ஆங்கிலத்தில் “sitting in his own ivory tower" என்கின்றனரோ! அப்போது வளர்ச்சி நின்று போகிறது.

வீரத்துறவியின் சலியா வழி

2010-01-12T05:08:00.000-08:00

இலக்கு ஒன்றை தேர்ந்திடு
இரவும் பகலும் உழைத்திடு

இலக்கு அதுவே வாழ்க்கை
இலக்கு அதுவே கனவாம்

நாடி நரம்பு மூச்செல்லாம்
நாடி நிற்கட்டும் நும் இலக்கு

அணுஅணுவும் உயிர்க்கட்டும்
அனுதினமும் உந்தன் இலக்கு

வெற்றிக்கு இல்லை வேறுவழி
பற்றுவோர்க்கு வெற்றியே, வாழி!

Take an idea, make that one idea your life; think of it, dream of it, live on idea. Let the brain muscles nerves everyy part of your body be full of that idea and just leave every other idea alone. This is the way to success. - swami vivekananda

இன்றைக்கு இளைஞர் தினமாகக் கொண்டாடப்படும் விவேகானந்தர் பிறந்தநாள் சமர்ப்பணம்.
(thanks to " ibibo.com” for picture courtesy)

மனம் விட்டு சிரியுங்கள்

2010-01-01T23:34:00.000-08:00

புது வருடம் சந்திர கிரகணத்தில் துவங்கியது. அடுத்து வரும் அமாவசையன்று -இன்னும் பதினைந்து நாளில் சூரிய கிரகணம் வேறாம். அடுத்தடுத்து இப்படி கிரகணங்கள் வருவது நல்லது இல்லையாம், பொழுது போகாதவர்கள் சொல்லிக் கொண்டு திரிகிறார்கள். ஆனால் இதை வைத்தே காமெடி பண்ண ஒருத்தருக்கு தெரிஞ்சிருக்கு [2002 லேயே :))]

புது வருடத்தை சந்தோஷமாக ஆரம்பிக்கலாமே என்று இந்த பதிவு. ஆங்கிலத்திலே இருந்தாலும் சிரிப்புக்கு பஞ்சமில்லை. இதை அனுப்பி வைத்த புண்ணியவான் வாழ்க.

[படத்தை சொடுக்கி முழுபக்கத்தில் திறந்து படிக்கவும். எஞ்சாய் ]

மக்குப் பையன் ஒருவன் கிரகணங்களைப் பற்றிப் படித்துக் கொண்டிருக்கிறான்.

What is eclipse of the moon ?
Shadow of earth on the moon is known as eclipse of the Moon

What is eclipse of the Sun ?
Shadow of moon on the sun is known as eclipse of the Sun.

எவ்வளவு முறை படித்தும் பாவம் பையனுக்கு எதனுடைய shadow எதன் மேல் என்பதில் குழப்பம் வந்து கொண்டே இருந்தது. moon... earth.... sun.. என்று மாற்றி மாற்றி உளறிக் கொண்டிருந்தான். பொறுமை இழந்த அவனுடைய தந்தை

வாட் ஈஸ் எக்ளிப்ஸ் ஆஃப் தெ எர்த் ? என்று கேட்டார்.

எக்ளிப்ஸ் ஆஃப் எர்த்தா ??? இன்னும் குழம்பிப் போனான் மக்குப் பையன்.

ஷேடோ ஆஃப் ஸன் ஆன் தெ எர்த்து " விளக்கினார் தந்தை

சன்னுக்கு ஷேடோவா ?

ஷேடோ ஆஃப் மை ஸன் (my son) ஆன் தெ எர்த்து என்று நொந்து போனார் மனிதர் :))))

{கன்னடத்து சாகித்ய உலகில் புகழ் வாய்ந்த D.P.கைலாஸம் அவர்களின் நகைச்சுவை துணுக்கு இது]

பாரதி மன்னிக்கட்டும்

2009-12-30T20:18:00.000-08:00

புத்தாண்டு வாழ்த்துகளைத் தெரிவிப்பதில் உள்ள ஆர்வம் சில சமயங்களில் உரிமை மீறல்களுக்கு வகை செய்து விடுகிறது. அவ்வகையில் பாரதியின் இப்பாடலை சிதைத்ததற்கு அவரிடம் மன்னிப்புக் கோரி வாசகர்கள் அனைவருக்கும் புத்தாண்டு நல்வாழ்த்துகளை தெரிவித்துக் கொள்கிறேன்.

[படத்தை சொடுக்கினால் பெரிய அளவில் தெரியும்]

World space க்கு என்ன ஆச்சு ?

2009-12-25T05:36:00.000-08:00

இன்றைக்கு மின் அஞ்சலில் வந்த செய்தி :

//This action is an outgrowth of the financial difficulties facing WorldSpace India's parent company, WorldSpace, Inc., which has been under bankruptcy protection since October 2008. The potential buyer of much of WorldSpace's global assets has decided not to buy the WorldSpace assets relating to and supporting WorldSpace's subscription business in India. As a consequence, WorldSpace, Inc. must discontinue its subscriber business in India. Your subscription contract is with WorldSpace, Inc., a US company that is in a bankruptcy proceeding in the United States. The company recognizes that you may have paid for services to be rendered beyond the termination date, but is not in a position to offer a refund for any unused portion of your subscription. //

ஒரு தரமான வானொலி ஒலிபரப்பு, விளம்பர தொல்லைகள் இல்லாமல் வந்து கொண்டிருந்தது.

இப்போது அதில் மண் ! :((

ஜஸ்பால் பட்டி ”FLOP SHOw”என்கிற தூர்தர்ஷன் தொடரில் வேலை செய்யாத BSNL தொலை பேசி மேல் துண்டைப் போட்டு ”மர்கயே.. மர்கயே” என்று காமெடி பண்ணினது போல நாமும் நம்முடைய அந்த ரேடியோ மேல் துண்டைப் போட்டு துக்கம் அனுஷ்டிக்க வேண்டியது தான்.

மிகப் பிரபலமான திரைப்படப் பாடலை வைத்து தொலைப்பேசியை நையாண்டி செய்து இருப்பதை இங்கே கேட்டு மகிழுங்கள்

கடவுளுடன் ஒரு அரட்டை

2009-12-02T03:27:00.000-08:00

கணிணியில் மிக மும்முரமாக ஏதோ வேலையில் ஈடுபட்டிருந்த போது டண் என்று அரட்டைக்கான அழைப்பு மணி அழைத்தது.

hello ,did you call me ?

Called you? No. Who is this?

this is God, i heard your prayers; so i thought i will chat

( அரட்டை இனி தமிழில் தொடரும்)

நான்: கடவுளை கும்பிடுவதுண்டு. ஒரு நல்ல காரியம் செய்த திருப்தி அவ்வளவுதான். இப்பொழுது ஒரு முக்கியமான காரியமாக இருக்கிறேன்.
கடவுள்: என்ன காரியம்? எறும்புகள் கூடத்தான் காரியமாக இருக்கும்.

நான்: சரியாக சொல்லமுடியவில்லை. ஆனால் நேரமே இருப்பதில்லை. எப்போதும் ஓட்டம் தான்
கடவுள்: ஆமாம். காரியமென்றால் (activity) முடியாது. உற்பத்தியானால் (productivity) முடியும். காரியம் நேரத்தை தின்று விடும். உழைப்பு நேரத்தை மிச்சமாக்கும்

நான்: புரிகிறது. ஆனால் எப்படி என்று தெரியவில்லை. இந்த நேரத்தில் உம்மை அரட்டை பெட்டியில் எதிர்பார்க்கவில்லை
கடவுள்: போகட்டும்.நேரத்திற்கான போராட்டத்தை பற்றி உனக்கு சிறிது புரியவைக்கலாமென்று தோன்றியது. இந்த மின்னல்வேக கணிணி யுகத்தில் உனக்கு வசதிப்படும் வகையிலேயே பேசலாமே என்றுதான் வந்தேன்.

நான்:நீங்களே சொல்லுங்கள். இப்போது வாழ்க்கை ஏன் குழப்பமானதாக இருக்கிறது ?
கடவுள் : ஆராய்வதை விட்டு விடு. வாழத் தொடங்கு. ஆராய்வது தான் குழப்பத்தை உண்டாக்குகிறது.

நான்: அப்படியானால் ஏன் எல்லோரும் சந்தோஷமின்றி இருக்கின்றனர் ?
கடவுள்: இன்று என்பது நேற்று நீ கவலைப்பட்ட ’நாளை’. உன்னுடைய கவலைக்குக் காரணம் நீ ஆராயமுற்படுவதுதான். ஆகையால் நீ சந்தோஷம் இல்லாமல் இருக்கிறாய். அதுவே உன் பழக்கமாகி விட்டது

நான்: நிச்சயமற்ற தன்மை இவ்வளவு இருக்கும்போது எப்படி கவலைப் படாமல் இருக்கமுடியும் ?
கடவுள்: நிச்சயமற்ற தன்மை தவிர்க்க முடியாதது. ஆனால் கவலைப்படுவது ஒருவரது சுய தேர்வு

நான்: ஆனால் நிச்சயமின்மையால் எவ்வளவு மனவலி ?
கடவுள்: வலி தவிர்க்கமுடியாது. ஆனால் துன்பப் படுவது ஒருவனது சுயதேர்வு

நான்: துன்பம் அனுபவிப்பது சுய தேர்வு எனில் நல்லவர்கள் ஏன் எப்போதும் துன்பப் பட வேண்டும் ?
கடவுள்: பட்டைத் தீட்டாமல் வைரம் ஒளிராது. உலைக்குள் வைக்காமல் தங்கம் புடமாகாது. நல்லவர்கள் சோதனைகளை சந்திக்கத்தான் வேண்டும். ஆனால் துன்பப் பட வேண்டிய தேவையில்லை. அனுபவத்தின் காரணமாக அவர்கள் வாழ்க்கை கனியுமே தவிர கசப்பாகாது.

நான்: அத்தகைய சோதனை அனுபவங்கள் உபயோகமானவையா ?
கடவுள் : ஆம். அனுபவம் ஒரு கடினமான ஆசிரியன். முதலில் சோதனை வைத்து பின்னர் பாடம் புகட்டும் ஆசிரியன்.

நான்: யாருக்கு தேவை இந்த சோதனைகள் ? இவையின்றி கவலைகள் இல்லாமல் இருக்க முடியாதா?
கடவுள்: சோதனைகள் தான் பயணத்தில் இருக்கும் உபயோகமான பாடங்கள்.அதனால் மனவலிமைக் கூடுகிறது. சோதனைகளால்தான் ஆன்மபலம் வருகிறது. கவலையற்ற வாழ்க்கையினால் அது வராது.

நான்: சொல்லப் போனால் திக்குத் தெரியாமல்தான் போய்க் கொண்டிருக்கிறோம்.
கடவுள்: வெளிப்பக்கமாகப் பார்த்தால் திக்கு தெரியாது. உள்முகமாக பார்க்கத் தொடங்கு. வெளிமுகமாகும்போது நீ கனவு காண்கிறாய். உள்முகமாகும்போது விழித்துக் கொள்கிறாய். கண்கள் வெளிக்காட்சி தருகின்றன. மனம் உள் உண்மையை உணர்த்துகிறது.

நான்: நாம் எதிர்பார்க்கும் வெற்றி விரைவில் வராதபோது மனத்துன்பத்தை தவிர்த்து சரியான வழியில் செல்வது எப்படி?
கடவுள் : வெற்றி என்பது அடுத்தவர்கள் முடிவு செய்வது. திருப்தி என்பது நீ முடிவு செய்வது.

நீ முன்னால் சென்று கொண்டிருக்கிறாய் என்பதை விட எங்கே செல்ல வேண்டும் என்பதை முடிவு செய்வது அதிக திருப்தி அளிக்கும். நீ திசைக் காட்டியை வைத்துக்கொள். மற்றவர்கள் கடிகாரத்தை பார்க்கட்டும்.

நான்: கடினமான நேரங்களில் உற்சாகத்துடன் இருப்பது எப்படி ?
கடவுள்: எவ்வளவு தூரம் கடந்திருக்கிறோம் என்பதை பார், இன்னும் எவ்வளவு தூரம் என்பதை விட உனக்குக் கிடைத்திருக்கும் அருட்செல்வத்தைப் போற்று, கிடைக்காதவற்றை விட.

நான்: மக்களிடம் உங்களை ஆச்சரியப்பட வைப்பது எது ?
கடவுள்: துன்பப் படும் போது எனக்கு மட்டும் ஏன் என்பவர்கள் சுகத்தில் அப்படி ஏன் நினைப்பதில்லை.
ஒவ்வொருவரும் உண்மை தன் பக்கம் இருக்கவேண்டும் என்று ஆசைப்படுகிறார்கள் ஆனால் உண்மையின் பக்கம் தான் இருக்க வேண்டும் என்று நினைப்பதில்லை.

நான்: நான் யார்? ஏனிங்கு இருக்கிறேன் இப்படி சில கேள்விகள் தோன்றுவதுண்டு ஆனால் விடை தெரிவதில்லை
கடவுள்: நீ யார் என்று தேடாதே. நீ என்னவாக வேண்டும் என்பதை கண்டுகொள். ஏனிங்கு வந்தேன் என்பதற்கு காரணம் தேடாதே. அதை உருவாக்கு. வாழ்க்கை என்பது கண்டுபிடித்தல் அல்ல. அது உருவாக்கப்படுவது.

நான்: வாழ்க்கையின் முழுப்பயனை அடைவது எப்படி ?
கடவுள் : கடந்து போனதைப் பற்றி கவலைப் படாதே நிகழ்காலத்தில் நம்பிக்கையோடு செயல்படு எதிர்காலத்தை பயமற்று அணுகு

நான்: கடைசி கேள்வி, பல சமயங்களில் என் பிரார்த்தனைக்கு பதில் கிடைப்பதில்லை
கடவுள் : பதில் போடப்படாத பிரார்த்தனை எதுவும் கிடையாது. சில நேரங்களில் பதில் “முடியாது” என்பது தான்

நான்: அருமையான அரட்டைக்கு நன்றி
கடவுள் : நல்லது. பயத்தை விட்டு நம்பிக்கை வளர்த்துக் கொள். சந்தேகங்களை நம்பாதே; ஆனால் உன் நம்பிக்கைகளில் சந்தேகம் கொள். வாழ்க்கை ஒரு விடுவிக்கப் படவேண்டிய புதிர்; விடைகாண வேண்டிய பிரச்சனை அல்ல.

என்னை நம்பு. வாழ்க்கை ஒரு அற்புதம். வாழ்க இனிய நாளாகட்டும் இந்த நாள்.

-------------------------------------------------
பலமுறை வலையுலகில் உலா வந்து கொண்டிருக்கும் ஒரு மின்னஞ்சலின் தமிழாக்கம் இது.
சுமார் இரண்டு வருடங்களுக்கு முன் முத்தமிழ் குழுமத்தில் நான் பதிவிட்டிருந்ததை இப்போது வலைப்பூவில் பதிவிடுகிறேன் . இதன் மூல ஆசிரியர் யாரென்று தெரியவில்லை. அருமையான கருத்துக்கும் கட்டுரைக்கும் அவருக்கு நன்றிகள் உரித்தாகுக.

மேனகா காந்தியை டென்மார்க்கின் மந்திரியாக்க முடியுமா ?

2009-11-19T18:20:00.000-08:00

இத்தாலி நாட்டில் பிறந்த ஒருவர் மிகப் பெரிய ஜனநாயகத்தின் தலைவிதியை நிர்ணயிக்க முடிந்தால், இப்பெரிய ஜனநாயக நாட்டில் பிறந்தவர் சிறிய நாடான டென்மார்க்கின் சுற்றுசசூழல் பாதுகாப்பு மந்திரியாக பதவி ஏற்க முடியாதா ?

”நெஞ்சு பொறுக்குதில்லையே இந்த நிலை கெட்ட மாந்தரை நினைந்து விட்டால்” என்ற வரிகளை நினைத்துப்பார்க்காமல் இருக்கமுடியவில்லை கீழ் கண்ட படங்களைப் பார்த்துவிட்டால்.

டால்பின்களை கொன்று குவிக்கும் டென்மார்க் தேசத்தின் குரூரமான விளையாட்டு பற்றி இன்றைய மின்னஞ்சலில் செய்தியை பார்த்த உடனேயே இதை வலைப்பக்கத்தில் போட்டு விடுவது என்று முடிவு செய்தேன்.

சிவந்த மண் படத்தில் ஸ்பெயின் நாட்டு காளை விளையாட்டுக் கொலை கண்ட போது வந்த அருவருப்பு இப்போது பதைபதைப்பாக மாறி விட்டது. ஒரு ஜீவனை அணுவணுகாக கொலை செய்வது விளையாட்டிலும் வீரத்திலும் சேர்த்தியா ? கடவுளே :((((

மனிதர்களுடன் நட்பை விரும்பும் மிக அருமையான கடல் ஜீவன்கள் டால்பின்கள். சிறு குழந்தைகளும் ஆனந்தமாய் கட்டிப்புரண்டு நீந்தி விளையாடும் தோழமை படைத்தவை அவை. டால்பின்களால் மனிதர்களுக்கு எவ்வித கெடுதியும் இல்லை. நட்போடு நெருங்கி வரும் அப்பாவி உயிர்களை குத்திக் கொலை செய்வதா ! இது நம்பிக்கைத் துரோகம்.

டால்பின்களின் உயிர் சீக்கிரம் போவதில்லையாம். அவைகளின் மரண ஓலம் பிறந்த குழந்தையின் அழுகையை போலக் கேட்குமாம். சிவ சிவா!!

விஞ்ஞானத்தில் முன்னேறியும் (?) அன்பிலா வாழ்க்கையினால் என்ன பயன்? இவர்கள் கையில் கிடைக்கும் விஞ்ஞானமும் அழிவிற்கே பயன்படும் என்ற பயமும் ஏற்படுகிறது.

மேனகா காந்தியை டென்மார்க் நாட்டின் மந்திரியாக்குவதற்கு வழியுண்டா சொல்லுங்கள்

பாரதி ஒரு மனோ வைத்தியன்

2009-09-11T02:35:00.000-07:00

விளையாட்டுக் குழந்தை மனப்பான்மை மேதைகளின் லட்சணமோ என்னவோ? கணிதத்தில் மகா மேதை என்று கொண்டாடப்பட்ட ஸ்ரீ ராமனுஜம் அவர்களுடன் நெருங்கிப் பழகும் வாய்ப்பு எனக்கு கிட்டிற்று. மிகச் சாதாரணம் என்று கருதப்படுவதைக்கூட அவர் கேட்டால், குழந்தை போல முகத்தை வைத்துக் கொண்டு “அப்படியா” என்பார். கிண்டலுக்காகத்தான் அப்படி செய்கிறாரோ என்று முதலில் நான் சந்தேகப்பட்டேன். கணிதத்தில்தான் அவர் மேதாவி ! மற்ற விஷயங்களில் குழந்தை மாதிரி என்பதைப் பிறகு தெரிந்து கொண்டு ஆச்சரியப்பட்டேன்.

ராமனுஜத்தைப் போலவே பாரதியும் சில விஷயங்களில் குழந்தையாய் இருந்தார்.
..........
லேசாகப் பைத்தியம் பிடித்த பையன் ஒருவன் பாரதியாரின் கண்ணில் தென்பட்டான். அவனுக்குச் சித்தபிரமை. அவன் அதிகமாக உளறுவதில்லை. மௌனமாக இருப்பான். அவனைக் கண்டதும் பாரதியாருக்கு பரிதாபம். சித்தப் பிரமையை எப்படியாவது போக்கி விட வேண்டும் என்று சங்கற்பம் செய்து கொண்டார். “பைத்தியம் என்பது மனதைப் பிடித்தக்கோளாறு தானே பார்த்துக் கொள்ளலாம்” என்று எங்களுக்குத் தைரியம் சொல்லுவார்.

பையனை அனேகமாக எப்பொழுதும் தொட்டுக் கொண்டே இருப்பார். பழ வகைகளைத் தாமே உரித்துத் தமது கையாலேயே அவனுக்குக் கொடுப்பார்; சில சமயங்களில், ஊட்டவும் செய்வார். இரவில், தம்முடன் கூடவே பக்கத்தில் படுக்க வைத்துக் கொள்வார். கொஞ்சுகிற மாதிரி , ‘என்ன கண்ணு! என்ன ராஜா!’ என்று அவனை அழைப்பார். அவனுக்கு ராஜோபசாரந்தான்.

பையனுடைய சித்தப்பிரமையை நீக்க முயலுவது முயல் கொம்பு வேட்டை என்பது எங்கள் அழுத்தமான எண்ணம்.

பாரதியார் இல்லாத இடங்களில் இல்லாத காலங்களில் நாங்கள் ஒருவரை ஒருவர், ‘என்ன கண்ணு சாப்பிடடி அம்மா! தங்கமோன்னோ! தாமரமோன்னோ! அட குப்பைத் தொட்டியே! சோற்றை முழுங்கேன்! என்று பேசி,நையாண்டி பண்ணிக் கொண்டிருப்போம்.

சித்தப் பிரமை சிகிச்சை,சுமார் ஒரு மாதத்துக்கு மேல்,மிகவும் கிரமமாக நடந்து வந்தது.

கடைசியில், நையாண்டி பண்ணிக் கொண்டிருந்த எங்களை பாரதியார் அடி முட்டாளாக ஆக்கி விட்டார். பையனுடைய சித்தப் பிரமை சிறிது சிறிதாகத் தெளிந்து போய், அவன் நல்ல படியாகப் பேசவும் நடக்கவும் ஆரம்பித்து விட்டான். பாரதியார் ஆனந்தம் அடைந்தார். ஆனால் வெற்றி பெற்றுவிட்டோம் என்ற அகம்பாவக் குறி எதையும் அவரது முகத்திலும் நடையிலும் நாங்கள் காணவில்லை. இந்த நாட்களில், ஈசுவரப் பிரார்த்தனைதான் மிகவும் வலுவாக இருந்தது.

பையனுடைய பெற்றோர்கள் ஆனந்தக் கண்ணீர் சொரிந்தார்கள். சாஷ்டாங்க நமஸ்காரம் செய்து, பாரதியாரை வாழ்த்தினார்கள். அசடு தட்டின முகங்களை வைத்துக் கொண்டு, நாங்கள் ஒருவரையொருவர் பார்த்துக் கொண்டோம்.

--------------------------------------
மகாகவி பாரதியார், ஆசிரியர் வ.ரா; பழனியப்பா பிரதர்ஸ். எட்டாம் பதிப்பு (1974)
--------------------------------------
அன்பு நிறைந்த மனது யாவற்றிலும் தெய்வத்தைக் காண்கிறது. அப்போது அதன் சக்தி அளப்பரியது; அதனால் சாதிக்க முடியாதது ஏதும் இல்லை. அது புரியாத வ.ரா. வும் நண்பர்களும் பாரதியை எள்ளி நகையாடினர். ஆனால் தெய்வம் பாரதியின் பக்கம் நின்று நகைத்தது. குழந்தை மனம் கொண்ட கவிஞனோ தன் போக்கிலே ஆனந்தத்தில் திளைத்திருந்தான்.

உயிர்களெல்லாம் தெய்வமன்றிப் பிறவொன் றில்லை
ஊர்வனவும் பறப்பனவும் நேரே தெய்வம்;
பயிலுமுயிர் வகைமட்டு மன்றி யிங்குப்
பார்க்கின்ற பொருளெல்லாம் தெய்வம் கண்டீர்
வெயிலளிக்கும் இரவி,மதி,விண்மீன்,மேகம்
மேலுமிங்குப் பலப்பலவாம் தோற்றங் கொண்டே
இயலுகின்ற ஜடப் பொருள்களனைத்தும் தெய்வம்;
எழுதுகோல் தெய்வமிந்த எழுத்தும் தெய்வம்.

அந்த மகாகவியின் நினைவு நாளான இன்று அவரை நினைவுகூரும் வகையி்ல் இடப்பட்டப் பதிவு

கடவுளின் செயல்பாடு

2009-09-09T08:40:00.000-07:00

இன்று (09 /09/09 )மின்னஞ்சலில் கடவுளைப் பற்றி வந்த ஒரு அழகிய ஆங்கில மேற்கோளின் தமிழாக்கம். படத்தை சுட்டினால் பெரிய அளவில் காணலாம்.

இந்த தேவாலயம் திருச்சூர் நகரில் உள்ளது.

விருப்பப்பட்டவர்கள் save image செய்து அதை நண்பர்களுக்கு மின்னஞ்சலில் அனுப்பி வைக்கலாம்.

முரண்டு பிடிக்கும் ப்ளாகர் -பின்னூட்டம்

2009-09-04T23:53:00.000-07:00

திடீரென்று ப்ளாகர் பின்னூட்ட வார்ப்பு கட்டமைப்பில் சில மாற்றங்கள் நிகழ்ந்துள்ளன. முன்பெல்லாம் முன்னோட்டம்(preview) மஞ்சள் வர்ணத்தில் பிற பின்னூட்டங்களுக்கு கீழே காட்டப்பட்டு வந்தது. இப்போது தனி பெட்டியில் திரைக்கு நடுவே பெரிய எழுத்துகளில் பயமுறுத்துவது போல் zoom செய்து காட்டுகிறது.

போகட்டும். இன்னொரு பிரச்சனை-இந்த மாற்றம் எதைப் பற்றியது என்றால் பிற வலைப்பூ இணைப்பு நிரல்களை(hyper links) சேர்க்க முடியவில்லை. கீழே உள்ள படத்தை காணுங்கள்.

இதில் "http" not allowed என்று வருகிறதே :(

முன்பெல்லாம் சர்வ சாதாரணமாக மேற்கண்ட முறையில் இணைப்பு கொடுக்க முடிந்தது. இப்போது ஒட்டு மொத்தமாக அந்த நிரலை நிராகரிக்கிறது.

சரியென்று நிரலில் “http://" பகுதியை மட்டும் நீக்கிவிட்டு செய்தால் ஏற்றுக்கொண்டது. ஆனால் அப்படி வரும் இணைப்பைச் சுட்டினால் ‘Page Not Found' என்ற பக்கத்திற்கு இட்டுச் செல்கிறது ?????

இதற்கு ஏதாவது நாட்டுமருந்தோ, அலோபதியோ, ப்ளாகர்பதியோ தெரிந்தால் சொல்லுங்களேன்,ப்ளீஜ்ஜ்ஜ் :))

சுதந்திர தின விருது: மூன்று பதிவர்களுக்கு

2009-08-14T18:14:00.000-07:00

இன்று சுதந்திர தினம். பத்ம விருதுகள் பற்றி பத்திரிக்கைகளில் விவரங்கள் வந்திருக்கும். அவர்களுக்கெல்லாம் ஒரு பாராட்டு.

நம் வலையுலகம் பெரிது. அதில் நாம் புழங்கும் வட்டமோ சிறிது. அந்த சிறிய வட்டத்திற்குள்ளே நாமறிந்த ஒரு சிலருக்கு விருது அளித்து சந்தோஷப் படுவோமே !

கவிநயா அவர்கள் எனக்கு இந்த விருது கொடுத்தாங்க. அதை சித்திரமும் கைப்பழக்கம் வலைப்பூவில் பொருத்தி விட்டேன். நமக்கு கொடுத்ததை நாலு பேரோட பகிர்ந்து கொள்ளணும். ஆனா இது தீபாவளி ஸ்வீட் மாதிரி. நாம் கொடு்க்கத் தயாரானாலும் வாங்க ஆளு கெடையாது. ஏற்கனவே ஆணியில நெறைய தொங்கிக்கிட்டு இருக்கு. மாட்ட எடம் இல்லைன்னு சொல்றவங்க நெறைய பேர்.

என்ன பண்ண? எப்படியோ மூணு பேரை கண்டு பிடிச்சிட்டேன். அவர்கள் எல்லோருமே Interesting Bloggers தான். மிகவும் பயனுள்ள தகவல்களை சுவையாக தருபவர்கள். அவர்கள் மறுக்காமல் என் விண்ணப்பத்தை ஏற்று கௌரவிக்க வேணுமாறு கேட்டுக் கொள்கிறேன்.

முதலாவதாக வின்சென்ட் ஐயா அவர்கள். அவருடைய ”மண் மரம் மழை மனிதன்” பலரும் அறிந்ததே. அவருக்கோ அவரது அருமையான பணிக்கோ அறிமுகம் தேவையில்லை. மிக அற்புதமான பல நல்ல தகவல்களை மேலும் தாங்கி வரவேண்டும் என்பது என் விருப்பம்.

வடுவூர் குமார் அவர்களின் கட்டுமானத்துறை பதிவுகள் நான் தொடர்ந்து படித்து வரும் ஒரு வலைப்பூ. அவருடைய கட்டுமானத்துறை இடுகைகள் யாவும் short & sweet. தொழில் நுட்பம் பற்றிய விவரங்கள் மட்டுமல்லாது தன்னைக் கவர்ந்த பல்சுவை தகவல்களையும் அவர் எந்த அலட்டலும் இல்லாமல் தருவது மிகவும் பிடிக்கும். சந்தேகம் இல்லாமல் இவரும் ஒரு Interesting Blogger தான்.

இன்னொரு சுவையான வலைப்பூ தர்ஷிணி அவர்களின் ”இன்று முதல்” . இவருடைய செயல்முறை விளக்கங்களுடன் கூடிய வண்ண வண்ண கைவினை கலைப் படைப்புகள் யாவும் மிகவும் மனதை ஈர்ப்பவை. அவை ஒவ்வொன்றின் பின்னும் இருக்கும் உழைப்பும் உற்சாகமும் போற்றப்பட வேண்டிய ஒன்று. எனவே இந்த விருது அவருக்கும் சாலப் பொருந்தும்.

இன்னும் சிலருக்குக் கொடுக்க விருப்பந்தான். ஆனால் என் வட்டம் மிகச்சிறியது ஆதலின் சிறிது காலம் பொறுத்திருந்து கொடுக்கலாம் என்று நினைக்கிறேன். குடியரசு தினம் ?

விருது பெற்றவர்கள் இந்த விருதை தமக்கு பிடித்தவர்களுக்கு அணிவித்து மகிழலாம்.

அனைவருக்கும் சுதந்திர தின நல்வாழ்த்துகள்

கங்குபாய் :கர்நாடகத்தின் பட்டம்மாள்

2009-07-21T08:15:00.000-07:00

இசை உலக ரசிகர்களுக்கு கர்நாடக இசையில் சமீபத்தில் ஒரு பட்டம்மாள் இழந்த துயரம் நீங்கும் முன்பே ஹிந்துஸ்தானி இசை உலகமும் ஒரு பட்டம்மாளை இழந்து விட்டது. அவர் பெயர் கங்குபாய் ஹனகல்.

கர்நாடக மாநிலம் இரண்டு இசை உலகிலும் கொடி கட்டி பறக்கிறது. தெற்கில் மைசூர் சமஸ்தானம் கர்நாடக இசையை ஊட்டி வளர்க்கையில் வட கர்நாடகத்தினர் ஹிந்துஸ்தானி இசையைப் பற்றிக் கொண்டனர். பண்டிட் பீம்சேன் ஜோஷி, கங்குபாய் ஹனகல், ஷோபா முத்கல், ப்ரவீண் கோர்கண்டி (குழல்) போன்றோர் கர்நாடக மாநிலத்திற்கு ஹிந்துஸ்தானி துறையில் பெருமை சேர்ப்பவர்கள்.

இன்று கங்குபாய் ஹனகல் காலமானார். அவருக்கு வயது 97. ஐந்தாம் வகுப்பு வரையிலேயே பள்ளிக்குச் சென்ற இவருக்கு சரஸ்வதி கடாக்ஷம் பூரணமாக இருந்தது. இவரை கௌரவிக்கும் ஐம்பதிற்கும் மேற்பட்ட விருதுகளில் பாரத அரசாங்கத்தால் பத்ம பூஷண் மற்றும் பத்ம விபூஷண் விருதுகளும் அடங்கும். ஒன்பது பிரதம மந்திரிகள், ஐந்து ஜனாதிபதிகளால் கௌரவிக்கப்பட்ட ஒரே இசைக் கலைஞர் என்ற பெருமையும் உண்டு.

எளிய விவசாயக் குடியை சேர்ந்த இவர் இசைத்துறையில் ஆரம்பகாலங்களில் பல பெரும் எதிர்ப்புகளை சந்திக்க வேண்டியிருந்தது. இளம் தலைமுறையினரிடையே சங்கீதக் கலை நன்முறையில் தழைக்க வேண்டும் என்பதற்காக இவர் எடுத்துக் கொண்ட முயற்சிகள் பெரும் பாராட்டுதல்களைப் பெற்றிருக்கிறது.

இவரது மறைவு குறித்து கர்நாடக அரசு இரண்டு நாள் துக்கம் அறிவித்திருக்கிறது. எல்லா அரசு விழாக்களும் ரத்து செய்யப்பட்டுள்ளன. (தமிழ் நாட்டில் நம் இசைக் கலைஞர்களுக்கு இவ்வித அஞ்சலி செலுத்தினார்களா என்பது தெரியவில்லை). இறுதி சடங்குகள் முழு அரசு மரியாதையுடன் நாளை (22-07-09) அன்று நடைபெறும்.

அவரது விருப்பப்படி அவரது கண்கள் தானம் செய்யப்பட்டன.

அவர் எவ்வளவு எளிமையானவர் என்பது இந்த படத்தைப்பார்த்தாலே விளங்கும். இதுதான் இந்த அஞ்சலிப் பதிவை எழுதுவதற்கும் தூண்டுகோ்லாயிற்று.

அவரது குரலைக் கேட்டறியாதவர்களுக்காக இதோ ஒரு இசை இணைப்பு.

Get this widget

Track details

eSnips Social DNA

32 கேள்வி கேட்டாரு கே.ஆர்.எஸ்-ஸு

2009-06-16T00:05:00.000-07:00

அண்ணன் பேச்சை தம்பி தட்டக்கூடாது .
கபீரண்ணன் ரவிசங்கர் கூப்பிட்ட பிறகு தம்பி கபீரன்பன் தட்ட முடியுமா?

என்னங்க இது? அவரு எப்படி அண்ணனாக முடியும் அப்படீன்னு என்னைத் தெரிஞ்சவங்க கேக்கிறது ஞாயந்தான். வலையுலகிலே, என்னையும் சேர்த்து, அவரு பலருக்கும் சீனியர்தான் பிரவேச காலத்தை வச்சுப்பார்த்தா!

ஆனா அது ஒண்ணுமாத்திரமில்ல நான் சொன்னதுக்கு காரணம் அவரே தன் பெயருக்குள்ள அதை ஒளிச்சு வச்சிருக்கிறார் பாருங்க. அவரு பேரு Kannabiran Ravishankar. கொஞ்சம் மாத்தி போட்டு படியுங்க Kabirannan Ravishankar :)))))

32 விளையாட்டில் அவரு என்னை இழுத்து விட்டப்புறம் எல்லாமே வெளையாட்டுதான்.

_______________________________________________________________________

1 . உங்களுக்கு ஏன் இந்தப் பெயர் வந்தது? உங்களுக்கு உங்க பெயர் பிடிக்குமா?

எனக்கு கபீர்தாஸ் என்றே வைத்துக்கொள்ள ஆசை. ஆனால் மூலவர் பெயரும் கபீர்தாஸ் ஆகிவிட்டதால் சிறிது தமிழ்மணம் கமழட்டுமே என்று கபீரின் ’அன்பன்’ ஆகிவிட்டேன். நானே வைத்துக் கொண்டதால் பிடிக்காமலா போகும் !!

2. கடைசியாக அழுதது எப்பொழுது?

ரயிலில் பத்து அல்லது பன்னிரெண்டு வயதுடைய சிறுவன் அவன் இரு தங்கைகளுடன் ஒரு ஆர்மோனிய பெட்டியை வைத்துக் கொண்டு ‘ஏனேனோ ஆசே’ என்ற புகழ்பெற்ற கன்னடப் பாடலை பாடிக்கொண்டு வந்தான். அவனுடைய எட்டு வயது தங்கை அப்பாடலுக்கு அபிநயம் பிடித்தாள். மூன்றாவது குட்டி ஏதும் புரியாமல் அண்ணனுடைய சட்டையைப் பிடித்துக் கொண்டே மலங்க மலங்க விழித்துக் கொண்டிருந்தது. அவர்களுக்கு என்னென்ன ஆசைகள் இருக்கும்?

தினமும் ஐந்தாறு ஸ்டேஷன்கள் முன்னும் பின்னுமாக போய்வருவார்கள் போலும். அவர்கள் தாய் தந்தையர் எங்கோ! வறுமை எப்படியெல்லாம் மனிதனை விரட்டுகிறது. இப்படி இன்னும் எத்தனை லட்சக்கணக்கான ஜீவன்களோ அவர்களுடைய ஆசைகளும் கனவுகளும் அந்த மிகக் குறுகிய வட்டத்திலேயே முடங்கி விடுமோ? வழிக்காக கொடுக்கப்பட்டிருந்த தின்பண்ட பொட்டலத்தை அப்படியே அவர்களிடம் கொடுத்துவிட்டேன். நான் கொடுத்ததை அவர்கள் ஆசையாக தின்ற போது என்னையறியாமல் கண்களில் நீர் நிறைந்தது.

இன்னொரு முறை டயோடா-க்வாலிஸ் ஒன்றில் ஊரிலிருந்து வந்திருந்த தமிழறியாத அன்பர்களுடன் முண்ணாறு போய்க் கொண்டிருந்தோம். கெஸட்டிலிருந்து ‘உன்னையே கதியென்றடைந்தேன் தாயே’ என்று ஜெயஸ்ரீயின் அமுதமான குரலில் பாடல் வந்த போது அதன் பொருளை கேட்டார் உடன் வந்திருந்த அம்மையார். வரிக்கு வரி அதன் பொருளை கன்னடத்தில் சொல்ல ஆரம்பித்தேன். ’சின்னதனம் செய்து சித்தம் மிக வாடி’ என்பதன் பொருள் சொன்னவுடனயே அவர் கண்களில் குபுக் என்று நீர் வந்துவிட்டது. அதைக் கண்டதும் என் கண்களிலும் நீர் வந்து தொண்டை கம்மி மேலே பேச முடியாமல் போனது. உண்மையில் அந்த ராகமும் பாவக்குழைவும் ஏற்கனவே மனதை கரைத்து விட்டிருந்தது. பொருள் சொன்னதும் அவரால் மனநெகிழ்ச்சியைக் கட்டுப்படுத்த முடியவில்லை.

[என்ன இது ! ரெண்டாவது கேள்வியிலேயே அழுகையா? எப்போ சந்தோஷமா இருந்தே அப்படீன்னு ஒரு நல்ல கேள்வி கிடைக்கலையா. கேக்காத கேள்விக்கு பதில் எழுதினாலும் மார்க் போட மாட்டாங்க துளசி டீச்சர், கீதா மேடம். சரி ஒண்ணு என்ன ரெண்டு அழுகை கதையே சொல்லிட்டேன். பாத்து செய்யுங்க ]

3. உங்களோட கையெழுத்து உங்களுக்கு பிடிக்குமா?

பிரமாத பீத்திக்கிற மாதிரியெல்லாம் இல்லை! தலையெழுத்து மாதிரி அதுவும் ரொம்ப சாதாரணம், மோசமில்லை.
கடைசி கேள்விக்கான பதிலில் சாம்பிள் கையெழுத்து இருக்கு !:)))

4. பிடித்த மதிய உணவு என்ன?

சுத்த சைவம் எதுவாயினும் சரி.

5. நீங்கள் வேறு யாருடனாவது உங்களோட நட்பை உடனே வச்சுக்குவீங்களா?

வேறு யாருடனாவது ??? அப்படீன்னா. புது ஆளுங்கள சொல்றீங்களா ? நான் ரிசர்வ்ட்-டும் இல்லை; அதுக்குன்னு யாரு மேலேயும் விழுந்து ஃப்ரண்ட்ஷிப் தேடறதும் இல்லை. விரும்பி பேசறவங்ககிட்ட ரொம்ப ஆர்வமா இணக்கமா பேசுவேன். அதுக்கப்புறம் நட்பை தொடர்வது அவர்களைப் பொறுத்தது.

6. கடலில் குளிக்க பிடிக்குமா....அருவியில் குளிக்க பிடிக்குமா?

அருவிதான். கடல்ல குளிச்சு ரொம்ப வருஷமாயிடுச்சு

7. முதலில் ஒருவரைப் பார்க்கும் போது எதை கவனிப்பீர்கள்?

என் மனதில் படிவது அவங்க பாடி லாங்க்வேஜ்

8. உங்க கிட்ட உங்களுக்கு பிடிச்ச விஷயம் என்ன? பிடிக்காத விஷயம் என்ன ?

a)எதையாவது உருப்படியா செய்யணும்-ன்னு விடாம- இருக்கிறத வச்சுகிட்டு -எதையாவது செஞ்சுக்கிட்டு இருக்கிறது. இது பிடிச்சது.

[உதாரணம் பக்கத்தில (side Bar)இருக்கிற உலகநீதி கேட்ஜட் -ஐ விழுந்து எழுந்து எப்படியோ ஒரு வழியா இப்பதான் செஞ்சு முடிச்சேன். பிடிச்சிருந்தா இருந்தா உங்க வலைப் பக்கத்திலேயோ igoogle பக்கத்திலோ நீங்களும் பொருத்திக்கலாம்]

b) பிடிக்காததுன்னு கேட்டா ’என் உலகத்திலேயே’ இருந்துகொண்டு பல விஷயங்களை கவனிக்காம விட்டுடறது

9. உங்க சரி பாதி கிட்ட உங்களுக்கு பிடித்த பிடிக்காத விசயம் எது?

பாவங்க! அவங்க அப்பாவி. அவங்களை நம்ம வம்புல ஏன் இழுக்கணும் :))

10. யார் பக்கத்துல இல்லாம இருக்குறதுக்கு வருந்துகிறீர்கள்?

பல வருடங்களுக்கு முன் நடந்த நிகழ்ச்சி.

அமீரகத்திலிருந்து ஒரு எதிர்பாராத தரைவழி அஞ்சல் (மின்னஞ்சல்கள் இல்லாத காலம்) அலுவலக முகவரிக்கு வந்தபோது பெரும் சந்தோஷப்பட்டேன். எழுதியிருந்தது என் நெருங்கிய பள்ளித்தோழன். தொடர்பு விட்டுப்போய் பத்து வருடங்களுக்கு மேல் ஆகி விட்டிருந்தது. எனக்கு கிடைத்திருந்த ஒரு விருதை பத்திரிக்கையில் படித்து மகிழ்ச்சியுடன் பாராட்டி (தனக்கு மகன் பிறந்த சந்தோஷத்தையும் சொல்லி) அரைகுறை விலாசத்துடன் அவன் எழுதிய கடிதத்தை இன்னமும் பத்திரப் படுத்தி வைத்திருக்கிறேன். அடுத்த முறை சென்னை வரும் போது கண்டிப்பாக சந்திக்கலாம் என்று எழுதியவனை சந்திக்க முடியாமலே போய்விட்டது. அவன் போய் மூன்று வருடங்களுக்கு பின்னரே எனக்கு விஷயம் தெரிய வந்தது.

இப்போது அவன் பக்கத்துல வரவே முடியாது என்ற நினைவு அடிக்கடி என் நெஞ்சை பாரமாக்கும்.

11. இதை எழுதும் போது என்ன வண்ண ஆடை அணிந்து உள்ளீர்கள்?

வெள்ளை

12. என்ன பார்த்து//கேட்டுக் கொண்டு இருக்குறீங்க ?

தொலைக்காட்சியில் ஏதோ எம்.ஜியார் படம் ஓடிக்கொண்டிருக்கிறது. மனதில் ஒட்டவில்லை.
நடிகர் அசோகன் எம்.ஜி.யாருக்கு எலிப்பாஷாணம் பற்றி ஏதோ விளக்கிக் கொண்டிருக்கிறார்

13. வண்ணப் பேனாக்களாக உங்களை மாற்றினால் என்ன வர்ணமாக உங்களுக்கு ஆசை?
பிடிச்ச வர்ணம் அப்படீன்னே கேட்டிருக்கலாமே ! நான் ஏன் பேனாவா மாறணும்.
எனக்குப் பிடிச்ச வர்ணம் நீலப்பச்சை (Bluegreen).

14. பிடித்த மணம்?
பெங்களூருக்கே உரிய சம்பகா . இப்போதெல்லாம் மரங்கள் குறைந்துவிட்டன. நான் சிறுவனாக இருந்த போது சாலையில் நடக்கும்போதே நம்மை பற்றிக்கொள்ளும் அந்த மணம்.

15. நீங்க அழைக்கப் போகும் பதிவரிடம் உங்களுக்கு பிடித்த விஷயம். அவரை அழைக்கக் காரணம் என்ன ?

அவர்கள் தொந்தரவு என்று நினைக்காத பட்சத்தில்

நினைவின் விளிம்பில் - கவிநயா : குழந்தைகளுக்கான பாடலாகட்டும், அம்மன் கவிதைகளாகட்டும் மிக எளிய வார்த்தைகளில் மனம் கவரும் வண்ணம் எழுதும் திறமை படைத்தவர். நல்ல சிறுகதைகள் படைக்கும் ஆற்றல் உள்ளவர்.

பக்தியே பிரதானமாகக் கொண்டு மிகுந்த சிறப்பான இடுகைகளை இட்டு வருபவர் மதுரையம்பதி. இவருக்கும் அம்மனை ரொம்ப பிடிக்கும் போலிருக்கிறது. பல ஆசாரியர்கள் மற்றும் ஞானிகளைப் பற்றிய இவரது இடுகைகளும் மனம் தொடுபவையாக இருக்கும்.

முகமூடிக் கவிதைகள் என்று ஒரு theme based approach-ல் வடிகால் வலைப்பூவில் கிருத்திக்கா அவர்கள் நன்றாக செய்து வருகிறார். அப்படி மையக் கருத்தை வைத்து எழுதுபவர்கள் மிகவும் குறைவு. இவருடைய கதைகளும் அனுபவங்களும் கூட நல்ல நடையில் யதார்த்தமாக சொல்லப்பட்டிருக்கும்.

ஜீவாவுக்கு அறிமுகம் தேவையில்லை. இசையின்பத்திலும் ஆத்ம போதத்திலும் வாசகர்களை முக்கி தோய்த்து எடுப்பவர். இவருடைய இடுகைகளில் மொக்கை ரகமே இருக்காது. அவருடைய உழைப்பு அவர் சொல்ல வரும் கருத்துகளில் நன்கு புலனாகும்.

16. உங்களுக்கு இதை அனுப்பிய பதிவரின் பதிவில் உங்களுக்குப் பிடித்த பதிவு?

கே.ஆர்.எஸ் எதை எழுதினாலும் அக்குவேறு ஆணிவேறாய் பிரிச்சுப் பார்த்துட்டுதான் மறு வேலை பார்ப்பார் என்பது அவருடைய காரைக்கால் அம்மையார் மற்றும் ஆண்டாள் பதிவுகளை படித்தாலே புரியும்.

காரைக்கால் அம்மையார் பதிவுக்கு தமிழ்மணம் விருது கிடைத்ததில் ஆச்சரியம் ஏதுமில்லை.

17. பிடித்த விளையாட்டு?

கொஞ்சம் சதுரங்கம், கொஞ்சம் பாட்மிண்டன். கூடைப்பந்து ஆடுபவர்களின் லாவகத்தையும் வேகத்தையும் ரசித்துப் பார்ப்பேன்

18. கண்ணாடி அணிபவரா?
ஆமாம், 16 வயதிலிருந்து. பொன்னியின் செல்வனை ஒரே மூச்சில் படித்ததால் வந்ததென்று திட்டு வாங்கியிருக்கிறேன் !

19. எப்படிப் பட்ட திரைப்படம் பிடிக்கும்?
பொதுவாக நகைச்சுவை படங்கள்.

20. கடைசியாகப் பார்த்த படம்?
குடும்பத்துடன் திரையரங்கில் பார்த்தது ‘தாரே ஜமீன் பர்’

21. பிடித்த பருவ காலம் எது?

காலங்களில் அது வசந்தம்

22. என்ன புத்தகம் படித்துக் கொண்டு இருக்கீங்க?

கொஞ்ச நாளா Power of Now என்ற புத்தகத்தை வைத்துக்கொண்டு இங்குமங்குமாக பக்கங்களை புரட்டிக் கொண்டிருக்கிறேன்

23. உங்கள் டெஸ்க்டொப்-ல் இருக்கும் படத்தை எத்தனை நாளுக்கு ஒரு நாள் மாற்றுவீர்கள்?
எதுவும் வச்சுகிறது கிடையாது. ஹெச்.பி கொடுத்த ஒரிஜினல் செட்டிங் அப்படியே இருக்கு

24. பிடித்த சத்தம் ? பிடிக்காத சத்தம்?
பறவைகளின் கீச்சு மூச்சு சத்தம் பிடிக்கும்.
பிடிக்காதது மிக்ஸி

25. வீட்டை விட்டு நீங்கள் சென்ற அதிக பட்ச தொலைவு?

பெங்களூருக்கு ஹாங்காங் தூரமா ஜெனிவா தூரமா ?

26. உங்களுக்கு ஏதாவது தனித் திறமை இருக்கிறதா?

தனித் திறமை என்று என்னத்தை சொல்றது, நான் செய்யிற எல்லாத்தையும் மிக மிக சிறப்பா செய்யிறவங்க நிறைய பேர் இருக்காங்களே !!

27. உங்களால் ஏற்றுக் கொள்ள முடியாத ஒரு விஷயம்?

என்னைப் பார்த்து யாராவது பயப்படுவது.

28. உங்களுக்கு உள்ளே இருக்கும் சாத்தான்?

கார் ஓட்டிக் கொண்டிருக்கும் போது ஏதாவது சாலை நிகழ்வோ,தொலைபேசியோ அல்லது சகப் பிரயாணிகளின் பேச்சோ எரிச்சலடைய வைத்தால் உடனே வண்டியின் வேகம் கூடி விடும். தேவையில்லாமல் முன்னே போகும் வண்டிகளை முந்திக் கொண்டு போக முனைவேன். இது ஏனென்று புரியவில்லை. சொன்ன மாதிரி ஏதோ சாத்தானாயிருக்குமோ !

29. உங்களுக்கு பிடித்த சுற்றுலா தலம்?

இனிமேலத் தான் கண்டுபிடிக்கணும்

30. எப்படி இருக்கணும்னு ஆசை?

பெரிய ஆசை எல்லாம் ஒண்ணும் இல்லை. உள்ளதே போதும்

31. மனைவி இல்லாம செய்ய விரும்பும் ஒரே காரியம் ?
விரும்பி செய்வது என்று இல்லை. நிர்பந்தத்தால் செய்வது சமையலறை பிரவேசம்.

32. வாழ்வு பற்றி ஒரு வரி சொல்லுங்க?

Life should be like a snow flake. Leave a mark but not a stain.

நான் சொல்லவில்லை சினா-சோனா தான் சொல்றாரு.

[கையெழுத்து நிபுணர்கள் பெரிசு பண்ணி பார்த்து என்னைப் பற்றி
எனக்கு தெரியாத விஷயங்கள் இருந்தால் சொல்லவும் :)))) ]

________________________________________________________________________
பொறுமையா படிச்சதற்கு நன்றி

ரவியண்ணன் கொடுத்த பொறுப்பு நிறைவேறியது. சுபம்

பறக்குது :காகிதப் பட்டங்கள்

2009-05-18T22:28:00.001-07:00

பட்டுக்கோட்டை கலியாணசுந்தரம் அவர்களின் பழையத் திரைப்படப்பாடல் ஒன்று (குலதெய்வம் -1956).

கோழியெல்லாம் கூவையிலே
குறட்டை விட்டார்
வாய் கொப்பளிக்கும் முன்னே
கொஞ்சம்
காப்பியையும் குடித்து விட்டார்.
குளிக்காமல் சாப்பிட்டு ஏப்பம் விட்டார்
தன்னை குழந்தை போல் எண்ணிவிட்டார்
எங்க சின்ன மச்சான் - இப்போ

பட்டம் விட புறப்பட்டு விட்டாரைய்யா
பட்டம் விட்டாரையா -எட்டாத
உயரத்திலே விட்டாரைய்யா
பட்டம் விட்டாரைய்யா
பறக்க விட்டாரைய்யா

ஆராரோ பட்டம் விட்டு
பேராசை வட்டமிட்டு
ஆடி ஓடி போனதைப் போலே
விட்டாரையா - அணை
கட்டாத ஏரி தண்ணி
கடலோடு போனது போல
கற்றதெல்லாம் காற்றோடு
விட்டாரைய்யா

டா பட்டம், டீ பட்டம்
ஜமீன் பட்டம், சாமி பட்டம்
ஜாதி பட்டம்,பகதூர் பட்டம்
லேடி பட்டம் கேடி பட்டம்
வாலறுந்து நூலறுந்து
போன இடம் தெரியலே-இந்த
வேலையத்த மச்சான் வெறும்
காகித பட்டம் கட்டி விட்டாரைய்யா -ஓட
விட்டாரைய்யா

பலவித பட்டங்களை பெறுவதாலேயே தங்களை அறிஞர்களாகவோ, சமூகத்தில் பெரும் புள்ளிகளாவோ காட்டிக்கொள்ளும் முயற்சி அந்த காலத்திலிருந்து இருந்து வந்திருக்கி்றது. பலர் அதையே பெரும் சாதனையாக நினைத்துக் கொள்கின்றனர். அவைகளெல்லாம் வாலறுந்து, நூலறுந்து போன கதைதான். எத்தனை திவான் பஹதூர்களை உலகம் நினைத்துப் பார்க்கிறது? மந்திரி பதவி இருந்தால் டாக்டர் ’பட்டம்’ உண்டு. பணம் (கொடை) கொடுக்கும் நடிகர்களுக்கும் தொழிலதிபர்களுக்கும் கூட அது சுலபமாக கிடைக்கும்.

இன்றைய காலத்தில் ”பத்ம“ பட்டங்கள், கலைமாமணி, இத்யாதிகளும் உண்டு. இதைத்தான் ”ஆராரோ பட்டம் விட்டு பேராசை வட்டமிட்டு ஆடி ஓடி போனதை போலே” என்று பட்டுக்கோட்டையார் கேலி செய்கிறார்.

இப்படி ஒரு வாழ்க்கை முழுவதும் போலி வெற்றிகளுக்காக போராடும் வாழ்க்கையைப் பற்றி சினா சோனா சொல்வதை பார்ப்போம்.

A LONG LIFE MAY NOT BE GOOD ENOUGH
BUT A GOOD LIFE IS LONG ENOUGH

எவ்வளவு காலம் வாழ்ந்தோம் என்பதைக்காட்டிலும் எப்படி வாழ்ந்தோம் என்பதே முக்கியம்.

Good Life என்பது அணைகட்டிய நீர். ஒரு ஒழுங்குபாடு உள்ளது. அதனால் பல நன்மைகள் சமுதாயத்திற்கு உண்டு. பிறருக்கு எவ்வகையிலேனும் பயன்படாத வாழ்க்கையானால் அவர்கள் எவ்வளவு காலம் பூமியில் வாழ்ந்தென்ன ? அவர்கள் எவ்வளவு படித்திருந்தென்ன ! பட்டுக்கோட்டையார் சொல்வது போல் “கற்றதெல்லாம் காற்றோடு விட்டாரைய்யா” என்கிற நிலைதானே !

மாபெரும் சாதனையாளர்கள் எனப் போற்றப் பெறுபவர் அனவரும் பெரும்பாலும் சாதனைகளை மிக இளம் வயதிலேயே சாதித்துள்ளனர். ஆதிசங்கரர், விவேகானந்தர், ஸ்ரீனிவாஸ ராமானுஜம், பாரதியார், பட்டுக்கோட்டை கலியாண சுந்தரம் போன்றவர்கள் தமது நாற்பது வயதுக்குள்ளாகவே தத்தம் துறையில் சாதனை படைத்து அமரத்துவம் எய்திவிட்டனர்.

அவர்களால் உலகம் பயனடைந்திருப்பதனால்தான் அவர்களை இன்றளவும் நினைத்துப்பார்க்க முடிகிறது. அவர்களுடைய வாழ்க்கை உண்மையிலே Good Life.

பிரமிட் தியான மண்டபம்- தியான முறை

2009-05-10T01:58:00.000-07:00

ஆரோவில் பாண்டிச்சேரியில் மிகப் பெரிய தியான மண்டபத்தை 70 களில் கட்டப்பட்டு வரும் நிலையில் கண்டு அதிசயித்தது உண்டு. இனம், மொழி, மதம் வேறுபாடு இன்றி எவரும் எப்பொழுது வேண்டுமானலும் சென்று தியானம் செய்வதற்கு உதவியாக அரவிந்த ஆசிரமத்தின் அன்னையின் விருப்பப்படி கட்டப்பட்டது.

மாத்ருமந்திர் என்ற பெயரில் இப்பொழுது பொற்கோவில் போன்று ஓங்கி நிற்பதை (இணைய தளத்தில்) காணும் போது பரவசமாகிறது.

ஆனால் மாத்ருமந்திர் வெறும் பாண்டிச்சேரிக்கு மட்டுமே.

ஆந்திராவைச் சேர்ந்த பிரம்மரிஷி பத்ரிஜி (Brahmarishi Patriji) இப்போது தியான மண்டபங்களை நாட்டின் பல பாகங்களிலும் நிறுவுவதற்கு ஊக்குவித்து வருகிறார். இவர் விவசாயத்தில் முதுகலை பட்டதாரி.கிருஹஸ்தர். பலவருடங்கள் தனியார் துறையில் பணியாற்றியவர்.

இவரது தியான மண்டபம் சற்று வித்தியாசமானது. அவை பிரமிட் வடிவில் அமைக்கப்பட்டுள்ளன.

வடுவூர் குமாரின் கட்டுமானத்துறை வலைப்பக்கத்தில் பிரமிட் அதிசய சக்தியை விளக்கும் ஒரு சலனப் படத்தை கண்டபோது அதை தரவிறக்கம் செய்து பலருக்கும் காட்டி வந்தேன். அப்போது ஒருவர் பெங்களூருக்கு அருகே உள்ள பிரமிட் தியான மண்டபத்தை குறிப்பிட்டார். அது தான் மேலே குறிப்பிட்ட பத்ரிஜியின் தியான மண்டபம். சமீபத்தில் அங்கு சென்று வர ஒரு வாய்ப்பு கிடைத்தது.

கனகபுரா சாலையில் Pyramid valley என்ற பெயரில் வழிகாட்டும் பலகைகள் உள்ளன. தூரம் 35 கிமீகள் பிராதன சாலையிலிருந்து ஒரு கிமீ தூரம் கிராமபாங்கான சாலையில் உள்ளே பயணிக்க வேண்டும்.

சுமார் 160 அடி அளவுள்ள சதுர வடிவ அடிபாகத்தில் 107 அடி உயரம் உயர்ந்து இருக்கும் இந்த பிரமிட்டில் ஐந்தாயிரம் பேர்கள் ஒரே சமயத்தில் தியானம் செய்ய முடியுமாம்.

இது அல்லாமல் ஆந்திராவில் பத்து, கர்நாடகத்தில் மூன்று தமிழ்நாட்டில் இரண்டு என கிளைகள் 200 முதல் 300 பேர் வரை தியானம் செய்யக் கூடிய மண்டபங்களாக மலர்ந்து சேவை புரிந்து வருகின்றன.

சென்னை தியாகராய நகரில் சுப்ரமண்யா பிரமிட் தியான மையம் என்ற பெயரிலும், கோவை வடவள்ளியில் ஸ்ரீ சதாசிவ பிரமிட் தியான மையம் என்ற பெயரிலும் இயங்குகின்றன.

பத்ரிஜியின் முறை தியானம் மூச்சு ஓட்டத்தை கவனிப்பதையே முக்கிய அங்கமாக கொள்கிறது. இதை புத்தர் கண்ட வழி என்று சொல்லலாம். அதனால் செபிக்க மந்திரமோ ஆராதனை முறைகளோ இங்கு தேவையில்லை.
(பெரிது படுத்தி படிக்கலாம்)

தியானத்தில் மூச்சு ஒழுங்குபடுகிறது, மூச்சு ஒழுங்குப் படும் பொழுது மனம் ஒழுங்காகிறது. மனம் ஒழுங்குபட்டால் மனிதன் ஒழுங்காகிறன். மனிதன் ஒழுங்காகும் பொழுது சமுதாயமும் ஒழுங்கு படுகிறது.

எளிமையான முறைதான். ஆனால் மனிதனை இதை கைகொள்ள வைப்பதில் தான் வெற்றியின் ரகசியம் உள்ளது. அதற்கு இப்படிப்பட்ட தியான மண்டபங்கள் ஊக்குவிக்கும் புதிய ஆலயங்களாக மலருமோ என்னவோ !

தியானத்தை வீட்டிலோ நடமாற்ற வெளியிலோ அல்லது அமைதியான ஆலயத்திலோ கூட செய்ய இயலும் தான். ஆனால் ஒரு புதிய முனைப்பு கொடுக்க வேண்டுமாயின் அதற்கென பிரத்யேகமான ஏற்பாடு செய்தால் பலரையும் கவர்ந்திழுக்க முடியும்.

காலத்திற்கேற்ற உத்தியை கைகொள்வதில் தவறேதும் இல்லை என்றே தோன்றுகிறது.

சரி, நான் தியானம் செய்தேனா என்று கேட்கிறீர்களா? உம் ...செய்தேன், முதல் தளத்தில். சர்வ நிசப்தம். அசதியில் தூக்கமாய் வந்தது. எழுந்து வந்து விட்டேன்.

பாவம், பிறருக்கு ஏன் என்னால் தொந்தரவு :)))

பிரமிட் முறை தியானம் பற்றி அறிய விரும்புவர்கள் கீழ்கண்ட இணைப்புகளில் மேலும் விவரம் பெறலாம்.

http://www.pyramidspiritualsocieties.org/PSS/Home/Home1.htm

http://www.patriji.org/en/htmls/articles/pyramid_movement.html

Google and Feed Burner

2009-04-01T00:41:00.000-07:00

Google Feed Burner செய்திருக்கும் குழப்பத்தால் கபீரின் கனிமொழிகளின் மூன்று இடுகைகள் நேரடி அஞ்சலில் பெற விழைந்தவர்களுக்கு சேராமல் இருக்கிறது.

”சும்மா இருந்த சங்கை ஊதிக் கெடுத்தானாம்” என்பது போல நான் சும்மா இல்லாமல் கூகிள் சொன்னதற்காக என் Feed Burner கணக்கை Google Feed Burner க்கு மாற்றினேன்.அப்போதிலிருந்து பிரச்சனைதான்.

பெப்ரவரி 6 ஆம் தேதி உழப்பின் வாரா உறுதிகள் உளவோ என்ற இடுகைக்குப் பிறகு வெளிவந்த இடுகைகள் எதுவும் Feed Burner- தரும் முன்னோட்டத்திலும் காட்டப்படவில்லை. இங்கே Side bar-ல் “ கபீரைக் கண்டீரா” தலைப்பில் இன்னும் பழைய இடுகைகளையே காட்டுவதைக் காணலாம்.

மார்ச் 29 தேதியிட்ட கூகிள் அறிவிப்பு அந்த குறிப்பிட்ட தினத்தில் இருந்த பிரச்சனையை சரி செய்ததாக சொல்லிக் கொள்கிறது. இப்போது என்னுடைய பிரச்சனை என்னவென்று புரியவில்லை. :(

செய்தி ஓடை விலாசத்தில் ஏதேனும் மாற்றம் செய்ய வேண்டுமா, விஷயம் தெரிந்தவர்கள் தயவு செய்து சொல்லவும். நன்றி

சிறு துளி.....- உலகத் தண்ணீர் தினம்

2009-03-19T05:31:00.000-07:00

மண் மரம் மழை மனிதன் வலைப்பூவில் வின்சென்ட் ஐயா உலக தண்ணீர் தினத்தை முன்னிட்டு பதிவர்கள் தம்மால் முடிந்த அளவு விழிப்புணர்வு ஏற்படுத்தக் கோரி ஒரு வேண்டுகோள் முன் வைத்தார். ஆசானின் வார்த்தைகளை சிரமேற் கொண்டு இதோ ஒரு இடுகை.

சில வருடங்களுக்கு முன் நடந்த ஒரு நிகழ்ச்சி. நீர் சேமிப்பைப் பற்றியது.

ஒரு முறை எங்கள் தொழிற்சாலை தரக்கட்டுபாடு சோதனைச் சாலையிலிருந்து ரிப்போர்ட்டுகள் வெளியிடுவதில் தேக்கம் கண்டது. காரணம் சுத்திகரிக்கப்பட்ட நீர் பற்றாக்குறை. நீர் சுத்திகரிக்கும் உபகரணம் (Distillation unit) பழுதாகி பல சோதனைகளை மேற்கொள்ள முடியவில்லை. வெளியிலிருந்து வாங்குவதற்கு முயற்சி செய்தும் பல காரணங்களால் வந்து சேரவில்லை. இதனால் கைவசம் சரக்கு இருந்தும் அனுப்ப முடியாத நிலைமை. பெட்ரோல் பங்கிலிருந்து பாட்டரி நீரையாவது வாங்கி செய்யலாம் அவற்றின் தரம் சரியில்லை என்று பதில் வந்தது.

இதைப் பற்றியே சிந்தித்துக் கொண்டு தொழிற்சாலையை சுற்றி வரும்போது குளிர்பதன அறைக்கான எந்திரத்திலிருந்து நீர் ஒரு சிறிய ப்ளாஸ்டிக் குழாய் வழியாக ஒழுகிக் கொண்டிருப்பதைக் கண்டேன். இதை ’காண்டென்சேட்’ என்று சொல்வார்கள். இது காற்றிலிருக்கும் அதிகமான ஈரப்பதம் கம்ப்ரெஸரின் உயர் அழுத்தத்தில் கனிந்து திவலைகளாகக் மாறி வெளியேறுவது.

இப்படி சதா நீர் வெளியேறிக் கொண்டிருப்பது வழக்கமான காட்சிதான் என்றாலும், அன்று மின்னலென ஒரு எண்ணம். நேரடியாக காற்றிலிருந்து கனிந்து வருவதால் அதுவும் சுத்திகரிக்கப்பட்ட நீர் தானே! அதில் எவ்வித உப்புகளும் கரைந்திருக்க முடியாதல்லவா !

உடனடியாக ஒரு நல்ல சுத்தமான குழாயை செருகி அந்த நீரை சுத்தமான கண்ணாடி குடுவையில் பிடிக்கச் சொல்லி சோதனைச் செய்யச் சொன்னேன். மூன்று முக்கிய பரிசோதனைகளிலும் வெற்றி.

1) pH =7.63; 2) conductivity= 0.0 ; 3) Total Dissolved Solids= 0.0 ppm

அன்றிலிருந்து நீரை தனிப்பட்ட முறையில் சுத்திகரிக்க மின்சார சக்தியை பயன்படுத்துவது நின்றுவிட்டது. ஏற்கனவே மின்சாரத்தால் இயங்கும் குளிர்பதன இயந்திரம் சுத்திகரிக்கப்பட்ட நீரை ஒரு உப பொருளாக தந்து கொண்டிருக்கிறது.

ஒரு நாளைக்கு 12 லிருந்து 15 லிட்டர் வரை சுத்தமான பரிசோதனைகளுக்கேற்ற நீர் கிடைக்கிறது. ஆனால் தேவையோ 10 லிட்டருக்கும் குறைவு.

10 லிட்டர் சுத்திகரிக்கப்பட்ட நீருக்கென 3KW மின்சார சக்தியை பயன்படுத்தினால் இரண்டரை மணிநேரங்கள் தேவைப்படும். அதற்கான மின்சக்தி ஏழரை யூனிட்டுகள், ஒரு மாதத்தில் சுமார் 200 யூனிட்கள் சேமிக்கப் படுகின்றது.

தொழிற்சாலையின் முழு மின்சக்தித் தேவையில் இந்த சேமிப்பு சொல்லிக்கொள்ளும் வகையில் ஒன்றும் இல்லை. ஆயினும் இதை யாவரும் கடைபிடிக்க முன்வந்தால் கணிசமான நீர் சேமிப்பும் மின்சார சேமிப்பும் ஏற்பட வாய்ப்புள்ளது என்பதால் குறிப்பிடுகிறேன்.

உதாரணத்திற்கு 1.5 ton அறை குளிரூட்டும் எந்திரம் எட்டு மணிநேரம் வேலை செய்தால் 2.5 லிருந்து 3.0 லிட்டர் தண்ணீர் வெளியேற்றும். பெரிய திரை அரங்குகள், ’மால்’களில் நிறுவப்பட்டிருக்கும் ராட்சஸ குளிரூட்டும் எந்திரங்களால் ஒரு நகரத்திற்குத் தேவையான ஜெனரேட்டர் மற்றும் வாகனங்களுக்கான பாட்டரி தர சுத்திகரிக்கப்பட்ட நீரை சுலபமாக சேமிக்கலாம்.

இப்படி நம் முன் இருக்கும் பலப்பல வழிகளை முனைப்புடன் ஒருங்கு படுத்தினால் நீர் மட்டுமல்ல மின்சக்தியையும் சேமிப்பவர்களாவோம்.

இவ்வருட தலைப்பு Transboundry water அதாவது ”எல்லைகளைக் கடக்கும் நீர்பெருக்கு” மேலும் விவரங்களுக்குhttp://www.worldwaterday.org/
மற்றும் http://www.unwater.org/

அப்பாடா ! சிறு துளிப் பெருவெள்ளம். நானும் ஒரு இடுகையை உலக தண்ணீர் தினத்திற்காக எழுதி சமர்ப்பணம் பண்ணியாச்சு.

...புதுப் புது உலகமும் அவரவர் உள்ளங்களே

2009-03-10T23:44:00.000-07:00

சுமார் இருபத்தியைந்து வருடங்களுக்கு முன் ஒரு அனுபவம்.
திருவள்ளுவர் பேருந்தில் திருச்சி செல்வதற்காக இரவு ஒன்பதரை மணியளவில் வண்டியேறி அமர்ந்தேன்.
சென்னையின் வியர்வை கசகசப்பு எப்போதடா வண்டி கிளம்பும் என்று நினைக்கத் தோன்றியது. ஒருவழியாக நடத்துனர் வண்டியிலேறினார்.சரி பேருந்து கிளம்பப் போகிறது என்று நினைத்தால் அவர் மையப் பகுதியில் நின்று பேச ஆரம்பித்தார்.

மாலை வணக்கங்கள்.பயணிகள் கவனத்திற்கு.

தாம்பரம்,செங்கல்பட்டு,மதுராந்தகம்,திண்டிவனம், விழுப்புரம் உளுந்தூர்பேட்டை, சமயபுரம், மார்க்கமாக திருச்சி செல்லும் பேருந்து சில நிமிடங்களில் புறப்படவிருக்கிறது. ஓட்டுனர் பெயர் xxxx, பத்திரமாக பேருந்தை ஓட்டிச்செல்வதில் அனுபவம் மிக்கவர். நடத்துனராகிய என் பெயர் XXXX. பயண தூரம் 310 கிமீ.பயண நேரம் எட்டு மணி நேரம். திருச்சி சேரும் நேரம் காலை 6மணி .

பயணச்சீட்டு இல்லாத பயணம் சட்டப்படி குற்றம். அபராதம் ரூபாய் 500-ம் புறப்பட்ட இடத்திலிருந்து சேரும் இடத்திற்கான கட்டணமும் வசூலிக்கப்படும்.

பயணிகள் வசதிக்காக பேருந்தில் சுகாதாரமான குடிநீர் வைக்கப்பட்டுள்ளது.

பயணிகள் தம் உடமைகளை பாதுகாப்பாக வைத்துக்கொள்ள வேண்டுகிறோம். தங்கள் கவனக்குறைவால் ஏற்படும் இழப்புகளுக்கு நிர்வாகமோ ஊழியர்களோ பொறுப்பாக மாட்டார்கள்.

தங்கள் பயணம் இனிதாகட்டும். நன்றி

கணீரென்ற குரலில் ஆரம்பித்து கடைசிவரையில் ஒரு நிரடலும் இல்லாமல் தேவைக்கேற்ற ஏற்ற இறக்கங்களுடன் அந்த நடத்துனர் அறிவிப்பை முடித்தவுடன் கடமையில் அவர் காட்டிய உற்சாகத்தை கைத்தட்டி சிலர் பாராட்டினர்.

விமானங்களில் வரும் அறிவிப்பை போல-சொல்லப்போனால் -இன்னும் சிறப்பாகவே செய்த அந்த நடத்துனருக்கு கண்டிப்பாக ஏதும் அதிக ஊதியம் கொடுத்திருக்க மாட்டார்கள்.அப்படி ஒரு அறிவிப்பை செய்ய வேண்டும் என்ற அவசியமும் அவருக்கு இருக்கவில்லை.

அவர் அறிவிப்பை செய்த விதம் பலவருடங்களாகவே அவர் இதை ஒரு கடமையாகவே செய்து வருகிறார் என்பது தெரிந்தது. அப்பேற்பட்ட ஊழியர்கள் கிடைப்பது அரிது,கிடைத்தாலும் அவர்களுக்குரிய திறமையை சரியாக பயன்படுத்திக்கொள்ளும் நிர்வாகங்களும் அரிது.

நாம் வேலையில் காட்டும் உற்சாகம்தான் பலரையும் கவர்கிறது.நாம் முழுமனதுடன் உற்சாகத்துடன் செய்யும் எந்த வேலையும் மிகச் சிறப்பாக அமைகிறது. அதை குறிப்பிடுவது தான் இந்த இடுகையின் சினா-சோனா

"OUR BEST WORK IS THAT WHICH WE DO EASILY AND JOYFULLY"

நமக்க அளிக்கப்பட்ட வேலை மிகவும் சாதாரணமானதாக இருப்பினும் அதை மேற்கொள்வதில் பல வழிகள் இருக்கும். ஒருவரது பர்ஸனாலிடி எனப்படும் தனித்தன்மையை அவர் வேலையை அணுகும் விதத்தை வைத்தே அறிந்து விடலாம்.

சந்தோஷத்துடன் நாம் மேற்கொள்ளும் எந்த வேலையும் சிறப்பானதாகவே அமையும். அதற்கு, என் நினைவில் நிற்கும்- மறக்கமுடியாத - அந்த நடத்துனரே உதாரணம்.

................

போய்வரும் உயரமும்
புதுப்புது உலகமும்
அவரவர் உள்ளங்களே!
நெஞ்சினில் துணிவிருந்தால்
நிலவுக்கும் போய்வரலாம் !!

இந்த புன்னகை என்ன விலை....

2009-02-10T17:55:00.000-08:00

நகைக்கு விலை பேசுவோர் உண்டோ
அது செய்யும் நலத்திற்(கு) அளவுண்டோ

தந்தவர் இழந்த தேதுமில்லை
பெற்றவர் மகிழ்ச்சிக் கேதெல்லை!

கணநேரத்தில் தோன்றி மறையுது
அதன் மாயம் நினைவிலே நிற்குது

இந்நகை இன்றி வாழ்வரோ
சீமானும் கோமானும் அவனியில்

நகையினால் சுகம் காணாத
தீனனும் உண்டோ தரணியில்

நகையினால் இல்லம் ஒளிருது
வாணிபம் பெருகி வளருது

சோர்ந்த உள்ளங்கள் ஆறுது
வாடிய மனங்கள் துளிருது

இயற்கையின் இன்மருந்து நகையே

இருந்த போதும்
இரவலோ,இரத்தலோ,இயலுமோ ?
வாங்கவோ,திருடவோ முடியுமோ ?

ஆயினும்
தராமல் போனால் அறிவரோ
எவரும் அதற்கான மதிப்பு ?

சோர்வில் துவண்ட நெஞ்சம்
நகைக்க இயலாதது கண்டீர்
தருவீர் ஒன்றை அவருக்கும்
காண்பீர் அது செய்யும் மாயம்

மலருதே அங்கும் ஒரு நகை

( ஒரு ஆங்கில கவிதையின் தழுவல்-ஆசிரியர் தெரியவில்லை)

வலைப் பதிவு அன்பர்களுக்கு நற்செய்தி

2009-01-29T19:17:00.001-08:00

எழுதிய இடுகைகளை எழுதியவரே படிக்க வேண்டிய நிலையா

இடுகைகள் படிக்கப்படும் முன்பே திரட்டிகளில் புதைந்து போய்விடுகின்றதா

கூகிள் ஆண்டவர் புண்ணியத்தில் அப்போ இப்போ என்று ஓரிருவர் எட்டிப்பார்க்கின்றனரா

பின்னூட்டங்கள் பெரும்பாலும் ஒற்றை படை இலக்கத்தை தாண்டுவதே கடினமா

மொக்கைக்கான ஐடியாவெல்லாம் கூட தீர்ந்து போச்சுதா

புதுசா எழுதாவிட்டால் யாரும் எட்டிப்பார்க்க மாட்டார்கள் என்ற நிலைமையா

என்னங்க இது! இதெல்லாம் எல்லாருக்கும் தெரிஞ்சதுதானே

ஆமாங்க , ஆனா ஒரு நல்ல நியூஸ்!

மேலே உள்ள எல்லாவற்றிற்கும் உங்கள் பதில் ஆமாம் என்றால் இன்னும் படியுங்கள்.

வந்துவிட்டது தேன் சிட்டு

இது திரட்டியா -இல்லை

அவார்டு பம்மாத்தா -இல்லை

அன்பர்களே தமிழ் வலையுலகிலேயே முதல் முறையாக ஒரு வலைப்பூந்தோட்டம். (தப்பா இருந்தா மன்னிச்சுக்குங்க)

தேன்சிட்டு-வளையத்தில் உறுப்பினராகுங்கள்.

தேன்சிட்டு வாசகர்களை உங்கள் வலைக்கு அழைத்து வரும்.

அதாவது வெறும் கூகிளாரையும் திரட்டிகளையும் நம்பாம இன்னொரு வழியிலேயும் வாசகர்களை உங்கள் வலைப்பக்கம் வரவழைக்க இது ஒரு வழி.

உதாரணத்திற்கு ஆன்மீகத்தேனில் இணைந்த ஒரு வலைப்பக்கம் போய் பாருங்க.

பலவகை வளையத்தில் இணைவதற்கு இங்கே செல்லவும்.

மிச்சத்தை அங்கேயே போய் படிச்சுங்குங்க ! மறக்காம என்ன தோணுதுன்னு (அங்கேயோ இங்கேயோ) சொல்லிட்டு போங்க. நன்றி

Slumdog Millionaire - வெள்ளைக்காரன் சொன்னால் ”சரி”

2009-01-25T19:38:00.000-08:00

நான் இந்த படத்தை கணிணியில் பார்த்தேன்.

படத்தின் ஆரம்பமே ஏராளமான கேள்விகளை எழுப்புகிறது.

போட்டியில் விடைகளை சரியாக சொல்லிக் கொண்டு வந்ததாலேயே ஒருவனை காவல்துறை சித்திரவதை செய்வதும் பின்னர் ஏதும் நடக்காதது போல் மீண்டும் போட்டியில் கலந்து கொள்வதும் சற்றும் ஏற்கும்படியாக இல்லை. காவல்துறை விசாரிப்புகள் தொலைக்காட்சி செய்திகள் மூலம் யாவருக்கும் தெரியப்படுத்த படுகிறது.

அப்படியானால் பல கோடிகள் செலவழித்து போட்டி ஏற்பாடு செய்திருப்பவர்களுக்கே தமது போட்டியின் தயாரிப்பு முறையில் நம்பிக்கை இல்லையா?

மனித உரிமை கழகங்கள் என்று ஒன்று இருப்பதை கதாசிரியரும் தயாரிப்பாளர்களும் அறியாரா? நமது காவல்துறையினரும் வெற்றி பெற்று வரும் ஒரு அப்பாவியை துன்புறுத்தும் அளவுக்கு ஈவு இரக்கம் அற்ற கொடியவர்களா?

வாழ்க்கையின் அவலங்களை சித்தரிக்க ஆரம்பித்தால் அதற்கு எல்லையே கிடையாது.
நிஜங்கள் என்ற பெயரில் எதை வேண்டுமானாலும் நியாயப்படுத்தி விடலாம்.

இந்தியாவில் மனிதாபிமானம் என்ற ஒன்று இல்லை, வெறும் பணவெறி பிடித்த சிலரின் ஆட்சிதான் நடக்கிறது என்பது போல் சித்தரிக்கப்பட்டிருப்பது மிகவும் அவமானகரமானது ஆகும்.

சிறுவர்களின் அபாரமான நடிப்பு, நல்ல காமிரா, திரைத் தொகுப்பு போன்ற பல தரமான அம்சங்கள் உண்டு. இந்திய படங்களின் ஃபார்முலா காட்சிகளும் உண்டு!

ஆனால் படத்தின் ஆரம்பமே மனதுடன் ஒட்டாததால் ஏதோ ஒரு படம் பார்த்தோம் என்றுதான் தோன்றியது.

இதே தரத்தில் மணிரத்தினம் மகேஷ்பட் ஷ்யாம்பெனகல் போன்றவர்கள் எடுக்கக் கூடியவர்கள்தான். ஆனால் அப்போது இந்த வரவேற்பு இருந்திருக்குமா அல்லது விருதுகள்தான் குவிந்திருக்குமா ?:((

ரஹ்மானின் இசையில் நமக்கு எதுவும் புதுமை தெரியவில்லை. (கழுதைக்கு தெரியுமா கற்பூரவாசனை ?) ஒரு வேளை வெள்ளைக்காரர்களுக்கு புதிதாக இருக்குமோ என்னமோ ? வெள்ளைக்காரன் சொன்னால் ”சரி”

surveyசனின் இடுகைக்கு பின்னூட்டமாக எழுதி, நீளம் காரணமாக தனிப்பதிவானது :)

உழுபவனுக்கு ஏது திருநாள் ?

2009-01-13T20:20:00.000-08:00

உழுபவன் கணக்கு பாத்தா உழக்குக் கூட மிஞ்சாது.

பல தென்கிழக்கு ஆசிய நாடுகளில் விவசாயம் குறைந்து வருகிறது. அதை பலரும் சுட்டிக்காட்டி நம் நாட்டிலும் அந்நிலை வந்துவிடக்கூடாது என்று எவ்வளவு சத்தம் போட்டாலும் செவிடன் காதில் ஊதிய சங்காக இருக்கிறது நம் அரசியல் நிலைமை. உழவர் சந்தை போன்ற ஒரு சில நல்ல யோசனைகள் கூட வோட்டுக்கான திட்டமாகி அங்கும் தரகர்கள் பினாமி பேர்களில் இயங்குவதாகக் கேள்வி :(

பால் உற்பத்தியில் கூட்டுறவு சங்கம், பட்டு உற்பத்தி கூட்டுறவு போல் கறிகாய் உற்பத்தி, நெல், பயிறு பிற தானியங்களுக்கும் கூட்டுறவு முறை இருக்கிறதா என்று தெரியவில்லை. ஒரு வேளை பெரும் சுவான்தாரர்கள் இவற்றில் பங்கேற்காமல் தனியாக இயங்குவதால் ஒற்றுமை இல்லையோ என்னவோ.

சூரிய இந்திரரின் அருள் எல்லோருக்கும் பொது. உழைப்பின் பலன் உரியவர்களுக்கு போய் சேர்வது நாட்டிற்கு நலம் பயக்கும். கூடியவரை சந்தையில் சென்று விளைபவருக்கு பொருளின் விலை கொடுத்தால் அதுவே நாம் செய்யும் பெரும் உதவி.

வாழையை வளர்க்க வார்த்தோம் நீர்

விற்பனைக்கும் கேட்குது வியர்வை நீர்
பேரத்தில் பொழுதை கழித்திடுவீர் நீர்
எமக்கு பசியாறக்
கிடைப்பதோ ஒரு கோப்பை தேநீர்

உழுது விளைந்தால் போதாதய்யா

உழைப்பது சந்தை வரைத் தொடருதய்யா
வெயிலோ வெங்காயமோ, எம் மனக்காயம்
புரிந்தவர் எவரும் இல்லை அய்யா

அனைவருக்கும் பொங்கல் திருநாளின் நல்வாழ்த்துகள்

புத்தாண்டு வாழ்த்துகள்

2008-12-31T03:12:00.001-08:00

தனி அஞ்சலில் தொடர்பு கொள்ள இயலாத அனைத்து வலைப்பதிவர்களுக்கும் வாசகர்களுக்கும் உளம் கனிந்த புத்தாண்டு வாழ்த்துகள்

(வாழ்த்து அட்டை தனி வலைப்பக்கத்தில் திறக்கும்)

Scribe Fire: நேற்றைய குறை இன்று தீர்ந்தது

2008-12-29T09:49:00.001-08:00

Scribe Fire பற்றிய முந்தைய பதிவில் படங்களை வலையேற்றுவதில் ஏற்படும் அளவு பிரச்சனை குறிப்பிட்டிருந்தேன். அதற்கான தீர்வு இன்று கிடைத்தது.

படங்களை வலையேற்றுகையில் Scribe Fire "max-width: 800 px வைத்து பிகாஸா வெப் ஆல்பத்திற்கு வலையேற்றுகிறது. பின்னர் வலைப்பக்கத்திலும் அதே அளவு படத்தை காண்பிக்கிறது. ஆனால் நம் வலை வார்ப்புருவில் (Template) உள்ள அகலம் அதை விட குறைவாக இருப்பதால் படத்தின் ஒரு பகுதியையே காண முடிகிறது.

உதாரணத்திற்கு கீழே உள்ள படத்திற்கு வலையேற்றியபின் கிடைத்த நிரலி

<img style="max-width: 800px;" src="http://lh4.ggpht.com/_cQDFu3JrK0o/SVetJ4hFcmI/AAAAAAAAAXM/vWhtaEx2vmI/%5BUNSET%5D.jpg?imgmax=800" />

ஆனால் வலைப் பக்கத்தில் 800 px முழுவதுமாகக் காட்டப்படாது. அதனால் 800 px வரும் இடங்களில் 400 px என்று மாற்றிக்கொள்ளவும். இதை Edit HTML லில் சென்று செய்ய வேண்டும். அப்போது படம் அளவில் குறுக்கப்பட்டு சரியாக முழுவதுமாகக் காட்சியளிக்கும்.

(அளவில் குறுக்கப்பட்டப் படம்; இதை பெரிதாக்க இணப்பு இல்லை)

அடுத்ததாக முழு படத்தையும் பெரிதாகக் காண்பிப்பதற்கு இணைப்பு தர வேண்டும். அதற்கு படத்தை highlight செய்து Add a Link மெனுவை திறந்து நிரலியில் பட இணைப்பிற்கான பகுதியை மட்டும் உள்ளீடு செய்து Ok செய்து விடவும்.

மேலே உள்ள நிரலியில் இணைப்பிற்கான பகுதி :

http://lh4.ggpht.com/_cQDFu3JrK0o/SVetJ4hFcmI/AAAAAAAAAXM/vWhtaEx2vmI/%5BUNSET%5D.jpg

இப்போது மேலே உள்ள படத்தை ப்ளாகரில் பார்ப்பது போலவே பெரிதாக்கிப் பாருங்கள்.

வெற்றி !! வெற்றி !!!

இனி எந்த சிரமும் இல்லாமல் Scribe Fire பயன் படுத்தி மகிழுங்கள். :))

நெருப்பு நரி பற்ற வைத்திருக்கும் ’தீ’

2008-12-28T09:04:00.001-08:00

இடுகைகளை பிரசுரிப்பதற்கு முன்பே தங்கள் வலைப்பூவில் எப்படித் தெரியும் என்பதை முன்னோட்டமாகப் பார்க்க Fire fox தரும் add on மென்பொருள் Scribe Fire இப்போது உதவுகிறது.

இடுகைகளை வெளியிட பலர் பலவிதமான வழிமுறைகளை கையாளக்கூடும். நான் என் இடுகைக்கானக் கட்டுரைகளை தனியாக தட்டச்சு செய்து வைத்துக்கொண்டு பின்னர் ப்ளாகரில் கடவு சொல் மூலம் உள் நுழைந்து புது பதிவிற்கான பெட்டியில் நகலெடுத்து ஒட்டுவது வழக்கம். பலர் நேரடியாக மின்னஞ்சலில் செய்வதாகக் கேள்வி. அதை முயற்சித்து பார்த்தது இல்லை.

Blogger-ல் பதிவுக்கான பெட்டிக்குள் காணப்படும் எழுத்துருவுக்கும் வலைப்பூவில் காட்டப்படுவதற்கும் சம்பந்தமே இருப்பதில்லை. மேலும் அது தரும் முன்னோட்டம் படு அபத்தம். படங்களுக்கும் எழுத்துகளுக்கும் இருக்கும் இடைவெளி மற்றும் பல பத்திகளுக்கு இடையே இருக்கும் இடவெளி இவற்றை பெட்டிக்குள் வைத்து முழுவதுமாக முடிவு செய்ய முடியாது. அதனால் இடுகையை பிரசுரித்தப் பின்பும் பலமுறை மீண்டும் மீண்டும்- திருப்தியாகும் வரை- உள்ளும் வெளியுமாக அலைந்து சரி பார்த்து இறுதியான வடிவம் தர வேண்டியதாகிறது.

Scribe Fire இக்குறையை தீர்க்கிறது.

(படத்தை பெரிதாக்கி பார்க்கவும்)

இதன் முக்கிய பயன்கள் :

1. உங்கள் முழு இடுகையையும் ஆன்-லைனில் வராமலே வலைப்பூவில் தெரிவது போல் முன்னோட்டமாகப் பார்க்க இயலும்.

2. Scribe Fire லிருந்து நேரடியாக வலைப்பூவில் பிரசுரிக்கவும் முடியும்.

3. உங்களுக்கு பல வலைப்பூக்கள் இருப்பின் எல்லா வலைப்பூக்களிலும் முன்னோட்டம் பார்க்க முடியும். அதற்கு ஒரே ஒருமுறை நீங்கள் ஆன் -லைனில் அந்த வலைப்பூவுடன் Scribe Fire மூலமாக தொடர்பு கொண்டிருக்க வேண்டும். அதன் பின் இணைய இணைப்பு இல்லாவிட்டாலும், சேமித்து வைத்துக் கொண்டுள்ள வலைப்பூவின் வார்ப்புருவின் மூலம் அந்த இடுகை எப்படித் தெரியுமோ அதை அப்படியே முன்னோட்டமாகக் காட்டுகிறது.

4. இதிலிருக்கும் Tool bar அதிகமான பல உள்ளீட்டு கருவிகளை கொண்டுள்ளது.

5. நீங்கள் பிரசுரித்த இடுகைகள் அனைத்தையும் Posts என்ற பெயரிலும் தயாரிப்பில் இருக்கும் இடுகைகளை Notes என்ற பெயரிலும் சேமித்து வைத்துக் கொள்கிறது. இதனால் எல்லா பதிவுகளைப் பற்றிய அனைத்து விவரங்களையும் ஒரே சொடுக்கில் வந்து பார்க்க முடியும். சிதறிக் கிடக்கும் பல கோப்புகளுக்கிடையில் பழைய இடுகைகளுக்கான கோப்புகளை தேட வேண்டிய அவசியம் இல்லை.

(படத்தை பெரிதாக்கி பார்க்கவும்)

6. விளம்பரங்கள் மூலம் வருவாய் விழைவோர்க்கு உதவும் வகையிலும் திரட்டிகளில் நேரடியாக பிங் செய்யக்கூடிய வகையிலும் பல கூடுதல் வசதிகளும் உள்ளன.

முன்னோட்டம் Scribe Free பெட்டிக்குள்

(படத்தை பெரிதாக்கி பார்க்கவும்)

ஒரு பெரிய குறை: படங்களை ப்ளாகர் செய்வது போல் Auto size செய்வது இல்லை. API மூலம் வலையேற்றப்படும் படங்கள் பிகாசா வெப் ஆல்பம்-ல் Drop box என்ற பெயரில் சேகரிக்கப்பட்டு முழு அளவில் வலைப்பூவில் காட்டப்படுகிறது. அதனால் வார்ப்புருவின் அளவை விட பெரிதாக இருந்தால் பாதி படம் மட்டுமே காட்டப்படுகிறது. கீழே பார்க்கவும். இது Scribe Fire மூலம் வலையேற்றப்பட்டது.

ஆகையால் படங்களே இல்லாத அல்லது சிறிய அளவு படங்களுடைய பதிவுகளுக்கு Scribe Fire பெரும் பயன் தரும். பெரிய படங்களை காட்டவேண்டிய கட்டாயம் இருந்தால் Scribe Fire லிருந்து draft mode ல் வலையேற்றி பின்னர் ப்ளாகர் உள் நுழைந்து படங்களை தனியாக வலையேற்றி இடுகையின் கட்டமைப்பை சரி செய்ய வேண்டும்.

இப்போது அப்படித்தான் செய்திருக்கிறேன். :-)
Scribe Fire-ல் நான் விரும்பும் இப்போது இல்லாத இன்னொரு ஒரு வசதி, செய்த தவறைத் திருத்துவதற்கான Undo பொத்தான்.

பிற்சேர்க்கை :29/12/2008
படங்களை வலையேற்றுவதில் உள்ள பிரச்சனை தீர்க்கப் பட்டுவிட்டது. இதற்கு அடுத்த பதிவை காணவும்.

காக்கா கூட்டத்த பாருங்க,அதுக்கு சொல்லி கொடுத்தது யாருங்க

2008-12-23T09:16:00.000-08:00

இரஸ்கின் பாண்ட் (Ruskin Bond) ஒரு ஆங்கிலோ இந்தியர். எழுத்து உலகில் மிகவும் புகழ் பெற்றவர். ஆங்கிலேயர் இந்தியாவை விட்டு வெளியேறிய பின்னரும் இந்தியாவிலேயே தங்கி விட்டர். அவர் எழுதும் கதைகள் கட்டுரைகள் உலக அளவில் பெரிதும் விரும்பி படிக்கப்படுகிறது.சாகித்திய அகடெமி விருது பத்மஸ்ரீ விருதுகளால் கௌரவிக்கப்பட்டவர்.

ஒரு காகத்தோடு உரையாடுவது போல் அவர் எழுதிய கட்டுரை ஒன்றை காண்போம்.

ஒரு காகம் எழுத்தாளனுக்கு வாழ்க்கைத் தத்துவத்தை போதிக்கிறது.

நம் நாட்டில் இது ஒன்றும் அதிசயம் இல்லை.காகபுசுண்டர் என்று ஒரு சித்தர். ஒரு காகத்தின் வடிவில் கல்லால மரத்திலிருந்து கொண்டு பல யுகங்கள் வாழ்ந்து கண்ட உண்மைகளையும் தத்துவங்களையும் புசுண்ட நாடி, காகபுசுண்டர் ஞானம், காகபுசுண்டர் காவியம்,காகபுசுண்டர் குறள் என்ற பெயர்களில் தொகுக்கப்பட்டதாக கூறுகின்றனர்.

இப்போது ஆங்கில காக புசுண்டர் (Ruskin Bond) தத்துவத்தை பார்ப்போம்.

கோடை நாளில் ஒரு மாலை வேளை. ஊதா வர்ண மலைகளில் மழையைக் குறிக்கும் மேகம் சூழத் தொடங்கியிருந்தது. மேனி பளபளக்க ஒரு கரிய காகம் ஜன்னல் அருகே வந்தமர்ந்தது.

தலையை ஒரு புறமாகத் திருப்பி “ஏது! அய்யா இன்னிக்கி கவலையா இருக்காரு. நம்மாலெ ஏதாச்சும் முடிஞ்சா செய்யிறேன் “ என்று சொல்லி உரையாடலை ஆரம்பித்தது.
ஆடும் சாய்நாற்காலியில் மெதுவாக மேலும் கீழுமாக அசைந்து கொண்டு வாழ்க்கையின் ஓட்டத்தையும் ஏமாற்றங்களையும் அசைப்போட்டுக் கொண்டிருந்த என்னைப் பார்த்தால் அப்படித்தான் இருந்திருக்கும் போலிருக்கு. எதிர்பாராத அதன் வரவால் என் தனிமை கலைந்தது.

“மன்னிக்கணும், கேட்டது புரியலெ” என்றேன் பணிவாக.

இப்போதெல்லாம் தெரியாதவர்களிடம் பேசும்போது பணிவாக இருப்பது அவசியம். சிலரிடம் கத்தியும் துப்பாக்கிகள் கூட இருக்குமாம்.

“ஒண்ணுமில்லே.சும்மாதான், முகத்திலே சந்தோஷத்தை காணோமேன்னு கேட்டேன்.அவ்ளோதான்” என்றது காகம்.

“நிஜம் தான்,அதுக்கு யாரும் எதுவும் செய்யமுடியாது. அது உனக்கு சம்பந்தப்பட்ட விஷயமும் அல்ல” என்றேன்

“அதை மட்டும் சொல்லாதே “

”அப்படீன்னா ? ....இப்போ என்ன சொல்ல வர்றே ?”

“இதோ பார்.நானும் மனுஷனா இருந்தவன் தான். சாங்-சு வோட சீடனாயிருந்தேன்; எபிக்டஸ்-ஸோட ஃபிரெண்டாயிருந்தேன். புராணத்துல கஷ்யபன் காலத்திலேந்து எல்லாத்தையும் பார்த்தவனாக்கும் !”

“என்ன அதனாலே.இப்ப நீ காக்கா தானே. இதுவா முன்னேறுகிற லட்சணம்?”

“தெரியாத்தனமா போன ஜன்மத்துல அரசியல்ல புகுந்துட்டேன். அதனால வந்த வினை. இந்த பிறவியில கொஞ்சநாள் காக்காயாக சுத்தணும். நிஜம்மா பாத்தா காக்காய் ஜன்மம் ஒண்ணும் மோசமில்லை. வேணுமின்னே எங்களுக்கு ஒரு கெட்ட பேரு காக்கா-கூட்டமின்னு. எல்லா பறவைகள விடவும் எங்களுக்கு புத்திசாலித்தனமும் பொழச்சுபோற குணமும் அதிகம். அந்த பொழைக்கிற வழி தெரியாமத்தானே நீ தவிக்கிறே.”

அட ! கரெக்டா பாய்ண்டப் புடிக்குதே இந்த காக்காய். எழுத்தாளனா பொழைப்பு நடத்துணமின்னா ரொம்பவே சிரமப்பட வேண்டியிருக்கு.

”என்னாலே என்னென்ன முடியுமோ அவ்வளவும் செய்துகிட்டுதான் இருக்கிறேன்”

மெல்ல ரெண்டு தத்து தத்தி பக்கத்தில் வந்தது.

”அது தான் நீ பண்ற தப்பு. வெறும் உழைப்பு உழைப்புன்னு இருந்தா வெற்றி வந்திடுமா? எவனொருத்தன் ரொம்ப குறைச்சலா செஞ்சு ரொம்ப அதிகமா பயனடைவானோ அவன் தான் நிஜம்மாலுமே வெற்றி பெற்றவனாக்கும்.”

“எழுதாமையே பெரிய எழுத்தாளனா எப்படி ஆக முடியும்?” என்றேன் காரமாக.

“தப்பா புரிஞ்சுக்கிட்டே நீ. நான் சோம்பேறி யா இருக்கச் சொல்லவில்லை. எங்கேயாவது சோம்பேறி காக்காயைப் பார்த்திருக்கியா? பார்த்திருக்க முடியாது. சரி ரொம்ப கஷ்டப்பட்டு உழைக்கிற காகத்தையாவது பார்த்திருப்பியா ? அதுவும் முடியாது. ஆனா எங்களுக்கு எப்பவுமே எல்லாத்துலேயும் ஒருகண் இருந்துகிட்டே இருக்கும். அதுதான் சமய சந்தர்ப்பம்.”

இன்னும் சற்று அருகே தத்தி வந்து கையில் வைத்திருந்த ரொட்டித்துண்டை லபக்கென்று இழுத்தது.

“பார்த்தியா, எனக்கு வேண்டியது கிடைச்சுதா இல்லியா! அதுவும் கஷ்டப்படாமலே. கவனிக்க வேண்டியது என்னான்னா சரியான சமயத்தில சரியான இடத்தில இருக்கணும்.”

எனக்கு அது செஞ்சது பிடிக்கவில்லை.

“ஆமாம் ஆமாம், அடுத்தவனோட தீனியைப் பிடுங்குவது தான் உன் வழி என்றால் அது எழுத்தாளனுக்கு எப்படி பொருந்தும்? அடுத்தவங்களோட எழுத்தை காப்பி அடிக்கச் சொல்லிறியா?”

“அதை செய்யிறவங்களும் நிறைய பேர் இருக்காங்க. ஆனால் நான் சொல்ல வந்தது அதுவல்ல. கொஞ்சம் விவரமானவனா இரு அப்படீன்னு தான். ரொம்ப பேரோட-எழுத்தாளனும் அதில் அடங்கும்- பிரச்சனை என்னான்னா அளவுக்கு அதிகமான எதிர்பார்ப்புகள் தான். ஒரு ரொட்டித்துண்டு போதும்னு சும்மா இருக்காமே ஒவ்வொரு சாப்பாட்டையுமே பெரிய கல்யாண விருந்தா எதிர்பார்க்கிறீங்க. எங்கேயாவது முடியுமா? இதுதான் நீங்க செய்யிற முதல் தவறு ”

ரெண்டாது மிஸ்டேக் என்னான்னா ’விரட்டி’கிட்டே போறது. பெரியவரே நான் சொல்றது எழுத்தாளனுக்கு மட்டுமில்லே எல்லாருக்கும்தான். எல்லாருமே என்ன வேண்டுறோம்? வெற்றி வெற்றி. இப்ப நான் ஒரு வெற்றிகரமான காக்கை; நீ ஒத்துகிட்டாலும் இல்லாட்டியும் அதுதான் நெஜம்.நாம் தேடறது கெடச்சுட்டா அது ’வெற்றி’. பொறுத்திரு,பார்த்திரு,அடைந்திடு. எல்லாத்தையும் சேர்த்து என் கொள்கைன்னு சொல்லணும்னா ’விழித்திரு’.

நான் வேட்டையாடி தின்னும் பறவையுமில்லை.நீயும் வேட்டையாடும் மிருகமும் இல்லை. அதனால்தான் துரத்தி பிடிச்சு வெற்றி அடைவது என்பது முடியாத காரியம். எப்படி வேட்டையாடப் படுகிற பிராணி தப்பிச்சு ஓட பார்க்குமோ நாம் துரத்துற சமாச்சாரமும் நம்மை விட்டு ஓடத்தான் பார்க்கும். இந்த வெற்றியும் அப்படிதான். நீ எவ்வளவு வேகமா புடிக்கப் பாக்குறியோ அவ்வளவு வேகமா ஓடும்.”

”இப்போ என்ன செய்யணுமிங்கிறே? புத்தகம் எழுதிட்டு மறந்து போ ன்னு சொல்றியா?”

”சரியா சொன்னே.மறந்து போ ன்னு சொல்லமாட்டேன். உலகத்தோட மூலை முடுக்குக்கெல்லாம் அனுப்பி வை.ஆனா ரொம்ப பெரிசா எதையும் எதிர்பார்க்காதே. அதையே நெனச்சு புலம்பிக்கிட்டு இருக்காதே. அதுதான் மூணாவது தப்பு. வராததை நெனச்சுக்கிட்டு புலம்புறது. எப்ப புலம்ப ஆரம்பிக்கிறியோ அப்போ மூளைக்கு வேற எதையும் யோசிக்கிற சக்தி போயிடும்”

“உம்.நீ சொல்றதும் சரிதான். நான் கவலைப்படுற ஜென்மம் தான்”

“தப்பு.பெரிய தப்பு. எதப்பத்தி கவலைப் படுறே?”

“எவ்வளவோ சின்னச் சின்ன விஷயங்கள்”

“பெரிசா எதுவும் ?”

“இப்போதைக்கு இல்லே”

“ஆனாலும் பெரிசா ஏதோ கெட்டது நடக்கப் போவுதுன்னு ஒரு பயம் ?”

“முன்கூட்டியே எதிர்பார்த்திட்டா மனசு தயாரா இருக்குமில்ல “

“எங்க அகராதியில அது கெடையாது. நாங்க எப்பவுமே நல்லதயே எதிர்ப்பார்போம்”

கொஞ்சம் நகர்ந்து பீர் குவளைக்குள்ளே தலைய விட்டு பீரை உறிஞ்ச ஆரம்பித்தது.

“ஆமா பீர் குடிக்கிறதுக்கு காசு இருந்தா வசதியா இருக்கேன்னுதான்ன அர்த்தம்”

“நான் ஒண்ணும் தினம் குடிக்கிறது இல்லை. அது சரி என்மேலே உனக்கு என்ன அவ்வளவு அக்கறை ?”

காகம் கழுத்தை ஒரு பக்கம் சாய்த்து பார்த்தது

“உன்னை எனக்கு பிடிச்சிருக்கு அதனாலத்தான். நீ எங்க வர்க்கத்துக்கு தொந்தரவு செய்யறது இல்லை”

“நான் உங்க வர்க்கத்தை அதிகமா கண்டுகிட்டது கிடையாது”
“ அடப் பரிதாபமே. எவ்வளவு விஷயம் எங்ககிட்ட கத்துக்கறதுக்கு இருக்கு! சுதந்திரம்,பொழைக்கிற வழி,ஜாலியா இருக்கறது இப்படி எத்தனையோ! எங்களைப்பத்தி எழுதாத பெரிய எழுத்தாளனே இருக்க முடியாதே. ஹூம் “

பீரை இன்னொரு தடவை உறிஞ்சி இறக்கையை ரெண்டு முறை படபடத்து விர்ரென்று மேலே கிளம்பி பக்கத்துல இருக்கிற பிரியாணி கடை பக்கமாக பறந்தது.

(Delhi is not Far by Ruskin Bond. Penguin Books ISBN:0-14-024606-1)

BOSS பற்றி கொஞ்சம் சொல்லுங்களேன் !

2008-12-14T23:49:00.000-08:00

இது ’சிவாஜி த பாஸ்’ பற்றி அல்ல.

அல்லது என்னோட பாஸ் பற்றியதும் அல்ல !

நான் கேட்க விரும்புற BOSS, பாரத் ஆபரேடிங் சிஸ்டம் சொல்யூஷன்ஸ்-ங்கற C-DAC அறிமுகப்படுத்தியிருக்கிற புது மென்பொருள் பற்றியது. லினெக்ஸ் திறந்த கட்டற்ற மென்பொருள் அடிப்படையில் உருவாக்கப்பட்டிருக்கும் இதன் முக்கிய நோக்கம் இந்திய மொழிகளில் கணிணி பயன்பாட்டை விரிவாக்குதல் ஆகும்.

இதில் கட்டளை நீட்சிகள் எல்லாம் தமிழ் மற்றும் இந்தி போன்ற இந்திய மொழிகளிலே காணக் கிடைக்கிறது என்று கூறப்படுகிறது.

லினக்ஸ் சார்ந்த டெபியன், உபுண்டு போன்ற சேவைகளால் இது முடியாததாகையால் இது முக்கியத்துவம் பெறுகிறது

இதில் Fire fox 3.0 உலாவியும் வெற்றிகரமாக இணைக்கப்பட்டிருப்பதாகவும் 18000 பலவேறு மென்பொருட்கள் தரவிறக்கம் செய்து பரவலாக பயன் படுத்த் முடியும் என்றும் c-DAC வல்லுனர்கள் கூறுகிறார்கள். மேலும் வலையுலகில் வலம் வர மிகவும் பாதுகாப்பானது என்றும் சொல்கிறார்கள்.

இதை யாரவது நமது வலையுலக நண்பர்கள் பயன் படுத்தியிருந்தாலோ அல்லது அனுபவங்களை ஏற்கனவே பதிந்திருந்தாலோ அதற்கான இணைப்புகளை கொடுத்தால் என் போன்ற வாசகர்களுக்கு பயனுள்ளதாக இருக்கும்.

சில ஆங்கில குழுமங்களில் தேடிய விவரங்கள் பயனளிப்பதாக இருக்கவில்லை.

ஹைதராபாத்தில் இம்மாதம் 18 ஆம் தேதி இலவச விழிப்புணர்வு கூட்டம் நடைபெற இருக்கிறது. அதற்கு வலைப்பக்கம் மூலமாகவே பதிவு செய்து கொள்ள முடியும். அங்கு வசிக்கும் நண்பர்கள் இதை பயன் படுத்திக்கொள்ளவும். இலவச குறுந்தகடுகள் கிடைக்க வாய்ப்பிருக்கிறது !!

எப்படியோ கிராம கிராமங்களுக்கும் கணிணியை கொண்டு செல்வதில் ஒரு முக்கியமான முன்னேற்றம் வந்திருப்பது மகிழ்ச்சி

கூகிள் க்ரோம் தந்த அதிர்ச்சி

2008-12-10T07:06:00.000-08:00

இன்று மாலை கூகிள் க்ரோம்-ல் HDFC வங்கிக் கணக்கை Net Banking ல் திறந்து வேண்டியவர் ஒருவரின் இன்னொரு வங்கி கணக்கிற்கு பணம் செலுத்த விழைந்தேன்.
Third party transfer ஆதலால் அவருடைய பெயரை நேற்றே பதிவு செய்து,அவர்கள் சொல்லியிருந்தபடி 24 மணிநேரம் கழித்து ஒப்புதல் இருப்பின் பணம் செலுத்த வேண்டும் என்பதால் ஒப்புதலை அறியவும் பணம் செலுத்தவும் முறைப்படி உள்நுழைந்தால் எனக்கு அதிர்ச்சி.
மூன்றாமவருக்கான பணம் மாற்றுவதற்கான நீட்சி (menu) காணப்படவில்லை. Sidebar menu விலும் காணப்படவில்லை.

ஏதேனும் தவறாகி அந்த வசதியே முடக்கப்பட்டுவிட்டதா என்ற குழப்பம் ஏற்பட்டது. ஏனெனில் இது நான் கல்லூரியில் படிக்கும் என் மகனுக்காக தொடர்ந்து உபயோகித்துவரும் ஒரு சேவை. ஆகையால் முடக்கப்பட்டு விட்டால் பல பிரச்சனைகள் ஏற்படுமே என்ற கவலைத் தொற்றிக்கொண்டது.

சரி, உள் நுழையும் போதே ஏதேனும் கவனிக்காமல் விட்டிருப்போமோ என்று ஒருமுறை வெளியேறி மீண்டும் கவனமாக ஒவ்வொரு அடியையும் கவனித்து சரிபார்த்து உள்நுழைந்தேன். திரும்பவும் அதே பிரச்சனை.

ஏதடா இது மதுரைக்கு வந்த சோதனை யாரிடம் முறை போக வேண்டும் என்று யோசித்தேன். நேற்றுவரை சரியாக இருந்தது இன்று எப்படி மாறிவிடும் ? பளிச்சென்று ஒரு உண்மை புரிந்தது. நேற்று உட்புகுந்தது Firefox உலாவியில். இன்று Chrome-ல்!!

இன்னுமொருமுறை நரியாரை தூது விடுவோம் என்று Firefox மூலம் உட்புகுந்தால் எல்லா நீட்சிகளும் (மெனுக்களும்) அழகாக இருக்க வேண்டிய இடத்தில் இருந்தன.

வந்த வேலையை முடித்துவிட்டு firefox லிருந்து வெளியேறி மீண்டும் GOOgle Chrome-ல் உட்புகுந்தால் பழைய கதைதான். மேலிருக்க வேண்டிய நீட்சிகள் காணப்படவில்லை.
இந்த பிரச்சனை வங்கியைச் சேர்ந்த வலைத்தள அமைப்பாளர்கள் சரி செய்ய வேண்டியதா அல்லது கூகிள் க்ரோம் சரி செய்ய வேண்டியதா ?

நிபுணர்கள் இதை சம்பந்தப் பட்டவர்கள் கவனத்திற்கு கொண்டு சென்றால் பலருக்கும் உதவியாக இருக்கும்.

அமைதிக்கு திறவுகோல்- தாயின் அன்பு

2008-12-02T07:01:00.000-08:00

God could not be everywhere and therefore he made mothers. ~Jewish Proverb

அமைதியை தேடித் தவிக்கும் மக்கள் அதற்கான திறவுகோலை தம்மிடமே வைத்துக் கொண்டு வெளியே தேடிக் கொண்டிருக்கின்றனர்.

Men are what their mothers made them. - Ralph Waldo Emerson

All that I am, or hope to be, I owe to my angel mother. - Lincoln

Let France have good Mothers, and she will have good sons. - Napoleon

ஒவ்வொரு தாயும் தன் குழந்தையை பலர் போற்ற வாழ்வதைக் காண ஆசைப்படுவாள். அவள் தன் மகனோ மகளோ வன்முறையில் ஈடுபட்டு பலருக்கும் துன்பம் விளைவித்து தனக்கும் துன்பம் தேடிக்கொள்வதை விரும்புவாளா ?

குறிக்கோள் எவ்வளவே உயர்வாயினும் அதை அடைய தீவிரவாதம் முறையான வழியாகது. வன்முறையில் ஈடுபடுபவர்கள் சமூக விரோதிகள்.

வன்முறையை ஒழிக்க வேண்டுமென்றால் முதலில் தொலைக்காட்சிப் பெட்டியே கதியென்றிருக்கும் லட்சக்கணக்கான தாய்மார்களிடம் இந்த உணர்ச்சிகளை அழுத்தமாகத் தூண்டிவிட வேண்டும்.

அந்த அடிப்படையில், செப்டெம்பெர் 11-ல் விளைவிக்கப்பட அழிவிற்கு பிறகு, அக்கருத்தை மையப்படுத்தி ஒரு சிறு விளக்கப்படம் ஒன்றை 2001-ல் தயாரித்து அதை ஒரு வலைப்பக்கத்தில் போட்டு வைத்திருந்தேன். இப்போது மும்பய் வன்முறை கண்ட பிறகு அதன் அவசியம் இன்னமும் அதிகமானது போல் உணர்கிறேன். அதனால் அதை இந்த வலைப்பக்கத்திலும் ஒரு முறை இணைத்து விடுகிறேன்.

Power of the Mother

View SlideShare presentation or Upload your own. (tags: fraternity peace)

மதிப்பிற்குரிய மேதகு அப்துல்கலாம் அவர்கள் தன் தாய்க்கு சூட்டும் நன்றிக் கவிதையையும் படியுங்கள்

Mother

My Mother, you came to me like heavens carrying arms,
I remember the war days when life was challenge and toil-

...

All this pain of a young boy
My Mother you transformed in to pious strength
With kneeling and bowing five times
For the grace of the Almighty only my Mother
Your strong piety is your children's strength
You always shared your best with to whoever needed the most,
You always gave and gave with faith in him,

I still remember the day when I was ten,
Sleeping on your lap to the envy of my elder brothers and sisters.
It was full moon night, my world only you knew Mother!, My Mother!
When at midnight, I woke with tears falling on my knee
You knew the pain of your child, My Mother.
Your caring hands, tenderly removing the pain
Your love, your care, your faith gave me strength,
To face the world without fear and with His strength.
We will meet again on the great Judgment Day. My Mother!

மாதாவை ஒருநாளும் மறக்க வேண்டாம்
வஞ்சனைகள் புரிவாரோடு இணங்க வேண்டாம் -- உலகநீதி

சொதப்பிட்டாங்கய்யா சொதப்பிட்டாங்க !

2008-11-30T06:29:00.000-08:00

எதிரிகள் பாசறையில் ஒரு அவசரக்கூட்டம்.

”வெற்றி வெற்றி, கலக்கிட்டாங்கப்பா கலக்கிட்டாங்க” தொண்டர்கள் பெரும் சந்தோஷத்துடன், டைமஸ்- நௌ மற்றும் சி என் என், பார்த்தபடியே கைத்தட்டிக்கொண்டிருந்தனர்.

இந்திய அரசியலில் ஒருவரை ஒருவர் திட்டிக்கொள்வதும் இறந்து போனவர்களின் இறுதி யாத்திரைகளும், பெரும் புள்ளிகள் வரிந்து கட்டிக்கொண்டு அரசாங்கத்தையும் போலீஸையும் “மை ஃபுட்” என்று திட்டித் தீர்ப்பதும் அளவில்லாத ஆனந்தத்தை அவர்களுக்கு அளித்துக் கொண்டிருந்தது.

திடீரென்று சப்தமெல்லாம் அடங்கி யாவரும் நிமிர்ந்து அமர்ந்தனர். பாஸ் உள்ளே வந்து அமர்ந்தார்.

”கங்கிராசுலேஷன்ஸ் பாஸ். உங்க மாஸ்டர் மைண்ட் அப்படியே இந்தியாவையே கலக்கிடுச்சே” பாராட்டினார் ஒரு அடிவருடி.

பாஸ் முகத்தில் ஒரு சிறு அரைமனதான புன்முறுவல் மட்டும் பதிலாக வந்த்தது.

”என்ன பாஸ் ச்ந்தோஷமாயில்லையா ?”

”எப்படி ஓய் சந்தோஷமா இருக்க முடியும் ? சொதப்பிட்டாங்க, சொதப்பிட்டாங்க” வெறுப்புடன் பதில் சொன்னார் பாஸ்.

ஆஹா! ஏதோ எக்குத்தப்பாயிட்டிச்சு அப்படிங்கறது அடிவருடிகளுக்கு புரிந்தது. சரி பாஸ்-ஸே அடுத்து ஆரம்பிக்கட்டும் என்று மௌனம் காத்தனர் அடிவருடிகள்.

மொத்தம் எத்தனை பேரை அனுப்பினோம் ?

பதினைந்து

சொன்னதை செஞ்சாங்களா?

”கிட்டத்தட்ட செஞ்சிட்டாங்களே பாஸ். தாஜ் ஓட்டலும் ட்ரைடென்னும் இன்னும் ஒரு வருஷம் ஆகும் சரி செய்ய. கொறஞ்சது 100 கோடி நஷ்டம். 200 பேர் பப்ளிக்ல செத்திருக்காங்க. இதுக்கு மேலே பதினைஞ்சு பேர் என்ன செய்ய முடியும் பாஸ்?” சற்று கெஞ்சலான பதில் வந்தது.

”நாம ஒவ்வொருத்தனுக்கும் கொடுத்திருக்கிறது ஒரு கோடி. அது இல்லாம இவங்களுக்கு ட்ரெயினிங், பொய் தஸ்தாவேஜ், பிரான்சு, மொரிஷியஸ் செலவு, ஸாட் ஃபோன் செலவு இந்தியாவில இருக்கிற ஏஜெண்டுகளுக்கு காசு அப்படி இப்படின்னு செஞ்சிருக்கிறது இருபது கோடி. செலவழிச்ச காசுக்கு பலன் பத்தாதுன்னு சொல்றாங்கையா மேலிடத்துல.கொறஞ்சது ஒரு ஓட்டலையாவது தரைமட்டமாக்கியிருந்தா கொஞ்சம் நிமிர்ந்து பதில் சொல்லமுடியும்.இப்ப எந்த மூஞ்சிய வச்சுகிட்டு மேலிடத்தில நான் முழிக்கிறது?”

”பாஸ் ரெண்டு நாள் ஸ்டாக் மார்கெட் வேலை செய்யலை. அதானாலெ வந்த நஷ்டம் எவ்வளவு வேணுமானாலும் வைச்சுகலாம் பாஸ். சும்மா போடுங்க ஒரு குத்து மதிப்பா ஒரு ரெண்டாயிரம் கோடி” ஒரு பாய்ண்ட் எடுத்து குடுத்தான் இன்னொரு புத்திசாலி.

பாஸின் முகத்தில் ஒரு ஏற்பு தெரிந்தது. ”உம் அதுவும் சரிதான். வெளிநாட்டு முதலீடு எல்லாம் திருப்பி கொண்டு போயிடுவாங்க. அதனால வர்ற நாட்களெல்லாம் இந்திய பொருளாதாரம் அடிவாங்கிடும் அப்படி இப்படின்னு ஏதாவது சொல்லி சமாளிக்க வேண்டியதுதான்.”

பாஸ்-ஸின் கவலை தீரவில்லை.

”அந்த முட்டாள் கஸாப் ஏன்யா மாட்டிக்கிட்டான்? ஆரம்பத்திலேயே சொல்லியிருந்தோம். ’செய் அல்லது செத்துமடி’-ன்னு எத்தனை தடவை ட்ரெயினிங்-ல சொல்லியிருப்போம். சாகமா மாட்டிக்கிட்டு இப்போ எல்லோரையும் காட்டிக் குடுத்தாட்டேனே. அவனாலே எல்லாம் வெளியே வந்திடிச்சு” வெறுப்பை உமிழ்ந்தார் பாஸ்.

“அதுக்குதான் பாஸ், எனக்கு இந்த சின்ன வயசு பசங்களைக் கண்டால் நம்பிக்கையில்லை. நீங்க யெங்-கா இருக்கணும், இங்கிலீசு படிச்சவனாயிருக்கணும், சாட் ஃபோன் யூஸ் பண்ணத் தெரிஞ்சிருக்கணும் அப்படி இப்படின்னு சொன்னதுனாலதான் இப்படி ஊத்திக்கிச்சு. கொஞ்சம் கம்மி படிச்ச நம்மூர் ஆளுங்க இதே வேலைய பாதி செலவுல செஞ்சு காமிச்சிருப்பாங்க பாஸ்.”

பாஸ் எதுவும் காமித்து கொள்ளாமல் அடிவருடியின் முகத்தைப் பார்த்தவாரே மேலும் பேசவிட்டார்.

”புலிய பார்த்து பூனை சூடு போட்டுக்கலாமா பாஸ். வொர்ல்ட் ட்ரேட் செண்டர் அமெரிக்காவுல இருந்துச்சு. அதுக்கு படிச்ச பசங்க ஏரோப்ளேன் ஓட்ட தெரிஞ்சவங்க எல்லாம் வேணும். அல்-காய்தால அதுக்கு தோதா எல்லாம் இருந்து பண்ணி குடுத்தாங்க. இந்த சொத்தை இந்தியாவுல ரெண்டு பில்டிங்ல பாம்ப் வச்சு முடிக்க வேண்டிய வேலைக்கு AK-47, ஹாண்ட்-கிரெனேட் ட்ரெயினிங் எல்லாம குடுத்து அனுப்பணும் ?” அடிவருடியின் கிண்டல் கொஞ்சம் எல்லை மீறியது.

பாஸுக்கு கோபம் வெடித்தது. “முட்டாள் தனமா பேசாதேய்யா. நாம சொன்னது ஓட்டல்-ல இருக்கிற வெள்ளைக்காரப் பசங்களை சிறை புடிச்சு அவனுங்க நாட்டுலேர்ந்து பெரும் பணம் புடுங்கணும். அதுக்கப்புறம் ஒரு வெளிநாட்டானும் இந்திய பசங்களோட பேச மாட்டான். ரொம்ப அன்-ஸேஃப் அப்படீன்னு ஊரை காலி பண்ணிடுவாங்க. அதுல எதுவும் நடக்கலை. 25000 ரூபாய்க்கு கோழிக்கறியும் சாப்பாடும் வாங்கிகிட்டு நாரிமன் ஹவுஸ்-ல பூந்து நாறி போய்டானுங்கைய்யா. சொன்னதுல ஒண்ணும் நடக்கலை. அதுக்குதான் சொன்னேன் சொதப்பிட்டாங்கய்யா சொதப்பிட்டாங்க”

அவர்களோடு மேலும் பேசுவதில் அர்த்தமில்லை என்று மேலிடத்துக்கு சொல்ல வேண்டிய பதிலைப் பற்றிய கவலையில் பாஸ் வெளியேறினார்.

பாதைத் தவறிய கால்கள்

2008-11-27T23:18:00.000-08:00

மும்பய் வன்முறைகளைப் பற்றிய, ராமலக்ஷ்மி அவர்களின், மனக்குமறல் முத்துச்சரம் வலைப்பூவில் மனதைத் தொடும் ஒரு கவிதையாக மலர்ந்திருக்கிறது. கலங்கி நிற்கும் எவர்க்குள்ளும் எழும் நியாயமான உணர்வுகள் அவை. ஆனால் கலங்கி நிற்பது மன உறுதியை குலைத்திடும். காலனையும் காலால் மிதிக்கத் துணியும் பாரதியின் வீர உணர்ச்சி இருந்தால் தான் பிரச்சனைகளுக்கு தீர்வு காண இயலும். ஆகவே இன்னொரு கவிதையை பாரதியின் கோணத்தில் படைத்திருக்கிறேன்.

இதற்கு வித்திட்ட ராமலக்ஷ்மி அவர்களுக்கு நன்றி.

என்னதான் செய்வீர்,செய்திடீர்
எதுவரை செல்வீர்,சென்றிடீர்
குள்ள நரிகளின் கூட்டம்
எததனை தினங்கள் ஆட்டம்

கட்டிக்கொடுத்த சோறு காணுமோ
குறியற்ற பயணத்தில்,மூர்க்கரே
வெட்டி முறிப்போம் உம் கால்களை
வன்முறை கொள்ளும் கைகளையுமே

குழம்பிய குட்டையில் மீனோ
கனவு காணும் மூடர்களே
பாரத தேசம் சிறு குட்டையோ
குழப்பிடின் எதிர்வரும் சுறாக்களே

மனிதத்தை மறப்பது புனிதமோ
மாற்றலரை அழிப்பது பாவமோ
மந்தபுத்தி யர்தம் கையோங்குமோ
மருண்டு மடிவதும் விவேகமோ

இறப்பதற்கு அஞ்சோம் உலகிலே
பிறந்த எவரும் சாவது உறுதி
கதறிப் பணியோம் வன்முறைக்கே
கலங்க அடிப்போம் இது உறுதி

மகன் போனால் மகன்கள் உண்டு
தமயன் போனால் தமயனா ருண்டு
எமக்கு உண்டு அன்பின் மொழி
உமக்கு சொல்வோம் தெண்டின் மொழி

(மாற்றலர்= எதிரிகள்; தெண்டு= கோல்,தடி)

கரெண்ட் போச்சா ? மாட்டை கட்டு !

2008-11-25T01:54:00.000-08:00

முதல் முதலா கச்சா எண்ணெய் பிரச்சனை 70 களில் வந்த போது மாற்று எரிசக்தி ஆராய்ச்சி மிகவும் சூடாக ஆரம்பித்தது.அப்போது மாட்டு வண்டியை எப்படி மேம்படுத்துவது அதனால் எருதுகளின் சக்தி வீணாகமல் எப்படி முழுமையாக பயன்படுத்த முடியும் என்றெல்லாம் பெங்களூர் Indian Institute of Management-லிருந்து ஆராய்ச்சி கட்டுரைகள் வெளிவந்தன.அதை யொட்டி வெளிவந்த ஒரு கேலிச் சித்திரம் சிந்தனையை தூண்டுவதாக இருந்தது.

வண்டி இழுக்கும் இரண்டு மாடுகள் பேசிக் கொள்கின்றன “You know, we are no more animals; we are alternate sources of energy "

இன்றைக்கு Times of India (Times Bangalore 25/11/08) பத்திரிக்கையில் வந்திருக்கும் ஒரு செய்தி அதை நிஜப்படுத்துவது போல் உள்ளது.
படத்தை சுட்டினால் பெரிதாக்கி முழு விவரத்தையும் படிக்கலாம்.

செக்கு மாடுகள் எண்ணெய் வித்துகளை அரைத்து எண்ணெய் எடுக்க ஒரு குறிப்பிட்ட வட்டப்பாதையில் சுற்றி வருவது போலத்தான் இதிலும் மாடுகள் சுற்றிச் சுற்றி வரவேண்டும். அதை தகுந்த பற்சக்கரங்கள் (கியர்) துணையோடு சுற்றுவிசையாக மாற்றி ஒரு ஜெனேரட்டர் வழியாக மின்சாரம் உற்பத்தி செய்யப்படுகிறது.

தற்போது 2 KW ஜெனேரேட்டர் மாதிரி உற்பத்தி திறனுள்ள எந்திரம் வடிவமைக்கப்பட்டுள்ளது.

யாவரும் புரிந்து கொள்ளக்கூடிய எளிதான தொழில்நுட்பம். சுருக்கமாகச் சொன்னால் சைக்கிள் பெடல் மிதிப்பதால் டைனமோ எரிவதைப்போல என்று வைத்துக் கொள்ளுங்களேன்.

இதை ஒட்டி மனதில் வரும் சில எண்ணங்கள்.

உழவு மாடுகளை செக்கு மாடாக பயன்படுத்த முடியாது என்று சொல்லக் கேட்டிருக்கிறேன்.அது உண்மையில்லா விட்டால் வருடத்தில் விவசாயத்தில் நான்கு மாதங்களே பயன்பட்டு வரும் எருதுகள், இந்த வேலையினால் வருடம் முழுவதும் பயன்பட வாய்ப்பிருகிறது.

கோவை,மைசூர் போன்ற நகரங்களில் தெருக்களில் சும்மா சுற்றிக்கொண்டிருக்கும் குதிரைகளை பூட்டினால் இன்னும் அதிகமான மின் உற்பத்தி திறனுடைய ஜெனேரட்டர்களை இயக்கமுடியுமோ என்னமோ !

இதில் ஒரு கேள்வி எழுப்பப்பட்டுள்ளது.அதாவது எருதுகளை (எருமைகளையும் வடநாட்டில் பயன்படுத்துவதுண்டு) செக்கு மாடுகளைப் போல் பயன்படுத்தினால் பிராணிநல ஆர்வலர்களுக்கு கோபம் வருமாம்!! அதனால் இந்த தொழில் நுட்பத்திற்கு மான்யம் அளிக்க மத்திய அரசு தயங்குகிறதாம்.

ஆயிரக்கணக்கான வருடங்களாக மனிதனுடைய உற்ற தோழனாக இருந்து அவன் கூடவே உழைப்பில் பங்கு கொண்டு குடும்பத்தில் ஒருவராக கருதப்பட்ட பிராணிகளை இன்று வெகுவாக உணவுக்காக வளர்த்து கசாப்பு கடைகளுக்கு அனுப்புவதை இந்த ஆர்வலர்கள் ஏன் தடுப்பதில்லை ?

ஒருவேளை விருப்பமில்லாததால் தட்டிக் கழிக்க அரசு அவர்கள் மேல் பழியை திருப்புகிறதோ ?
மீண்டும் பிராணிகளையும் மனிதர்களையும் ஒருவரைச் சார்ந்து ஒருவர் என்ற வகையில் இணைக்கக்கூடிய,சுற்றுப்புற சூழலுக்கு தீங்கிழைக்காத தொழில் நுட்பம் என்ற வகையில் இதன் முன்னேற்றத்தை துரிதப்படுத்த வேண்டும். (படம் :நன்றி F.A.O.)

ஒரு பலூன் கதையும் பலூன் பாடலும்

2008-11-12T07:54:00.000-08:00

இன்று மின்னஞ்சலில் ”How America went Bust" என்ற தலைப்பில் வந்த ஒரு கட்டுரையை தழுவி எழுதியது. பங்கு சந்தை என்ற பலூன் உருவாகும் விதத்தை எளிமையாக விளக்கியுள்ளது . இனி, கதைக்குச் செல்வோம்.

ஒரு தீவு. அந்த தீவில் புழக்கத்தில் இருந்தது இரண்டு ‘ஒரு ரூபாய்’ நாணயங்கள் மட்டுமே.

அந்த தீவில் குடியிருப்போர் மூன்று பேர். முகேஷ் மற்றும் அனில் ஆளுக்கொரு ரூபாய் வைத்திருந்தனர். மூர்த்தியிடம் பணம் இருக்கவில்லை. ஆனால் அவன் ஒரு தென்னங்கன்று வளர்த்தான்.

முகேஷ் அதை ஒரு பணம் காய்ச்சி மரம் என்பதை எப்படியோ புரிந்து கொண்டு மூர்த்திக்கு ஒரு ரூபாய் கொடுத்து மரத்தை வாங்கினான். இப்போது தீவின் மதிப்பு மூன்று ரூபாய்கள். அதாவது மூர்த்தி அனில் இருவரிடமும் ஒவ்வொரு ரூபாயும் முகேஷிடம் ஒரு ரூபாய் மதிப்புள்ள மரமும் இருக்கிறது.

இதைக் கண்ட அனில் பணம் காய்ச்சி மரம் பிற்காலத்தில் பயன்படும் என்று மூர்த்தியிடம் ஒரு ரூபாய் கடன் வாங்கி தனது ஒரு ரூபாயையும் சேர்த்து முகேஷிடமிருந்து இரண்டு ரூபாய் கொடுத்து மரத்தை வாங்கினான். இப்போது தீவின் மதிப்பு நான்கு ரூபாய்கள். அதாவது மரம் 2 ரூபாய், முகேஷிடம் 2 ரூபாய்.

மரத்தின் விலை ஏறுவதைக் கண்ட மூர்த்தி அதை விற்றதற்காக மனம் வருந்தி முகேஷிடம் 2 ரூபாய் கடன் வாங்கி அனிலிடம அவன் (அனில்)ஏற்கனவே பட்டிருந்த ஒரு ரூபாய் கடனையும் தள்ளுபடி செய்து மீண்டும் மரத்தை வாங்கினான். இப்போது மரத்தின் மதிப்பு 3 ரூபாய்கள். அனிலிடம் 2 ரூபாய்கள். தீவின் மதிப்பு 5 ரூபாய்கள்.

அடடே மரத்தின் விலை கூடிக்கொண்டே போகிறதே என்று முகேஷ் அனிலிடம் 2 ரூபாய் கடன் வாங்கி மூர்த்தியின் 2 ரூபாய் கடனை தள்ளுபடி செய்து 4 ரூபாய்களுக்கு மரத்தை கிரயம் செய்தான். இப்போது மூர்த்தியிடம் 2 ரூபாய்கள். தீவின் மதிப்பு 4 +2 =6 ரூபாய்கள்.

திடீரென்று அனிலுக்கு கவலைப் பிடித்துக்கொண்டது. மரம் நினைத்தபடி பலன் தராமல் போய்விட்டால் முகேஷ் எப்படி தன்னுடைய 2 ரூபாய் கடனை திருப்பித்தர முடியும். மூர்த்திக்கும் அதே கவலை பிடித்துக் கொண்டது. அதனால் கையில் பணமிருந்தும் அவன் மரத்தை விலை பேச முன்வரவில்லை. என்னதான் சொன்னாலும் காய்க்காத தென்னங்கன்றின் மதிப்பு ஒரு ரூபாய்தான் என்பதை புரிந்து கொண்டான் அவன்.

இப்போது மரத்தை வாங்குவோர் இல்லை. மூர்த்தியிடம் 2 ரூபாய்கள் இருக்கிறது. முகேஷிடம் 4 ரூபாய் மதிப்புள்ள மரம் ஒரு ரூபாய் என மதிப்பிடப்படுகிறது. எனவே அவன்
அனிலுக்கு கொடுக்க வேண்டிய 2 ரூபாய் கடனில் ஒரு ரூபாய் மட்டுமே திருப்பித்தர இயலும்.

முகேஷ் திவாலாகிப் போனான். முகேஷ் பட்ட கடனை அனில் திரும்பாதக் கடனாகத் தள்ளுபடி செய்தான். இப்பொது தீவின் மதிப்பு மீண்டும் 3 ரூபாய்கள். 6 ரூபாயில் இழந்த 3 ரூபாய்கள் எங்கே போயிற்று ?

கதை சொல்லும் நெறி.

எளிமை கருதி வர்த்தகம் மூவருக்குள்ளே நடப்பதாக காட்டப்பட்டது. அங்கே இன்னுமொரு மரம் இருந்து ரத்தன் என்பவன் சொந்தக்காரனாக இருந்திருந்தால் இன்னும் ருசிகரமான கைமாற்றங்கள் ஏற்பட்டிருக்கும். ரத்தன் விளையாட்டில் சேராமல் வேடிக்கைப் பார்த்தாலும் அவனுடைய மரத்தின் விலையும் ஏறுவதும் இறங்குவதுமாக இருந்திருக்கும். அதற்குதகுந்தாற்போல் தீவின் மதிப்பு ஏறுவதும் இறங்குவதுமாக இருக்கும்.

இதைத் தவிர வெளித் தீவிலிருந்து யாரேனும் முதலீடு செய்ய முற்பட்டிருந்தால் பணபுழக்கம் அதிகரித்து தீவின் மதிப்பும் காகிதத்தில் உயர்ந்து கொண்டே போகும். புத்திசாலியான வெளியாள் செயற்கையாக விலையை ஏற்றி, மரத்தை சமயம் பார்த்து உள்ளுர்காரனுக்கே அதிக விலையில் விற்று தன்னுடைய வங்கிக் கணக்குக்கு பணத்தை மாற்றிக் கொண்டு போயே போய் விடுவான். அப்போது தீவில் உள்ளவர்கள் ஏமாளிகளாக அமர்ந்திருக்க வேண்டியது தான்.

பங்குச் சந்தை செய்கின்ற குளறுபடிகளும் இப்படிபட்டதே. எவனொருவன் வேகமாய் பணமாக மாற்றிக் கொள்வானோ அவனே புத்திசாலி. பங்கு காகிதத்தை நம்பி பணம் கொடுத்த வங்கிகளுக்கும், கடன் வாங்கி முதலீடு செய்வோருக்கும் கடைசியில் தலையிலே துண்டு.

பத்துக்காசு விலையிலே பலூன் ஒன்று வாங்கினேன்....... மழலையின் மொழியிலே கேட்டு மகிழுங்கள். பாடல் வரிகள் இங்கே

Get this widget

Track details

eSnips Social DNA

ஸ்ரீ ருத்ரம் பயில விரும்புவர்களுக்கு

2008-11-04T08:08:00.000-08:00

ஸ்ரீ ருத்ரம், புருஷஸுக்தம் முதலியவனற்றை முறையாக சாதகம் செய்தவர் மூலம் கற்றுக்கொள்ள வேண்டும் என்று சொல்லப்படுவதுண்டு. ஏனெனில் உச்சரிப்பு சுத்தம் என்பது படித்து அறிந்து கொள்ள முடியாது.

முதன்முறையாக சத்யசாயி பிரசுரத்தினர் உச்சரிப்பு சுத்தத்துடன் சுயமாக கற்றும் கொள்ளும் வகையில் ஸ்ரீருத்ரத்தை அவர்களுடைய இணைய தளத்தில் வலையேற்றம் செய்துள்ளார்கள். PDF கோப்பில் ஒலிக் கோப்பையும் பதிந்து ஒவ்வொரு வரிக்குக் கீழே அதன் உச்சரிப்பு முறையை தெளிவு படுத்தியிருப்பதால் குரு முகமாக கற்றுக் கொள்வதைப் போலவே பயிற்சி செய்து பழகலாம்.

இதனால் வெளி மாநிலங்கள் அயல்நாடுகளில் வசிப்போர், கற்பதற்கு வாய்ப்பில்லையே என்று வருந்துவோர் பெருமளவில் பயனைடய முடியும். இந்த நூதனமான தொழில்நுட்பம் (sound embedded pdf file) ஆத்திக அன்பர்களுக்கு இப்படி பயனுள்ள முறையில் பயன்படுவது சந்தோஷத்திற்குரியது.

(படத்தைப் பெரிதாக்கிப் பார்க்கவும்)

இந்த கோப்புகளை தரவிறக்கம் செய்து கொள்ளும் வசதியும் தரப்பட்டுள்ளது.

ஒரு பர்ஸெண்ட் பகவத்கீதை- சப்த ஸ்லோகி கீதா

2008-10-14T03:43:00.000-07:00

குமுதம் ஆசிரியர் எஸ் ஏ பி அண்ணாமலை சாமான்யர்களோடு பஸ்ஸில் பயணம் செய்வார்.திரைப்படம் பார்ப்பார்.எப்போதும் திரைமறைவிலிருந்து வந்தார். இவைகள் அவருடைய அரசு கேள்வி பதில் பகுதியை மிக சுவாரசியமாக்கியது. அவர் அதே அளவு ஆர்வத்துடன் பகவத் கீதை படித்ததை அவருடைய ஆசிரியர் குழுவில் ஒருவர் பின்னாளில் நினவு கூர்ந்திருந்தார். எனக்கு இதை படித்த போது ஆச்சரியமாயிருந்தது. என் கணிப்பில் வெகு ஜன ரசனைக்காக வெளிவந்த பத்திரிக்கை குமுதம் என்பதே. அதில் பலமுறை மலின ரசனைக் கதைகளையும் துணுக்குகளையும் கண்டு அதை படிப்பதையே நிறுத்திவிட்டேன்.

தனி மனிதத் தேடல் வேறு (ஜீவியின் தொடரை படித்து வருகின்றீர்களா ?), வியாபாரப் போட்டி வேறு என்று அவர் நினைத்தாரோ என்னவோ! யாவருக்குள்ளும் ஆன்மீகம் என்பது நீறு பூத்த நெருப்பாக இருக்கும். நேரம் வரும் போது ‘பக்’கென்று பிடித்துக்கொள்ளும்

மஹாராஷ்ட்ராவைச் சேர்ந்த காக்டே என்பவர் ஒரு மருத்துவர். ஷிரடி சாயியின் பெரும்பக்தர். அவர் தமது வாழ்க்கையில் ஏற்பட்ட பல நிகழ்ச்சிகளையும் ஒரு ஆன்மீகக் கண்ணோட்டத்துடன் தம்முடைய சுயசரிதத்தில் குறிப்பிட்டுள்ளார். அதில் அவருக்கு பால்ய வயதில் ஆன்மீகத்தில் பற்று ஏற்படக் காரணமாயிருந்த ஒரு பெண்மணியைக் குறிப்பிட்டு அவர் ஊரைவிட்டு பிரியும் முன்னர் தினம் குறைந்தது ஐந்து பகவத்கீதை சுலோகங்களையாவது படிப்பேன் என்று வாக்குறுதி வாங்கிக் கொண்டார் என்று சொல்கிறார். பின்னர் வாழ்நாள் முழுவதும் அதை விடாமல் காப்பாற்றி வந்ததாகவும் அதுவே பல சமயங்களில் தனக்கு மனவுறுதியும் உற்சாகமும் கடமையில் ஈடுபாடும் தந்ததாக விவரித்திருந்தார்.

இதை படித்த உடன் ”சப்த ஸ்லோகி கீதா” என்று கீதா ப்ரஸ் கோரக்பூர் அவர்களின் புத்தக பதிப்பில் ஒன்றை பார்த்தது நினைவுக்கு வந்தது. காக்டே அவர்கள் போல் கீதையை தொடர்ந்து படிப்போமோ இல்லையோ குறைந்தது அந்த ஏழு சுலோகங்களையாவது கற்றுக்கொள்வோமே என்ற எண்ணம் தோன்றியது. அதை எழுதி வைத்து தொடர்ந்து பலவருடங்களாக, தினம் இல்லாவிட்டாலும், வாரம் மூன்று நான்கு முறை சொல்லி வருகிறேன்.

பின்னர் பலருடன் பகிர்ந்து கொள்ளும் நோக்கத்துடன் அதை ஒலி ஒளி வடிவில் பவர் பாயிண்ட் கோப்பாகத் தயாரித்து 2003-ல் ஜியோசிடி இலவச பக்கங்களில் வலையேற்றி கொஞ்ச நாளில் அதை மறந்தும் போனேன்.

இப்போது தமிழ் வலைப்பூ அன்பர்களுடன் அதை பகிர்ந்து கொள்ளும் நோக்கத்துடன் esnip சேகரிப்பு பகுதியில் சேர்த்துவிட்டு இணப்பை இங்கே தருகிறேன். ஒரு சில கணிணிகளில் ஒலிவடிவம் வேலை செய்வதில்லை என்று கேள்விப்பட்டேன். விண்டோஸ் 98 வைத்து உருவாக்கியது. இப்போது என் விண்டோஸ் எக்ஸ்-பியிலும் ஒலி வேலை செய்யவில்லை. யாருக்காவது வேலை செய்தால் சந்தோஷம்.

ஏழு சுலோகங்களைத் தொடர்ந்து எட்டாவது சுலோகமும் ஒன்றை இணைத்திருக்கிறேன். அதை பலஸ்ருதி என்பர். படித்ததன் பலனை நினைவிலிருத்திக் கொள்ளச் சொல்லப்படுவது. இறைவனிடம் ஒரு அப்ளிகேசன் அவ்வளவுதான். கோளறு பதிகத்தின் கடைசியில் சம்பந்தர் சொல்வாரே

“தானுறு கோளு நாளும் அடியாரை வந்து நலியாத வண்ணம் உரைசெய்,
ஆன சொன் மாலை ஓதும் அடியார்கள் வானில் அரசாள்வர் ஆணை நமதே”

என்பதும் தேவராய சுவாமிகள் சொல்லும்

.......
கந்தசஷ்டி கவசம் விரும்பிய
பாலன் தேவராயன் பகர்ந்ததை
காலையில் மாலையில் கருத்துடன் நாளும்
..............
கந்தர்சஷ்டி கவசம் இதனைச்
சிந்தைகலங்காது தியானிப்பவர்கள்
...................
திசைமன்னர் எண்மர் சேர்ந்தங் கருளுவர்
மாற்றலர் எல்லாம் வந்து வணங்குவர்
நவகோள் மகிழ்ந்து நன்மை அளித்திடும்
........

எல்லாம் பலஸ்ருதியே.

பலனைக் கருதாது கடமையைச் செய்யவேண்டும் என்றாலும் கடவுளிடம் இறைஞ்சுதலிலும் பெருமை போற்றுவதிலும் தவறில்லை போலும்!

பகவத் கீதையை படிக்க ஆர்வமிருந்தும் நேரம்,சூழ்நிலை அனுகூலமில்லாதவர்கள் குறைந்த பட்சம் இந்த ஏழு சுலோகங்களை படித்து மனநிறைவு அடையலாம். ஆன்மீகம் எனும் கனலை அணைந்து விடாமல் அது பாதுகாக்கும். இப்படி ஆர்வத்தை பாதுகாத்தால் காலம் கனியும் போது கீதை முழுவதும் படிக்க இறைவன் வழி செய்வான்.

வாழ்க வளர்க

தரவிறக்கம் செய்ய கீழுள்ள இணப்பைச் சுட்டவும்.

Sapta sloki Gita ....

Hosted by eSnips

தேயீயீயீ....இன்னும் தேய்- : சினா சோனா(6)

2008-08-31T18:12:00.000-07:00

ஆத்து வெள்ளம் காத்திருக்கு அழுக்கு துணியும் நெறஞ்சிருக்கு” அப்படீன்னு ஒரு பாட்டு திருவருட் செல்வர் படத்துல வரும். பாட்டு நடுவில வார்த்தைகளோட அழகை கவனிங்க.

மனசு போல வெளுத்து வைச்சு
உறவு போல அடுக்கிவைச்சு
வரவு போல மூட்டைகட்டி- வெள்ளையப்பா
நாம வரவு வைக்கும் நாணயம் தான்
வெள்ளையப்பா

“ மனசு, துணிய விட சுத்தமா இருக்கு”.

எளிமையான மக்களுக்கு அப்படிதாங்க. கவிஞர் வார்த்தையிலேயே படம் புடிச்சிட்டாரு. அப்படி ஒரு சுத்தம் வரணுமின்னா என்ன செய்யணும். சினா சோனா சொல்றாரு பாருங்க
(படம் பெரிதாகத் தெரிய அதன் மேல் சுட்டவும்)

"It wisely put, better to rub it out, than to rub it in "

மனைவிக்கு பயந்த கணவனாக இருக்கும் சினா-சோனா வுக்கு துணி துவைக்கும் வேலை வந்து சேருது. அவங்க ஊர்ல துணிய தேய்க்கிறப் பலகை, தொட்டிக்கு செங்குத்தாகத்தான் இருக்கும் போலிருக்கு. அது மேல அழுக்கு துணிய தேய்க்கும் போது முதலில் அவருக்கு தன்னுடைய நிலைமைய நினைச்சு மனம் கஷ்டப் படுது. ( அதை படத்துல அவரு மூஞ்சியப் பார்த்து புரிஞ்சிக்கணும்). சுய பச்சாதாபம்.

அதன் பிறகு அழுக்கைப் போக்கத் தேய்த்துக் கொண்டிருக்கும் (rub it out ) செய்கையாலே ஞானோதயம் வருது. கோபத்தையோ கஷ்டத்தையோ மனசிலேயே போட்டு உழப்பிக் கிட்டு (rub it in ) இருக்கிறத விட 'அழுக்கை வெளிய தள்ளுற மாதிரி, எதிர்மறை எண்ணங்களை தள்ளிடணும்' ன்னு சொல்றார்.

குள்ளச்சாமியை பார்த்து பாரதியார் ‘ஏனய்யா அழுக்கு மூட்டை சுமக்கிறீர்' ன்னு கேட்டதுக்கு அவரு என்ன சொன்னாரு?

“புறத்தே நான் சுமக்கின்றேன், அகத்தினுள்ளே
இன்னொரு பழங்குப்பை சுமக்கிறாய் நீ ”

அப்படீன்னு பதில் வந்திச்சு. சினா சோனா சொல்ற "rub it in " ங்கறது பழங்குப்பை சேர்ப்பதற்கான வழி. மனசுக்கு எது உற்சாகம் கொடுக்குமோ அந்த விஷயங்களை மாத்திரம் நெனச்சு பார்க்கணும். அப்போ தானாகவே வேண்டாத எண்ணங்களெல்லாம் தூர ஓடிப்போயிடும்.

ரொம்ப சிம்பிளா கவிஞர் rub-it out வழியும் சொல்லிட்டாரு பாருங்க.
கந்தையிலே அழுக்கிருந்தா கசக்கி எடுத்துவிடு வெள்ளையப்பா - உன்
சிந்தையிலே அழுக்கிருந்தா சிவனடியை நாடிவிடு வெள்ளையப்பா

சினா சோனா, சொன்னா சரிதான் !

எது இன்ஸ்பிரேஷன், எது காப்பி ?

2008-08-23T17:49:00.000-07:00

வெளி நாட்டு பாடல்களை அப்படியே நகல் செய்து வரும் சில ஹிந்தி இசை அமைப்பாளர்கள் பற்றிய விவாதத்தை சமீபத்தில் தொலைக்காட்சியில் காண நேர்ந்தது. தூண்டுகோலாக (inspiration) கொள்வதில் தவறில்லை. அப்படியே நகல் எடுக்கக்கூடாது என்று பப்பி லஹரி சொன்னார்.
உங்களுக்கு ஒன்று தெரியுமா ? சின்ன சின்ன ஆசை என்று சக்கை போடு போட்டதே ஒரு பாடல் அதற்கு மூலம் கே.எஸ். நரசிம்மஸ்வாமி என்பவர் எழுதி பல வருடங்களுக்கு முன்னர் கன்னடத்தில் ”மைசூரு மல்லிகே” என்கிற திரைப் படத்தில் வரும் ஒரு பாடலை ஒட்டியிருக்கும். ஒரு மொழியிலிருந்து மற்றொரு மொழிக்கு வரும் போது இசையை 'காப்பி' அடிக்கமுடியும் ஆனால் வார்த்தைகளை அவ்வளவு சுலபமாக முடியாது.

ஆனால் ஒரே மொழியில் ஒரே விதமான வரிகள் கொண்டு வரும் போது அதை என்ன சொல்வது?

சமீபத்தில் கவிநயா அவர்களின் ”நினைவின் விளிம்பில்”வலைப்பூவில் நடராசர் பற்றிய கவிதையை கண்டபோது என்னிடமிருந்த சஞ்சய் சுப்பிரமணியன் அவர்கள் குரலில் பதிவான ”மானாட மழுவாட” என்ற பாடல் நினைவுக்கு வந்தது. விருத்தமாக பாடப்பெற்ற அந்த பாடல் தில்லி B வானொலியில் காலை 6.0லிருந்து 6.45 வரை ஒலிபரப்பாகும் ”வந்தனா” நிகழ்ச்சியில் அடிக்கடி ஒலி பரப்பாகிக் கொண்டிருக்கிறது. அதன் பொருள் செறிவு காரணமாக அதை பதிவு செய்து வைத்திருந்தேன். அப்போது பாடல் ஆசிரியர் யாரென்று தெரியவில்லை. கோபாலகிருஷ்ண பாரதியோ, அருணாசலக் கவியாகவோ இருக்கலாம் என்று ஊகித்திருந்தேன்.

கவிநயா வின் பதிவை படித்தபின் அதன் ஆசிரியரை தேட முனைந்தேன். முதலில் அப்புசாமி டாட் காம் -ல் நடராஜ பத்து என்ற தலைப்பில் பாடல் கிடைத்தது. ஆனால் ஆசிரியர் பற்றி குறிப்பிருக்கவில்லை. மேலும் தேடியதில் இன்னொரு ஆச்சரியம் காத்திருந்தது. என்னைப் போலவே அப்பாடலால் கவரப்பட்ட சேதுக்கரசி அவர்கள் அதைப் பற்றி 'அன்புடன்' குழுமத்தில் குறிப்பிட்டிருக்கிறார். அப்பாடலை ”மறைந்திருந்து பார்க்கும் மர்மம் என்ன” என்று ஆரம்பிக்கும் திரைப்படப் பாடலின் கடைசி சில வரிகளோடு ஒப்பிட்டு எப்படி ஒரு பாடல் இன்னொரு பாடலாசிரியருக்கு 'தூண்டுகோலாக' அமைகிறது என்பதை அழகாக காட்டியிருக்கிறார்.

பூவை செங்குட்டுவன் எழுதி சூலமங்கலம் சகோதரிகள் பாடியிருக்கும் பிரபலமான பாடலில் வரும்

ஆடுகின்றானடி தில்லையிலே

அதை பாட வந்தேன் அவன் எல்லையிலே

திங்களும் ஆட சூலமும் ஆட

விரிசடை மீதொரு கங்கையுமாட

என்கிற வரிகளும் மேற்கண்ட பாடலின் தாக்கம் எனக்கொள்ளலாம். இப்படி பலருக்கும் பலவிதமாக ஊக்கமளிக்கும் பாடலை நீங்களும் பக்க-பட்டையில் (side Bar) பொருத்தப்பட்டுள்ள தமிழிசை தொகுப்பில் கேட்டு மகிழலாம். அதன் ஆசிரியர் சிறுமணவூர் முனுசாமி முதலியார். நடராச பத்து என்ற பதிகத்தில் இரண்டாம் பாடலாக வருவது.

மானாட மழுவாட மதியாட புனலாட
மங்கை சிவகாமி யாட
மாலாட நூலாட மறையாட திரையாட
மறை தந்த பிரம்மனாட
கோனாட வானுலகு கூட்டம் எல்லாமாட
குஞ்சர முகத்தான் ஆட
குண்டலம் இரண்டாட தண்டை புலியுடை ஆட
குழந்தை முருகேசன் ஆட
ஞான சம்பந்தரொடு இந்திராதி பதினெட்டு
முனி அட்டபாலகரும் ஆட
நரைதும்பை அறுகாட நந்தி வாகனமாட
நாட்டியப் பெண்க ளாட
வினையோட உனைப்பாட யெனைநாடி இதுவேளை
விருதோடு ஆடி வருவாய்
ஈசனே சிவகாமி நேசனே எனையீன்ற
தில்லை வாழ் நடராசனே
(அட்டபாலகர்= அஷ்ட பாலகர்)
விருத்தம் பாடுவது ஒரு கலை. அதை குறிப்பாக ஒரு பாடலின் பொருள் உணர்ந்திருந்தால் மட்டுமே சிறப்பாக செய்ய முடியும். அதில் பாவத்திற்கேற்ற ராகமும், தெளிவான உச்சரிப்பும் இருந்தால்தான் களைக்கட்டும். அதை நன்றாகவே கையாண்டிருக்கிறார் சஞ்சய் சுப்பிரமணியன் அவர்கள்.

முனுசாமி முதலியார்க்கும் ஒரு முன்னோடி உண்டு. அவர்தான் திருமூலத்தேவர். அவருடைய பாடலையும் பாருங்களேன் !

வேதங்கள் ஆட மிகு ஆகமம் ஆட

கீதங்கள் ஆடக் கிளரண்டம் ஏழாடப்

பூதங்களாடப் புவனம் முழுதாட

நாதன் கொண்டாடினான் ஞானானந்தக் கூத்தே

எது இன்ஸ்பிரேஷன் எது காப்பி ?